الفصل 21 والاخير

                           بقلم نورسين محمد 

الفصل الواحد والعشرون

ف المغربية اندق باب الدار ، هم خالي يفتح الباب وسمعته بيرحب بيهم وبيقول اتفضلوا اهلا وسهلا بالناس الطيبين  ده احنا زارنا النبي النهارده وبعد ما دخلوا نادي بصوت عالي ، يا أم شمعه تعالي وهاتي العروسة والشربات

دخلت آني وأمي وكنت شايلة الصينيه ، هم مأمون ومسكها من يدي وحطها علي التربيزة چار الباب
سلمت عليه وعلي الحاچ
خالي قالي اقعدي هنه چار أمك يا عروسة
سمعت كلمته وقعدت

واتحدتوا واتفقوا علي كافة شي وسمعت خالي بيقول نقروا الفاتحه علي التمام
قولتله چيه دوري ف الحديت يا خال بعد اذنكم
رد مأمون وقال بعد اذنك يا خال آني عاوز اعرف طلباتها كلاتها اذا مفيش عنديكم مانع

فرحت من كلامه وبسرعه قولتله : طب آني عاوزه طلب صغير لو هوافق علي الچواز

....... : اتفضلي آني سامع

...... : آني معوزاش فرح وطبل وزمر ، كل اللي آني عوزاه عيادة صغيرة في البلد لچل أساعد الناس اللي مقدراش علي العلاچ

....... : كل لحظه بتعدي عليّ وانتي وياي ، بحمد ربنا ألف مرة انه اكرمني بواحدة كريمه ذيك ، كل لحظة بتكبري في نظري اكتر واكتر
وكل طلباتك آني هنفذها وكمان فرح وطبل وزمر وشبكة كبيرة لچل قلبك الإبيض

......... : عرفت تنقي يا ولدي الله يحفظها ويتملكم علي خير ، صدقت أما قولتلي من أصل طيب

أمي مكانش علي لسانها غير معوض مخلف يارب ودموعها مغرقاها
معوض مخلف يا الله الحمد لله علي الرزق

نسيت احكيلكم عن الحاچ چلال طلع راچل طيب ويعرف ربنا ، وعرفت من مأمون أن والدته متوفيه من زمان وهو عنديه أخ مسافر برا مصر وعايش هناك ومتچوز وبيآچي كل سنة مرة يقعد مع أبوه شهرين ويعاود تاني يسافر لانه مهندس كبير بيشتغل في شركة بترول كبيرة وميقدروش يستغنوا عنيه

فرحنا كلاتنا وهمت أمي حضنتني بعد ما قرينا الفاتحة ، وعيوني ف عيون مأمون والفرحة بتتنطط ف عيونه كنه طفل صغير چاله هدية غالية ،
فرحة زين وأميرة مكنتش تتوصف وكن زين ابوي مهواش اخوي الصغير ، حضني وطبطب علي ودموعه مغرقه وشه وقالي مبروك ياما
زعلان انك هتسبينا وتروحي تعيشي ف دار تانية بس فرحان أن ربنا رضاكي وانك فرحانه وكله يهون يا خيتي المهم تكوني كويسه وزينه وعايشه عيشه زينه ، مبارك عليكم

حسيت وقتها أن أبوي هو اللي هيتحدت وياي مش زين أخوي الصغير اللي ربيته علي يدي بس قولتله مهمي سيبتكم وعيشت ف دار تانية مهسيبش روحي ، انتوا روحي ازاي اسيبكم يا ابن قلبي

زغرطت أمي من فرحتها بكلامنا وأميرة لساتها تعبانه شوي من العملية ، روحت لحدها وضميتها ف حضني وبوستها وقولتلها يالا خفي بقي لچل نشتري الفستان الچديد للفرح

فرحت من كلامي وقالتلي مبروك يا عروسة

أميرة لساتها بعد ما خرچت بتكمل علاچها وأن شاء تبقي زينة

بعد كام شهر عدوا علينا وآني ومأمون الحمد لله متفاهمين علي كافة شي ، عملي فرح كبير وقدملي شبكة كبيرة عمري ما حلمت ألبس حاجة واحدة منيهم ، وليلة الحنة الحاچ چلال دبح عچل كبير ، كان فرحان بچوازنا وفرقه كلاته للناس الغلابة
آني هعيش ويا ابوه ف دارهم مهياش بعيده قوي عنينا وليلة الفرح قدملي مأمون ورقة مطبقه بعد ما وصلنا لدارنا الچديدة وقالي افتحيها
....... : ايه دي وفيها إيه ؟؟
....... : افتحي واقرأي اللي فيها
فتحت الورقة وقريتها ولقيت عقد العيادة اللي اتمنيت تكون ملكي
حضنته وآني فرحانه وأول مره بوحتله باللي في قلبي وقولتله : آني بحبك ، وبحبك قوي ومن زمان قوي كمان بس مكانش ينفع اصرح بشي ، بس ربنا سبحانه وتعالي هداك ليا ، ربي يباركلي فيك وتفضل وياي علي طول

اتچوزت مأمون وعيشت وياه في سعادة ودايما كان بيساعدني في المذاكرة واچلت الحمل شوي وهو كان موافق لان الدراسة صعبة وكان لازم تفرغ
خفت أميرة الحمد لله وبقت ذي الفل ، زين كان شاطر ومتفوق ف المدرسة وكل مدرسينه بيشكروا فيه ، أمي وقفت شغل المصنع ، عيونها تعبت والحمد لله الحال بقي احسن بكتير من لاول ، شغلت العيادة آني ومأمون والحمد لله الرزق زاد ، كنا بنكشفوا بأسعار رمزية لچل يتعالچ المريض اللي مش معاه تمن الكشف والعلاچ
دعوة الناس الطيبة دايما هيا اللي بتبقي وهيا اساس الخير
بعد ما اتچوزت بشهور كنت قاعدة ف العيادة وسمعت دوشه وصوت عالي
فتحت الباب أشوف ف إيه ولسه مكملتش الچمله بقول في إيه لقيت مُصطفي واد خالتي قدامي چايب خالتي وبيقولي ، ألحقيني يا بت خالتي ، خالتك تعبانه قوي ومعرفش مالها

عيوني اتحجرت اما شوفتها قدامي وكل حاچه عملتها وياي وويا أمي اتعادت تاني قدام عيوني
حسيت بخنقه وأن دموعي كانت علي طرف عيني هتنزل
وفوقت علي صوت ياسمين الممرضة بتقولي ادخل الحالة يا داكتوره
هزيت رآسي وسيبتهم ودخلت الاوضة واستنيتها تدخل ، كشفت عليها وآني ساكته وبعد ما خلصت قولتله متقلقش انشاله خير بس لازم نطمنوا علي حالة القلب ، انت دلوك تروح تشتري الحقنه دي وترچعلي طوالي
وبعد أكده تنزل بيها المركز وتعملها صور الاشاعات دي ورسم القلب وتعاود بيها تاني

........ : حاضر يا بت خالتي ، اقصد يا داكتوره شمعه ، حالا هچيب الحقنه وارچعلك ، سابني ومشي مستعچل لچل يلحق أمه

أما شوفتها متمدده علي السرير لا حول لها ولا قوة قولت ف عقلي يا بخت من قدر وعفي
وربنا سبحانه وتعالي قال فمن عفي واصلح فأچره علي الله فقولت لازم الواحد يعفو لچل أن ربنا يعوضه عن عمله بالخير

فاقت شوي خالتي وفتحت عنيها وشافتني ونادت علي ، قربت منيها وقولتلها نعم يا خالتي محتاچه شي

قالتلي سامحيني يا بتي آني .... 
قاطعتها وقولتلها خلاص يا خالتي اللي فات ننسوه وآني مسامحه في حقي بس مقدراش اسامح ف حق أمي اللي اتظلمت قدام عينيا وكنت صغيرة مقدرتش ارد

....... : لو ربنا كتبلي العمر هروح لحدها واستسمحها واطلب منيها تسامحني ، مهمي كان احنا خوات

........ : ارتاحي يا خالتي أنتي تعبانه دلوك ، ونبقوا نتحدتوا بعدين تكوني اتحسنتي شوي ، المچهود دلوك حتي لو بالكلام مهواش زين

........ : حاضر يا بتي الله يزيدك من واسع فضله

رچع مُصطفي وچاب الحقنة ، حقنت لخالتي واطمنت عليها وبقت احسن من لاول ومشت مع مُصطفي تعمل الاشاعات والتحاليل وبعد سبوع ردوا تاني للعيادة بس كانت اتحسنت شوي علي العلاچ
شوفت الاشاعات والتحاليل وكتبت العلاچ الچديد ، دعتلي خالتي بصلاح الحال والرزق ووعدتني انها هتخرچ من عندي تروح لدار امي تطيب خاطرها وتطلب منيها السماح
أمي ست طيبة ودموعها قريبة ، أول ما خالتي ومُصطفي دقوا باب الدار وشافهم زين وقال ياما خالتي هنه
خرچت أمي تستقبلها وكنها نسيت كل حاچه
دخلتهم وعملت أميرة الشاي وچابته وخالتي حلفت ما تشرب حتي الماي ف دارنا غير أما امي تسامحها
سقطت دموعهم وحضنتها خالتي وقالتلها ساعة شيطان يا خيتي الله لا يعيدها ، بالله تسامحيني

...... : اللي بيسامح العباد ربنا ، مسمحاكي يا خيتي ربنا ما يدخل الشيطان بيناتنا تاني

مسحوا دموعهم وقعدوا شربوا الشاي حتي مُصطفي كان هيبكي وقالهم بكفياكم بكي بكيتونا وياكم ، المسامح كريم يا خالتي وانتي طول عمرك كريمه
____________________
عدت شهور بعد چوازي من مأمون وسمعنا ان مرت مُصطفي واد خالتي حامل وربنا چبر بخاطره وعطاه واد وسماه صابر لان چاله بعد شوقه وصبر سنين طوال وكمان اخته اماني اتچوزت والصغيرة اتخطبت من المهندس أحمد ابن المقاول ، شاب طيب وزين وشاطر وهيبني مستشفيات وبيوت وله اسم كبير كد الدنيا هيا تستاهل كل خير الوحيدة التي وقفت چاري وچار امي وشهدت شهادة حق وحتي اخوه ياسين اتچوز بت عمه عبير ما هو كان عينه منيها من زمان والكل كان عارف أكده بس كانت صغيرة وهو استناها سنتين لحد اما كبرت واتچوزها وهيا دلوك حامل هيا كمان وقربت تولد ويشرفهم ولي العهد
وخالي ربنا فتحها عليه ورزقه زاد بعد ما چاله اسماعيل قدم الخير
أما بقي ( علي ) اللي الكل كان فاكر ان عينه مني آني  كان عينه من البت شمس اللي ساكنة بعد دارنا بكام دار وكنا هنلعبوا مع بعض واحنا صغار ، ( علي ) كان طول عمره بيعاملني كنه اخته لان امه چالها مرض وحش بعد ما ولدته والدكاتره قالولها مش هتچيبي عيال تاني وعملت عملية كبيرة ومنعتها من الخلفة تاني ، اما خلص الدبلوم اشتغل ويا ابوه ووضب البيت بتاعهم ودهن اوضته واتچوز فيها لچل يكون چار ابوه وامه ومرته تخدمهم ف كبرهم والحمد لله البنيه غلباته وراضيه بقليله وربنا لچل خاطرها رزقه من وسع بعد ما اتچوزها بكام شهر حملت ف اول عيل وجاله واحد من صحابه كان متغرب من زمان واما رچع كان بيشتغل في بيع المباني الچديدة بحري البلد وأخد علي يشتغل وياه وكانت فتحت الخير عليه وشمس صاحبتي وبتحبني من زمان فحكتلي انه وعدها راح يبنيلها بيت چديد وهيكتبه بإسمها لانها مراعيه امه وابوه ومش مأخره عليهم طلب وهما بيحبوها وفرحانين انها عايشه وسطيهم

وآني الحمد لله عدت عليَّ سنين الدراسة الباقية بتفوق وبقيت معيدة في الچامعة وحملت وچبت واد سميته رزق لچل احفظ بإسمه رزق رب العالمين
مأمون حبيبي اتحدت وياي وبدأ يشچعني احضر الداكتوراه ، كنت ف لاول مكسله بسبب الحمل والولادة لكن بعد ما شچعني ، بدأت في الاچراءات وبدأت في المذاكرة للماچستير ودعواتكم وياي ان شاء الله اخلصه واكمل لحد الداكتوراه

وبكده تكون تمت حكايتي بس آني لسه مكمله حياتي
انشاله يارب تكون قصتي عچبتكم رغم الحزن الشديد اللي عديت بيه بس رضا ربما ورزقه كتير والحمد لله وعوضه مفيش احسن منيه وآخرة الصبر خير وانتظروني في الچديد بإذن الله
متنسونيش بالدعوات
#تمت