يوميات مهندس مشاكس
بقلم تامر راغب
" الاتصال "
"الاسماء بالاسفل طبعا غير حقيقيه "
كنت بلبس هدومي علشان نازل مشوار ، ورن موبايلي برقم غريب .
طبعا اول ما موبايلي بيرن مراتي بتضرب بعينها كالعاده علشان تشوف مين المتصل .
" اهو قدري حعترض يعني "
المهم مسكت الموبايل ورديت .
انا : الو .
هو : استاذ تامر راغب معايا ؟
انا : ايوه انا معاك ، مين حضرتك ؟
هو : قباني مع حضرتك .
انا : اهلا بيك اتفضل .
هو : بكلم حضرتك بخصوص الاوردر الخاص بمدام حضرتك الاستاذه سهام السيد .
انا : مين ده ، لا يافندم ده مش اسم المدام .
" مراتي في ثواني لقيتها لازقه جمبي تسمع المكالمه "
هو : ازاي حضرتك ؟
انا : هو ايه اللي ازاي ياجدع انت 😤
هو : مش حضرتك الاستاذ تامر راغب ؟
انا : ايوه انا المدعو تامر راغب .
هو : مش حضرتك ساكن في مدينه نصر ؟
انا : ايوه ساكن في مدينه نصر .
هو : طيب يافندم يبقي صح ، الاوردر خاص بمدام حضرتك الاستاذه سهام .
انا : ياجدع انت هو ايه اللي صح ، هو علشان ساكن في مدينه نصر واسمي تامر راغب يبقي اسم مراتي يبقي سهام 😡 ، وبعدين هو انا لو عامل اوردر
انكر ليه ؟
هو : يبقي اكيد في غلط حضرتك ، شكرا ليك .
انا : العفو .
خلصت المكالمه وبصيت لمراتي قولتلها ، طلع غلطان .
مراتي : اممم ماشي .
ثواني ونفس الرقم بيرن تاني ، يادي النيله اليوم مش عايز يعدي علي خير .
انا : الو .
هو : قباني مع حضرتك تاني يافندم .
انا : خيييير ، مش انت لسه قافل معايا حالا .
هو : بعتذر لحضرتك انا لخبطت بين اوردر تاني لوحده اسمها مدام سهام ، لكن حضرتك طالب زياره لصيانه الانتريه ، صح كده ؟
انا : بنفس عميق ، ايوه انا طالب زياره للصيانه فعلا .
هو : ساعه كده والفني بكون عند حضرتك .
انا : ببص لمراتي وكلي ثقه قائلا : حيبعتوا الفني في خلال ساعه .
رساله الي قباني : ياريت تاخدوا بالكم وانتم بتتصلوا بالعملاء ، علشان الاتصال ميبقاش فيه خراب بيوت .
الحمد لله ربنا ستر 🤲
اسعد الله اوقاتكم
دامت الابتسامه علي وجوهكم 😂
ودمتم بخير 👋
ليست هناك تعليقات