بقلم نورسين محمد
الفصل الثامن
في بيت كريمه
مع بدايه الاجازه الصيفيه
محمد : بقولك اييه يا ماما .. في موضوع انا كنت مأجل الكلام فيه بس جيه الوقت اللي لازم نتكلم فيه
كريمه : خير يا حبيبي .. قلقلتني .. انت محتاج حاجه ؟؟
محمد : لأ يا ماما انا الحمد لله مش محتاج حاجه .. بس احنا لازم نرجع القاهره تاني .. احنا بقالنا هنا تلات سنين وكفايه بقاا لازم نرجع نكمل حياتنا مكان ما اتولدنا . لازم آخد الثانويه العامه من القاهره .. انا طول عمري بحلم اني اكمل دراستي في جامعه القاهره ولو كملت هنا الثانويه يبقاا هدخل الجامعه هنا وانا مش حابب اكمل هنا
كريمه : طيب ازاي بس يا ابني هنرجع القاهره انت عارف ان ابوك اخد البيت اللي كنا عايشين فيه .. هنرجع ونعيش فين ؟؟
محمد : عادي يا ماما نأجر شقه صغيره في اي حته وانتي كده كده بتشتغلي ولو أجرنا شقه في مكان شعبي اكتر من اللي كنا عايشين فيه هيبقاا الايجار صغير بس نرجع يا ماما .. انا مش قادر اعيش هنا
كريمه : طيب خلاص يا ابني اللي تحبه انا هعمله .. انا المهم عندي مصلحتك انت واخواتك .. نرجع ونعيش واللي خلقنا مش هينسانا .. بس احنا لازم ننزل القاهره ندور علي شقه
محمد : انا هنزل ادور و اول لما ألاقي نسافر تتفرجوا عليها ونكتب العقد لو عجبتكم .. انتي خليكي هنا كملي شغلك ومتعطليش نفسك علشان كمان تبلغي الناس انك مش هتآخدي شغل جديد
كريمه : بس انت هتعرف تسافر وتدور لوحدك ؟؟
محمد : متقلقيش يا ماما انا كبرت خلاص
وصباح اليوم الجديد .. سافر مجمد للقاهره وبدأ رحلة البحث عن شقه صغيره إلي ان وجد شقه في منطقه شعبيه عباره عن غرفتين وصاله .. اتصل بكريمه واخبرها .. وقبل ان يعود توجه للمنطقه التي يوجد بها ورشة سعيد .. ومن بعيد إطمأن عليه وشاهده وهو يقوم بعمله دون ان يراه سعيد وتوجه نحو احد الجيران يدعي احمد وسلم عليه وسأله عن والده وحاله بعد ان انفصل عن والدته
احمد : والله يا محمد يا ابني اللي اعرفه انه كان متجوز من زمان ومن قبل ما يطلق والدتك واللي حكالي الكلام ده .. الصبي بتاعه بس هو مشي دلوقت كنت هأكدلك الكلام وكمان قالي انه اشترالها شقه جديده واتنقلوا من البيت القديم
محمد : طيب كتر خيرك .. ياريت متقولش اني سألت عليه وانا كل فتره هبقاا آجي اطمن عليه منك .. انا رجعت القاهره تاني انا واخواتي
احمد : والله يا محمد فيك الخير .. ماشي هستناك و متقلقش انا مش هحكيله حاجه
ألقي محمد عليه السلام وعاد للشرقيه
محمد : يا جماعه الشقه صغيره قبل ما نسافر نشوفها علشان تبقوا علي نور قبل ما نسافر بس احنا اللي عاوزين نرجع القاهره فلازم نستحمل شويه علشان المصاريف .. ماشي
كريمه : ماشي .. الامر لله انتوا اللي عاوزين
ملك : مش مهم ضيقه او واسعه بس نرجع ونكمل دراستنا هناك احسن واما ربنا يفرجها نبقاا نتنقل
وفي صباح اليوم الجديد
توجهوا للقاهره ليشاهدوا الشقه الجديده
كريمه : عجباك يا محمد ؟؟
محمد : اه .. حلوه يا ماما مؤقتاً
كريمه تتوجه للسمسار : علي بركة الله .. عاوزين نكتب العقد .. بس انا عاوزه اطول مده
السمسار : اطول مده خمس سنين واما يخلصوا ان شاء الله نجدد بعقد جديد وممكن الايجار يزيد شويه
كريمه : ماشي ان شاء الله .. ربنا يديك ويديناا طول العمر ونخلص الخمس سنين الاولي
كتبوا العقد وعادوا للشرقيه وبعد اسبوعين انتقلوا للقاهره مره اخري
ملك : اخيراً رجعنا تاني
ملوك : مع ان المنطقه مش حلوه اوي بس امرنا لله هنستحمل وخلاص
محمد : انا من بكره ان شاء الله هروح المدرسه علشان أسأل عن النقل قبل دخول الدراسه
وفي صباح اليوم الجديد توجه محمد للمدرسه الثانويه ليسأل عن اجراءات النقل وبعد ان انتهي توجه للمدرسه الاعداديه للبنات ثم عاد للبيت
محمد : الاجراءات سهله مفيش مشاكل .. هنسحب الورق من المدارس في الشرقيه ومن المدرسه الجديده هنشتري ملفات ونتصور صور حديثه ونرفق وصل كهرباا بالملف ونقدمه وبس كده وانا سألت علي الاماكن قالوا ان في مكان عندهم فاضي ان شاء الله
كريمه : ماشي يا ابني .. الله المستعان .. احنا الاسبوع اللي جاي ان شاء الله نسافر نسحب الورق وتتصوروا ونجهز الملفات ونقدمها علي طول
تعرفت كريمه علي جيرانها في البيت الجديد وعرفوا منها انها منفصله وتشتغل بالخياطه حتي تكفي حاجاتها وحاجات اولادها ..
مرت الايام سريعاً ومع بداية الاسبوع الجديد سافر محمد مع كريمه لسحب الملفات من المدرسه وعادوا بها للقاهره وفي صباح اليوم الجديد توجهوا للمدارس الجديده وقدموا الملفات وهدأ بالهم اخيراً
في اثناء الاجازه كثير من جيران كريمه قد اتفقوا معها علي تفصيل ملابس جديده .. كريمه كانت حريصه ان تدخر كل ما يتوفر معها حتي تستطيع ان تكفي مصروفات السنه الدراسيه الجديده
قبل بدايه السنه الدراسيه
محمد : ماما انا مش عاوز دروس في الثانويه العامه .. انا هذاكر ف البيت وآخر السنه ان شاء الله هبقاا اروح آخد حصص المراجعه في اي سنتر وخلاص .. الموضوع مش مستحمل مصاريف .. كفايه عليكي مصاريف البنات هما كمان داخلين الاعداديه وهيحتاجوا دروس ومصاريف كتير طول السنه
كريمه : لأ .. انتوا ملكوش دعوه بالمصاريف .. انت تروح تآخد دروسك انت واخواتك وكل اللي هتحتاجوه انا هدفعه ومتقلقش من حاجه خالص انا محوشه مبلغ كويس من الشغل علشان السنه دي ..
محمد : طيب خودي كمان اللي معايا وخليه علي اللي معاكي هما مش كتير كلهم ألف جنيه حوشتهم من شغلي مع زين .. المصاريف هتبقاا كتير السنه دي انا عارف اهو اي مبلغ هيساعد معاكي
كريمه : انت تخلي فلوسك معاك وانا لو احتجت هآخد منك
محمد : يا ماما السنه مش سهله ومصاريفها هتبقاا كتير اووي عليكي
كريمه : لأ مش كتير ولا حاجه .. انا هريحك كمان .. هتكلم مع الجيران واشوف معاهم جمعيه و اقبضها علي نص السنه واحنا نصرف من الفلوس اللي انا حوشتها ومن شغلي هسدد الجمعيه واما نقبضها نكمل السنه .. هاه ارتحت كده
محمد : ماشي يا ماما .. ربنا يخليكي ليناا ويقدرني اريحك اما اخلص دراسه بس ادعيلي السنه دي تخلص علي خير
كريمه : والله يا حبيبي انا كل اللي بطلبه من ربنا انكم تنجحوا وتوصلوا للي بتتمنوه
مرت الايام وانتهت الاجازه وبدأت السنه الاصعب علي كريمه ولكنها تعافر وتحارب الدنياا حتي تصل بأولادها لبر الامان وتسهر الليالي تعمل بالخياطه حتي توفر لهم كل ما يحتاجوا إليه ولا يسألوا أحد وبعد ان مرت الشهور الاولي من الدراسه
في بيت سعيد
سوميه : بقول اييه يا سعيد
سعيد : قولي
سوميه : رشا محتاجه دروس .. البت مش ماشيه ف المدرسه والدراسه صعبه اووي .. درجاتها ذي الزفت في كل المواد
سعيد : طيب ما تخليها تذاكر اللي بتآخده في المدرسه
وهي تبقاا كويسه علشان الملاحق بتاعه كل سنه
سوميه : لأ هي بتذاكر ومش فاهمه حاجه .. لازم دروس في كل المواد
سعيد : الامر لله .. ما هي كل سنه بتآخد دروس في كل المواد وبرضو مفيش فايده .. كلمي المدرسين واحجزيلها خليها تعدي وخلاص .. هي البت شكلها ملهاش ف الدراسه اصلا .. ربنا يسترها
في بيت كريمه
محمد : يا ماما انا مضطر اروح آخد درس الكيمياء والفيزياء في السنتر اللي في المهندسين
كريمه : يا ابني انت كده هتضيع وقت كبير
محمد : يا ماما انا مضطر للأسف اني اروح السنتر البعيد لان المدرس ده ممتاز ومش بيشرح في اي مكان غير في السنتر ده
كريمه : ماشي يا ابني .. المكان اللي ترتاح فيه والمدرس اللي تفهم منه احضر معاه .. هنعمل اييه هي سنه كلها تعب وان شاء الله نخلص منها علي خير
في السنتر التعليمي .. بعد مرور عدد من الحصص وقد عُرف عن محمد تفوقه فكان محط انظار واهتمام عدد كبير من مدرسينه و زملاءه وخاصة *** يارا ***
#يتبع
