بقلم نورسين محمد
الفصل الحادي عشر
أحمد : انتي اتأخرتي ليه يا زينه أكده ؟؟
قلقتيني عليكي
زينه : آني كنت متضايقة ومكنتش هآچي النهاردة الچامعة
أحمد : ليه ، مين زعلك ، حد قالك كلمة ضايقتك ؟؟
زينه : أبوي عاوز يچوزني واد عمي بالعافية وبيقولي ظروفه حلوة وهتعيشي معاه كويس
أحمد : آاااااه ، قولتيلي ، طيب وعملتي إيه معاهم ؟؟
زينه : معملتش حاچه قولت لأبوي أما اخلص الچامعة يبقي يحلها الحلال ، انما دلوقت لاه
رفضت كالعادة بس هو لسه بيزن وانا خايفة أبويا يوافق عليه ويچوزني بالعافية
أحمد : انتي عارفه ان لو بإيدي حاچه دلوقت هتقدملك ومش هستني بس مش عارف اعمل إيه ، انا كمان مرعوب مش خايف بس ، مرعوب اصحي من النوم علي خبر انك اتخطبتي لواحد تاني ، ربنا يسترها لحد أما نخلص الكام شهر اللي ناقصين علي الچامعة
زينه : إن شاء الله ربنا يسترها ، انا كمان برفض اي كلام في الموضوع ديه لحد أما اخلص الدراسة
أحمد : خير إن شاء الله ، تعالي نطلع المحاضرة خلاص فاضل عشر دقايق والداكتور هيقفل الباب
بعد إنتهاء المحاضرات اليومية ، استأذنت زينه في الإنصراف
زينه : أنا همشي علشان أبويا ف البيت ولو اتأخرت هيعمل مشكله معايا ، مش هقدر اقعد معاك النهارده ، بس بكره ان شاء الله نقعد مع بعض شويه بعد المحاضرات مش هيكون حد مستنيني چنب الساعة
أحمد : ماشي ، ارچعي البيت علشان ميتخانقش معاكي ، بالليل كلميني لو عرفتي وطمنيني عليكي ، سلام
زينه : حاضر إن شاء الله ، سلام
أنصرفت زينه وعاد أحمد ليقابل هشام
أحمد : آني عاوز اتحدت وياك ف موضوع مهم يا هشام ، ما تآچي نروح نشربوا حاچه ونحكي براحتنا
هشام : طيب ماشي ، تعالي نروح نقعد في الكافيتريا
ذهبوا معـًا وطلبوا من النادل كوبين من الشاي
هشام : خير يا أحمد محتاچ حاچه ؟؟
أحمد : لأ مش محتاچ حاچه ، بس آني عاوز أحكي معاك في موضوع زينه
هشام : طيب قول آني سامعك ، مالها زينه ؟؟
احمد : أنت عارف أني هبحبها من لما دخلنا الكلية وأنا شايف إن خلاص الوقت قرب ينتهي وقربنا نخلص دراستنا
وأنا عاوز اتقدم لها ، خايف يچوزوها واد عمها غصب عشان مرتاح
هشام : طيب يا صاحبي الوقت دلوك بقي ضيق ولازم تنتظر أما تخلص دراسة علشان محدش يتحدت وياك ويقولك انت لسه تلميذ وابوك بيصرف عليك
احمد : يعني انت شايف اكده يا هشام ؟؟
هشام : والله هو ديه الرأي السليم
أحمد : ماشي يا صاحبي هنتظر وربنا يسترها
_____________________
عبد الكريم : ألو ، ازيك يا بدر يا ولدي وقسمه والبنات اخبارهم إيه ؟؟
بدر : اهلاً يا عمي ، إيه النور ديه ، أتاري الدنيا نورت ، كلهم بخير الحمد لله ، خير يا عمي ان شاء الله
عبد الكريم : خير يا ولدي ان شاء الله ، هستناك بالليل بعد الشغل ف البيت
بدر : حاضر هخلص وأچيلك يا عمي
_____________________
في المساء وصل بدر لبيت عبد الكريم
بدر : السلامو عليكو يا اهل الدار ، كيفكم
غنيه : اهلاً يا ولدي ، كيفك وكيف البنات وقسمه ؟؟
بدر : بخير يا مرت عمي ، بيبوسوا يدك ، فين عمي ؟؟
غنيه : في المكتب يا ولدي ، ادخله
توجه وطرق الباب
عبد الكريم : ادخل
بدر : ازيك يا عمي ، والله قلقتني من الصبح ، خير ، في حاچه تخص الشغل ؟؟
عبد الكريم : انا بخير يا ولدي الحمد لله ، متقلقش الامر خير ، الموضوع ملهوش علاقة بالشغل ، العمده عبد التواب چالي وطلب مني اتحدت وياك انه عاوز بتك تقي لولده ياسين ، وقال ان الواد والبت زمايل ف الچامعه
بدر : ياسين واد العمده ، طيب وانت رأيك إيه يا عمي ؟؟
عبد الكريم : والله يا ولدي الواد ميتعيبش ، آني سألت عليه قبل ما ابعتلك
بدر : خلاص علي البركة ، هسأل تقي ولو وافقت هردلك خبر ، آني همشي دلوك عشان مسافر الصبح أسلم الشغل
عبد الكريم : بالسلامة يا ولدي
_____________________
عاد بدر لبيته وابلغ تقي بطلب ياسين
بدر : دلوك الرد عنديكي ، انتي تعرفيه يا بتي ؟؟
تقي : بصراحة يا بوي ، آني عرفاه من سنه أولي ومسمعتش عنه اي حاچه وحشه بالعكس محبوب من زملاته وبيساعد الكل
بدر : عمومـًا الخطوبه دلوك لو وافقتي والچواز بعد الچامعه لان هو كمان لسه سنه قدامه علي ما يخلص ، يعني بعد سنه تتچوزوا ، وتقدروا تعرفوا بعض اكتر
___________________
مرت الايام وتمت خطبة ياسين وتقي بعد موافقة عبد المجيد وبدر
ياسين : آني أسعد إنسان علي وچه الأرض ، أخيرًا بقيتي ملكي ، أقدر أشوفك واتحدت وياكي في اي وقت
تقي : بس انت ليه معرفتنيش قبل اكده انك هتتقدملي ، مش يمكن كنت رفضت ؟؟
ياسين : ما آني متقدمتش غير لما اتأكدت انك هتوافقي عليّ
تقي : وإيه اللي أكدلك بقي ؟؟
آني كمان مقولتش حاچه
ياسين : فاكرة لما تعبت وغبت عن الچامعة يومين وانتي اتصلتي بياا ، وقتها حسيت واتأكدت بكل حاچة ، من صوتك ولهفتك وخضتك عليّ وقتها قولتي كل حاچة ، قولتي اللي كنت عاوز أعرفه من غير ما تقصدي ، أنت فين وغايب ليه كانت كفايه عليّ
تقي وقد أحمر وجهها خجلاً : يعني أنت عارف من وقتها ومش راضي تعترف
ياسين : ما آني اتقدمتلك عشان اعترف يا ست البنات ، مبروك علياا حبك
احمر وجه تقي خجلاً : يباركلي في عمرك ، مبروك علي آني حبك وقلبك يا حبيبي
_________________________
مرت الايام وانتهي أحمد وهشام وزينه من الدراسة
أحمد في مقابله مع والد زينه في بيته وطلب منه ان يزوجه منها
والد زينه : ولما تتچوزوا هتعيشها فين ؟؟
أحمد : هنعيشوا مع أبويا وأمي في بيتنا
والد زينه : والمهر والشبكة ؟؟
أحمد : معرفش اللي هنتفق عليه هحاول أچيبه
والد زينه : شوف يا ولدي انا عاوز لبتي بيت لحالها مش اوضه في بيت العيله ، ديه حقها ومهرها مائة ألف چنيه والشبكة مائة چرام دهب
أحمد : بس ده كتير قوي يا عمي وانت عارف آني لسه متخرچ من الچامعة ، يعني هچيب كل ديه منين ، آني لو معاي مال الدنيا مش كتير عليها انما في الوقت الحالي مفيش معاي كل ديه
والد زينه : خلاص يا ولدي اللي معهوش ميلزمهوش
أحمد : استأذن آني خودلي طريق عشان اخرچ واللي فيه الخير يقدمه ربنا
رفع صوته عاليـًا : الطريق يا أهل الدار
ثم اصطحب أحمد للخارج وبعد ان انصرف عاد لزينه
والتي وجهت له سؤالها : ليه أكده يا بوي ، آني موافقه علي أحمد حتي لو هعيش معاه علي حصيره وآكلها بدوقه المهم اعيش مرتاحه
بهيه : وهي فين يا بتي الراحة دي ، الراحة في الفلوس والبيت والغيط ، اتچوزي اللي معاه يعيشك مش يفقرك چاره
زينه : ياما الفلوس مش كل حاچه ، ليه معيزينش تفهموني
والد زينه : لاه فهمينك وابن عمك طلب يدك مني وآني وافقت وأهو علي الاقل هتعيشي معاه مرتاحه وهتلاقي لقمه حلوه وهدمه كويسة وبيت ترتاحي فيه وتكوني ست الدار ، يا بتي لو اتچوزتي أحمد هتعيشي خدامه لأمه وابوه من اول يوم چواز
زبنه : بس انا معيزاهوش يا بوي انا عا.......
قاطعها والدها قائلاً : خلاص الموضوع ديه انتهي وخطوبتك علي واد عمك الشهر الچاي وبعد ما يخلص البيت الچديد هنحددوا معاه معاد الچواز
انصرفت زينه من أمام والدها وصعدت لسطح البيت واتصلت بأحمد
أحمد : مالك يا زينه هتبكي ليه ؟؟
زبنه : أبوي عاوز يچوزني واد عمي بالعافية
أحمد : هعمل اللي أقدر عليه عشانك ، ربنا يختارلنا الاصلح ، انهي معها الاتصال وقام بالأتصال بهشام وطلب مقابلته
أحمد : ألو انت فين دلوكت يا هشام ؟؟
هشام : أيوه يا أحمد ، آني كنت في الشغل مع بوي ولسه راچع ، مالك في حاچه في صوتك مش مريحاني
أحمد : طيب هتقدر تقابلني دلوك ولا لاه ؟؟
هشام : ماشي روح علي القهوه وانا هچيلك ولا اقولك خليها في مكانا أحسن عشان نبقي براحتنا
أحمد : ماشي بس متتأخرش عليّ
هشام : لاه علي طول هنزل أهه
انهي المكالمة و أسرع هشام يبدل ملابسه وتوجَّه لمقابلة أحمد وبعد حوالي ربع ساعه تقابلوا في مكانهم
هشام : قلقتني يا أحمد ، في إيه ، خير ؟؟
أحمد : روحت قابلت أبو زينه عشان اخطبها وابوها رفضني يا هشام
هشام : ورفضك ليه ، ديه أنت حتي متعلم ومعاك شهادة ذي بته
احمد : لاه هو متكلمش ع الشهادة ، اتكلم ع الدار والمهر والشبكة
قال انه عاوز لها دار لحالها وشبكة كبيره ده غير المهر ، طلب مائة ألف چنيه مهر ، آني معرفش هچيب كل ديه منين
هشام : وهو مخبرش إنك لسه مخلص علام ؟؟
احمد : قولتله أكده وقالي اللي معهوش ميلزموش
وانا معييش يا هشام اللي يقضي طلباتهم ولازم اتصرف
هشام : هتتصرف هتعمل إيه يعني ، هتسرق ولا تنهب ، ده راچل طماع معوزش راحة بته ، بيدور ع الفلوس وبس
احمد : لاه ولا هسرق ولا هنهب انما فكرت أسافر اي بلد اشتغل فيها واچيب اللي يقضي طلباتهم ، آني بحب زينه يا هشام ومشيفش حياتي من غيرها ، كلمتني وهي هتبكي وقالتلي أبوي هيچوزني واد عمي ، دموعها قتلتني
هشام : تسافر فين ياك اتچنيت يا واد ، وامك وابوك هتسيبهم وحدهم ف كبرهم ؟؟
احمد : كلها سنه وهرچع علي طول
هشام : طيب بلاش تآخد قرارات وانت متضايق أكده ، خلينا نتكلموا في اي وقت تاني تكون هديت شوي وفكرت تاني ، موضوع الغربة مش سهل يا خوي ، الغربة كربة ذي ما بيقولوا ، قوم بينا نرچعوا وربنا يكتب الخير
عاد هشام واغلق عليه غرفته ، يشعر بالحزن علي حال صديقه فأخرج اوراقه وكتب كلمات عبر بها عما يجول في داخله
غفير القصر مش هيهددك بالسر
هتفضل طور ف ساقية غربتك بتدور محلك سر
سنين عمرك هتفرك تحت عقب الباب
وتصحي فجأه فتلاقي أن شعرك شاب
هتحن لزمان فايت
طعم الفرحة مهما بيحلا ف الغربه .. طبيخ بايت
ووچع الغربه ذي الدبش
يا واد اللي مضاقش الغربة .. متأدبش
انا الهربان من الخولي ومن غفري
انا اللي بنام علي عرقي وعلي عفري
غريب ومعاه چواز سفري
ومش عاچبه
انا المصري اللي علمته بقي بيرفعلي في حواچبه
أنا المصري اللي علم أمتين تقرأ
بقيت واقف طابور بالدور عشان اختم ورق هچره
#يتبع
