الفصل ١٠، ١١

                                                                 بقلم نورسين محمد 
      

الفصل العاشر  

 

 صمت محمد للحظات ثم نظر لوالدته متسائلا: انا عاوز ابقا دكتور يا ماما، هتقدري، أنا آسف يا ماما، أنا عارف أن دراستي وطلباتي صعبة عليكي والدراسة ف الطب مش سهلة وعاوزه مصاريف كتير، بس انا هشتغل جنب الدراسة وهساعدك في المصاريف، أنا خلاص خلصت السنة الصعبة وان شاء الله الباقي ربنا يقدرني عليه 

 - والله يا ابني لو هبيع هدومي عشان اصرف عليك انت واخواتك هعملها، لو هبيع خضار أدام البيت مش اشتغل خياطة بس انا مستعده، بس توصلوا وتحققوا اللي نفسكم فيه، ربنا موجود يا محمد قول يارب، واللي قدرنا على اللي فات يقدرنا على اللي جاي إن شاء الله، وأنا عشمي في ربنا كبير إنه هيراضيني وهيعوض صبري خير بإذن الله، انت اتوكل على الله وأما التقديم يفتح قدم على طول وخليها على الله متشيلش هم حاجه، وموضوع شغلك ده تشيله من دماغك خالص، وسيبك منه انا هتصرف وأهي بتدبر، اللي بحوشه في الأجازة على كام جمعية والدنيا هتمشي  

 

جثا محمد على ركبتيه يقبل قدم كريمة، وبكي لأول مرة أمامها داعيا لها: ربنا يخليكي لينا يا ماما واقدر اعوضك عن تعبك معايا انا والبنات. 

 استوقفته كريمة واحتضنته: انتوا آخر الصبر اللي صبرته مع ابوكم وعيشته اللي كانت أمر من الصبر، انتوا عوض ربنا اللي اكرمني بيه بعد ما ابوك بهدلني، الحمد لله ربنا اكرمني بنجاحكم وان شاء الله هنكمل مع بعض الطريق لحد أما توصلوا للي بتتمنوه. 

ضحكت ملوك: ايه كل الدموع دي يا نااااااس، ده احنا عندنا النهارده نجاح مش ميت، انا هروح اشغل الاغاني وارقص أحسن، اضحكوا وافرحوا شويه بقا زهقنا من العياط والحزن، شويه فرفشه بقى 

ملك: آه والله عندك حق 

أسرعت ملك وأدارت المشغل ورقصت بصحبة ملوك فرحا بنجاح محمد، مر النهار سريعاً وحل الليل ينشر بخيوطه السوداء هدوءا على الجميع، دخل محمد غرفته واغلق عليه الباب وأمسك الهاتف واتصل ب يارا  

- ألو انا آسف اتأخرت عليكي، بس البنات مش راضيين يسيبوني وفرحانين وبيحتفلوا ونازلين رقص من وقت ما عرفوا النتيجة لحد دلوقت  

- لأ، عادي ولا يهمك، انا كمان كل اخواتي عندي وبيحتفلوا معايا هما وأولادهم  

- انتي اخواتك كبار عنك أوي كده وكمان متجوزين وعندهم أولاد، أنا أول مرة أعرف، انتي متكلمتيش عنهم قبل كده. 

ضحكت يارا قائله: آه، انا اخواتي كبار عني جدا ومتجوزين من زمان كمان، انا آخر العنقود زي ما بيقولوا، تحب تتعرف على العائلة؟  

- اكيد ده شيء يشرفني  

- طيب انا هحكيلك عنهم وأمري لله، شوف يا سيدي... بابا الله يرحمه كان لواء في الجيش وتوفى بعد ما مسك المنصب بسبع سنين، عندي تلات أخوات رجاله وبنت وأنا اصغر واحدة فيهم وعايشه مع ماما لأن اخواتي كلهم متجوزين ومش فاضل غيري 

اكبر واحد هو  

عادل * وده لواء في الشرطة وهو مدير الامن في مطار القاهرة، متجوز وعنده ولدين وبنت (نور وزياد وبسمله) 

 

وعلاء * اخويا اللي بعده وده يا سيدي بيشتغل مهندس في شركة بترول كبيرة في السويس، متجوز وعنده بنت وولد (خلود وآسر) ومش بنشوفه غير في الأعياد والمناسبات الرسمية بحكم شغله  

وعامر * هو أصغرهم وده بقى دكتور جراح ودلوقت بيشتغل أستاذ مساعد في كلية طب القصر العيني، متجوز وعنده ثلاث بنات (آية وأميرة وأسماء)  

 

أما بقا اختي البنت هي *مكة* بعد ما اتخرجت من بكالوريوس طب الاطفال جامعة القاهرة، وهي طبعاً كانت شاطره جدااا، اتعينت في مستشفى تخصصي كدكتورة عادية في البداية وواحدة واحدة اتعرفت على دكتور مازن زميلها وبعد فترة صغيرة جدااا حبها، واتقدم لها واتجوزته وأترقت في الشغل وبقت رئيس قسم الاطفال في مستشفى الامل التخصصي ودي تبقا ملك لوالد مازن جوزها، وعندهم بنتين (تمارا وتميمة) 

 

ضحكت يارا واردفت: وبس بقا كفاية عليك كده، انت عرفت كل العيلة من غير ما تشوفهم، وانت بقا هتحكيلي ايه عن عيلتك، ادينا بنرغي  

- لأ، انا عيلتي كلها هي أمي واخواتي البنتين التوأم ملك وملوك وبس. 

- وباباك متوفي؟  

- لأ، بابا موجود بس منفصل عن والدتي من كذا سنة، احنا عايشين لوحدنا ومنعرفش عنه حاجه، بعد الانفصال احنا سافرنا الشرقية تلات سنين وقعدنا في بيت جدي ورجعنا تاني علشان الثانوية والكلية لأني مكنتش حابب أكمل دراسة هناك، زي ما قولتلك أنا نفسي أكمل في جامعة القاهرة  

- اممم، طيب خلينا في المهم، انت هتقدم على النت ولا هتعمل ايه؟  

- اه اكيد هقدم على النت احسن من الزحمة والطوابير  

- بيقولوا بعد بكره هيبدأوا أول يوم في التقديم للمرحلة الأولى، عموماً أما أعرف انهم بدأوا التقديم هكلمك علشان تقدم، ماشي؟ 

- ماشي وانا هتابع من عندي ان شاء الله، انا طولت عليكي وسهرتك كتير، تصبحي على خير وتبقي تطمنيني عليكي أما تصحي، انا مش بفتح النت كتير بس ابعتيلي وأنا أما افتح في أي وقت هشوف الرسالة

- لأ مفيش حاجه بالعكس انا مبسوطة اني سهرت معاك، تصبح على خير، وهبقا ابعتلك رسالة أول لما اصحى إن شاء الله 

 

اغلق محمد هاتفه وإذا بملوك تدخل عليه الغرفة تمازحه ضاحكة: الجميل سهران مع مين لحد دلوقت، هاه، هااه، قول وانا مش هقول لحد  

ضحك محمد: ايه يا بت الرخامة دي، مش بكلم حد ياله روح نامي  

- يا راجل طيب عيني ف عينك كده 👀👀 

ضحك محمد: اهوه 👀👀👀 ياله بقاااا روحي نامي 

ضحكت ملوك: ماشي بس مسيري هعرف  

قهقه محمد ودفعها بهدوء خارج الغرفة قائلا: ماشي هقولك بس بعدين مش دلوقت. 

- اه زي الكلية كدهون 

ضحك محمد منازحا: اه زي الكلية كدهون، يالا يا فالحة روحي نامي  

 

اغلق باب الغرفة واستلقى فوق فراشه حتى بدأت تباشير الصباح، بعد مرور يومين بدأ التقديم لدخول الكلية وقدم كل من محمد ويارا أوراقهم وفي انتظار موعد ظهور نتيجة التنسيق وتحديد المصير.  

 

في المساء اتصلت يارا هاتفياً بمحمد وبتوتر تحدثت: ألو، ازيك يا محمد، اخبارك ايه؟  

- انا بخير، انتي زعلانه من حاجه، صوتك متغير ليه؟  

- لأ انا مش زعلانه، انا خايفه من النتيجة  

- متقلقيش ان شاء الله ربنا يكتب لنا نصيب في الخير ونحقق اللي بنتمناه 

- يااااارب يا محمد  

- كلها ساعات ونعرف النتيجة، اول لما تطمني كلميني  

- حاضر ، بإذن الله  

_____ 

في بيت سعيد الذي توجه لسوميه بالحديث: 

- حامد اتصل بيا وعاوزني ادخل معاه شريك زي المرة اللي فاتت، بس المرة دي الشغل أكتر علشان قريتين وأنا مش عارف لسه هعمل أيه 

- ومالوا زيادة الخير خيرين اتوكل على الله وادخل معاه بقلب مليان  

- أما اروح اقابله بكره واشوف هو عاوز مني كام بالظبط، حضري الأكل علشان عاوز انام وأصحا بدري، عندي شغل لازم يتسلم  

- حاضر هحضره على طول  

 

تركته وتوجهت للمطبخ لتجهيز الطعام، وبعد ان تناولوا طعامهم استلقوا على فراشهم وراحوا في ثُبات عميق حتى اشرقت شمس الصباح الجديد ليستيقظ  

 سعيد وتوجه لمقابلة حامد  

حامد: شوف يا اسطى سعيد، زي ما قولتلك في التليفون، المرة اللي فاتت كانت القرية صغيرة والطلبات كانت قليلة انما المرة دي الشغل كتير علشان القريتين كبار وطلباتهم كتير  

- طيب وايه المطلوب مني؟  

- عادي احنا هنبدأ الشغل ولو احتاجنا حاجه ايدي على ايدك ونكمل مع بعض ورزقي ورزقك على الله، ايه رأيك؟  

- بس لربما نبدأ الشغل والفلوس تقصر معانا ومنقدرش نكمل الشغل  

- لأ إن شاء الله احنا نبدأ بالمقدم اللي هيدفعوه ولو قصرت معانا الفلوس ومكنش معانا نكمل نبقا نطلب منهم  

- خلاص لو كده انا موافق 

- على البركة 

__ 

مر الاربع أيام المتبقية وظهرت نتيجة التنسيق  

محمد تفحص الانترنت واستكشف نتيجته واذا به ينادي الجميع بصوت مرتفع للجميع: يا ماماااااا، يا ملك، يا ملوك، باركولي انا دخلت طب وهبقاا دكتووووور ومن جامعة القاهرة، الحمد لله يارب استجبت لدعائي 

أطلقت كريمة الزغاريد فرحاً بالخبر وباركت له نجاحه: ألف مبروك يا حبيبي، الحمد لله يارب ربنا عوض صبري خير  

انتظر محمد اتصال يارا وقد تملك منه القلق  

ملوك لاحظت توتره فاقتربت منه لتسأله: مالك يا محمد انت قلقان كده ليه؟  

- هاه، لأ ولا قلقان ولا حاجه، انا كويس متقلقيش 

- طيب ما تحكيلي يمكن ألاقي حل معاك  

- طيب تعالي نتكلم جوا 

 

 وتوجهوا لغرفة محمد لتبدأ ملوك بالحديث: احكي بقا يا عم وخلص  

- ملوك هحكيلك بس اوعديني الكلام اللي هتسمعيه محدش يعرفه ولو عرفت أن أي كلمة خرجت لحد هتبقا آخر مرة احكيلك فيها أي حاجه ماشي؟ 

#يتبع 

#نوري

الفصل الحادي عشر  

ملوك : خلاص ماشي وعد مش هيخرج لحد بس احكي 

محمد : ماشي هحكي .. انا معجب بواحده زميلتي من اول ما شوفتها واتعرفت عليها في السنتر وكنت بساعدها في المذاكره من غير ما حد يعرف لحد اما السنه خلصت ونجحت الحمد لله .. بس انا مقولتلهاش حاجه ومش هقول غير اما ألاقي الوقت المناسب 

ملوك : طيب حلو جداا .. اييه اللي قلقك بقاا ؟؟ 

محمد : اللي قالقني انها قدمت في المرحله الاولي معايا وكان المفروض انها تتصل بياا تطمني علي نتيجة التنسيق ولحد دلوقت متصلتش وانا مش متعود اني اتصل بيها في النهار كده يعني هي اللي بتتصل بياا وقت ما ظروفها بتسمح 

ملوك : طيب ما يمكن ظروفها مسمحتش وبعد شويه هتتصل بيك .. او ممكن يكون عندهم حد ف البيت مثلا 

محمد : لأ .. كان المفروض هتتصل بياا تطمني علي النتيجه بتاعة التنسيق 

ملوك : طيب انا هساعدك .. اييه رأيك ؟؟ 
محمد : هتساعديني ازاي يا فالحه ؟؟ 

ملوك : بص انت تتصل بيها وانا اكلمها علي اني واحده صاحبتها ونطمن عليها بس كده .. سهله 

محمد تردد في البدايه ولكن لكي يطمأن قلبه وافق :  طيب بس خلي بالك علشان منعملهاش مشاكل

ملوك : متخافش .. انت بس اتصل بيها 
محمد : طيب .. ربنا يستر 

واتصل محمد بيارا واعطي التليفون لملوك 
ألو : ازيك يا يارا .. عامله اييه ؟؟ 

يارا : الحمد لله بخير .. مين معايا ؟؟ 

ملوك : في حد جنبك .. انا ملوك اخت محمد 

ابتعدت يارا إلي ان دخلت غرفتها واغلقت عليها الباب 
ألو .. انا معاكي ازيك يا ملوك 
ملوك : انا بخير الحمد لله .. انتي عرفاني ؟؟ 

يارا : اه ..اكيد عرفاكي .. محمد حكالي عنك انتي وملك  .. انا مفيش حد جنبي .. هو محمد فين ؟؟ 

ملوك : محمد معاكي .. واعطته التليفون .. اي خدمه 😍😍 انت تؤمر يا قمر .. وقبل ان تخرج من الغرفه .. ضحكت ثم قالت له .. عد الجمايل هههههه

محمد : ماشي بس روحي ونبقاا نعد بعدين واقفلي الباب وراكي .. ثم تكلم مع يارا .. انتي فين طول اليوم وليه متصلتيش تطمنيني علي النتيجه ؟؟ 

يارا : لا مفيش حاجه انا بس متضايقه شويه 

محمد : متضايقه من اييه .. مالك مين زعلك ؟؟ 

يارا : التنسيق جالي ألسن جامعة إلمنيا ولازم اسافر أسأل علي التحويل ولو مفيش تحويل لازم آخد اول سنه في إلمنياا واجيب تقدير علشان اقدر احول لجامعه عين شمس و لسه مش عارفه هعمل اييه 😭😭

محمد : طيب الاول أسألي يمكن في تحويل متضايقيش نفسك .. اقولك انا .. اييه رأيك نتقابل بكره ونروح جامعه عين شمس مع بعض ونسأل علي اجراءات التحويل ؟؟ انا هروح معاكي 

يارا : خلاص ماشي ان شاء الله .. هقول لماما وهبعتلك رساله بعد شويه بالوقت اللي هنزل فيه .. ماشي ؟؟

محمد : ماشي هستناكي .. متتأخريش علياا 
يارا : لأ هروح اقولها علي طول دلوقت .. سلام 

واغلقت هاتفها و توجهت لدولت والدتها 
(والدة يارا سيدة علي قدر كبير جداا من الثقافه .. سيدة من سيدات المجتمع الراقي .. لها العديد من النشاطات المجتمعيه المختلفه .. تهتم كثيراً بالمظاهر و تريد ان تزوج ابنتها من يليق بها ويليق بأسرتها ومن تضمن لها معه حياه لا تقل عن حياتها في بيت والدها )

يارا : ماما انا هنزل بكره مع اصحابي هروح جامعه عين شمس أسأل علي التحويل 

دولت :  اتصلي بمكه تروح معاكي 
يارا : يا ماما مكه عندها شغل وانا مش عاوزه اعطلها معايا .. انا هروح مع اصحابي 
دولت : ماشي .. خلي السواق يوصلك 
يارا : لأ مش ضروري هروح مع اصحابي علشان هيستنوني عند المترو ..اسهل من العربيه 
 دولت : انتي غاويه تعب .. براحتك روحي بالطريقة اللي تريحك
عادت يارا لغرفتها مره اخري وارسلت لمحمد رساله محتواها 
( هستناك بكره الساعه ١٠ الصبح عند محطة المترو )
محمد رد كتابياً : ان شاء الله ١٠ بالظبط هتلاقيني مستنيكي .. سلام 

في الصباح بيت سعيد
سوميه : ياله الفطار جاهز يا سعيد 
سعيد : ماشي .. انا جاي 
واثناء تناولهم الفطار 
رشا : بابا .. انا عاوزه عروسه جديده 
سعيد : وعروستك فين ؟؟ 
رشا : اتكسرت وعاوزه واحده جديده 
سعيد : حاضر هخلي ماما تنزل تشتريلك غيرها 
سوميه : طيب بالمره بقاا اديني الفلوس عشان نشتري الهدوم الصيفي 
سعيد : امرنا لله .. انزلي هاتيلهم اللي هما عاوزينه 
سوميه : ربنا يخليك ليهم 

في العاشره صباحاً 
محمد ويارا في محطة المترو .. وبعد دقائق وصلوا للجامعه 
محمد : تعالي نطلع نسأل في شئون الطلبه 
يارا : ماشي 

محمد للموظف : صباح الخير .. من فضلك عاوز أسأل عن التحويل من ألسن جامعه إلمنيا لألسن جامعه عين شمس .. اييه الاجراءات والاوراق المطلوبه ؟؟ 

الموظف : المجموع كام بالظبط ؟؟ 
محمد : 97%

الموظف : ألسن جامعه عين شمس مجموع الالتحاق بيها 98% انتظام ولو حولت من جامعه إلمنياا هتبقاا هنا إنتساب ودي الاوراق المطلوبه 
( اعطي الموظف ورقه مطبوعه بالاوراق المطلوبه للتحويل )

محمد : شكراً 
توجه محمد ليارا .. ياله بيناا .. هاه اييه رأيه ؟؟ هتحولي هنا انتساب احسن ما تروحي إلمنياا ؟؟

يارا : انت اييه رأيك ؟؟ 
محمد : لو علي رأيي انا .. حولي احسن انتساب وخليكي هنا جنبي .. اقصد جنب اهلك بدل ما تتبهدلي وانتي لوحدك والدراسه في الشتاا وممكن تتعبي او تحتاجي اي حاجه في اي وقت يبقوا هما جنبك 

يارا : عندك حق .. انا هعمل كده .. هات الورقه دي وانا هجهز الاوراق وهسافر من بكره ان شاء الله وهحول الورق 

محمد : تحبي آجي معاكي ؟؟ 
يارا : لا .. انا متشكره جداا انا تعبتك معايا .. ماما هتسافر معايا او ابيه عادل هيبعت معايا حد من عنده علشان نخلص بسرعه 

محمد :طيب هستناكي تطمنيني .. ماشي
يارا : حاضر ان شاء الله هطمنك 

عادت يارا لبيتها وحكت لوالدتها عما توصلت إليه  واتفقتوا علي انهم سوف يسافروا في صباح اليوم التالي لنقل الاوراق 
وبالفعل سافروا ولكن الموظف المسئول قال لهم ان الاوراق لم تأت للكليه بعد و انها سوف تتواجد في الكليه الاسبوع القادم وان عليهم العوده لنقل الاوراق بعد اسبوع 

عادت يارا للقاهره واتصلت وابلغت محمد ما حدث معها 

اما عن سعيد فيواصل عمله يومياً كما اعتاد حتي يستطيع هو وحامد الوفاء بالميعاد المحدد لتسليم القطع المشغوله في موعدها .. اما سوميه فلم تكف عن الطلبات 
في بيت سعيد 
سوميه بدلع وهي تتمايل علي سعيد : بقول اييه يا ابو البنات
 سعيد : قولي يا ست الكل 
سوميه  :  احنا عاوزين نغير التليفزيون ده 
سعيد : ماله طيب .. ما هو كويس وشغال اهو ؟؟ 
سوميه : لأ صغير علي الشقه عاوزين واحد اكبر شويه او شاشه كبيره
سعيد : الامر لله ماشي اما اخلص الشغل الجديد ونسلمه واقبض هغيرلك التليفزيون .. اي طلبات تاني ؟؟ 
سوميه : ربنا يخليك ليناا 

مرت الايام سريعاً وانتهي الاسبوع وسافرت يارا مع والدتها للمره الثانيه لنقل اوراقها من جامعة إلمنيا إلي جامعه عين شمس وقد انتهت اجراءات النقل في تلك المره وعادت للقاهره وهاتفت محمد وطمأنته 

بعد مرور عدة شهور انهي سعيد عمله وقام بتسليمه وقابل حامد وقاموا بتقسيم الارباح معاً 

بدأت السنه الدراسيه الجديده وقد استقر الجميع في مكانه 
وبعد ان انهي محمد اول يوم دراسه .. اتصل بيارا 
ازيك يا رورو .. عامله اييه ؟؟ 
يارا : 😍😍 محمد .. اخبارك اييه ؟؟ انا بخير الحمد لله  
حاسه اني غريبه ووحيده هنا .. اصحابي اللي دخلوا معايا للأسف انتظام ومواعيد محاضراتهم مختلفه عن مواعيدي 
محمد : طيب انتي فين دلوقت ؟؟ 
يارا : انا في الكليه لسه مرجعتش البيت 
محمد : طيب اييه رأيك نفطر مع بعض انا هجيلك دلوقت 
يارا بفرحه : بجد هتيجي .. هستناك 
محمد : مش هتأخر عليكي
#يتبع