ابحث عن حل

                      بقلم نورسين محمد 


في المساء اجتمعت الصديقات الست كما تعودن كل خميس من كل اسبوع في السابعة مساءًا وكعادتهن يناقشن فيما بينهن إحدي الموضوعات ولكن هذه المرة اختلف الوضع وكان محور الحديث هو مشكلة تعرضت لها احداهن وقامت بعرض المشكلة عليهن وطلبت منهن الرأي 
سهر : انا عارفة انكم رغم اننا صديقات ومن زمان بس ممكن تضايقوا مني وممكن تعارضوني بس انا مليش غيركم اقدر اتكلم معاه وتنصحوتي اعمل ايه ، يمكن انا عارفه اني غلطانه في بعض التصرفات بس في نفس الوقت ده بيكون غصب عني 

 بريهان : طيب قولي الحكاية وخلينا نسمع منك الاول وسبينا نحكم يمكن متكونيش غلطانه ليه بتحكمي علي نفسك 

ياسمين : انا كمان شايفه ان بريهان عندها حق وكلامها صح ، احكي الاول وسبينا نحكم ونقول رأينا 

سهر : ماشي هحكي ، طبعا كلكم عارفين اني متجوزة من زمان وجوزي بيحبني جدا وطبعا انتوا عارفين ان ربنا اكرمني بياسين ويُسر بس المشكلة في جوزي ان اهتمامه بيا غير اللي انا دايما بتمناها ، انتوا عارفين ان جوزي راجل عسكري كل حياته ظبط وربط ، حياة جافة قليلة المشاعر ، بيسافر كتير وبيقعد بعيد عني فترات طويلة جدا ، عنده صاحبه صديق طفولته ومتربي معاه لان والدته اتوفت وهيا بتولده فكانت والدة جوزي بتهتم بيه وبتربيه مع جدته ، المهم كان ساكن قريب مننا جدا بعد ما اتجوز وانا اللي اخترتله العروسة كمان وبحبها والله وبعاملها زي اختي ، المهم صديقه آسر كان هو اللي بييجي يسأل عليا انا والولاد دايما وبيلبي طلباتنا طول ما محمود مسافر هو بيعتبرني اخت ليه لكن يمكن الغلط عندي انا ان بسبب قلة اهتمام جوزي بيا اتغيرت مشاعري بدون ما اشعر واتحولت لآسر اللي دايما متواجد ودايما بيسأل ودايما بيهتم علي عكس محمود ، أنا عارفه ان آسر بيحب مراته وهيا الحقيقة تتحب انسانه جميلة في كل حاجه شكل وصفات ومعامله بس بقيت تلقائيا اول ما اشوفهم مع بعض واشوف معاملته ليها وحنيته عليها احس بغيره ، طول الفترة اللي فاتت انا مخبية مشاعري جوايا ومحدش ابدا يعرف حاجه بس اوقات من كتر غيرتي منها اني اقلدها في اللبس وطريقة الكلام كنت معتقدة ان آسر يحس بيا ويبادلني حتي لو شيء بسيط بس كل محاولاتي فشلت وهو ولا كان هنا ، كانت مراته هيا كل شيء في حياته ، بدأت اتخانق معاه لو اتأخر عن السؤال عني وكأنه فرض عليه ، بس كل ده غصب عني ومن غير ما اشعر كنت بحس اني زي المجنونه اللي فاقدة عقلها عاوزه اكسر الدنيا او اصرخ او اعمل اي حاجه لحد اما اسمع صوته ارجع اهدي تاني ، المهم شويه شويه بدأت اكون سبب في اني اعمل مشاكل بينه وبين مراته لحد اما هيا في النهايه حست بس عملت نفسها مش مهتمه لانها واثقه في جوزها وقلبه انه مفيش غيرها جواه لانها شايفه انه مش بيهتم ولا بيتأثر بأي حاجه انا بعملها لانه مش شايفني غير بس اخته ، انا عارفه ان كل ده غلط ونفسي اخرجه من قلبي بدأت اكره نفسي لاني بتمني انه يكره مراته ويهتم بيا انا ويرجع زي ما كان قبل جوازه يقضي اغلب الوقت عندنا بس وقتها انا مكنتش بحس بأي مشاعر تجاهه مش عارفه ليه دلوقت الحال اتغير يمكن احساسي بالغيرة من مراته وانه علي طول بيحبها وبيدلعها وعلي طول معاها ومش بيفارقها وبقارن بينه وبين جوزي انا حاسه بتعب جوايا مش قادره اخلص منه ، خايفه علي بيتي يتخرب بإيدي وخايفه من اي تصرف اعمله غصب عني قدام جوزي وتبقي نهايتي علي ايده ، دايما بحاول أشغل نفسي مع الولاد واتوجه لربي بالصلاة و الاستغفار بس قلة اهتمام جوزي واهماله الدايم مخليني دايما ارجع لنفس التفكير ، قولولي اعمل ايه انا فعلا تعبانه جدا 

بريهان : دلوقت احنا سمعنا وجيه دورنا في الكلام انا من رأيي انك تفكري بجوزك الي وظيفته صعبة ومحروم اكتر منك من حنانك وانه بينام ليالي طويلة مع العساكر وفي الخدمة الاربعة وعشرين ساعة لان وظيفته صعبه وانه بيتحمل البرد والجوع عشانكم وعلشان يوفرلكم احتياجاتك انتي والولاد هتلاقي نفسك بدأتي ترتاحي  وارجعي لربنا واقطعي علاقتك بصاحبه ومراته وخليها في اضيق الحدود وصفي نيتك وحبي الخير للناس عشان الله يوفقك وخليكي علي قناعه دايما ان محدش بيآخد رزق حد وان ده نصيبك و ده رزقك فأرضي بيه علشان ربنا يباركلك فيه و ده رأيي وشوفي الباقيين هيقولوا ايه يمكن انا اكون غلطانه 

ياسمين : بصي يا سهر أكبر مشكلة هي الاختلاط الزايد عن اللزوم و دي غلطة جوزك كان لازم من الاول ميسمحش بحاجه زي دي فأنا برضو من رأي بريهان لازم ترجعي لربنا وادعيه كتير انه يرجعك لصوابك وجوزك يمكن احساسك يتغير ويرجع تاني يبقي احساس بالمسئولية تجاه جوزك واولادك ووقتها اكيد مشاعرك هترجع تاني لمكانها الصحيح وهيا بيتك وولادك وجوزك  

نسمه : شوفي انا مش هتكلم وأحكم عليكي بحاجة ولا هقولك كلام يضايقك لان انتي زيك زي اي وحدة بتحب زوجها يدلعها واما يرجع من شغله يحكيلها عن يومه ده امر طبيعي بس انا هنصحك لوجه الله تعالي انتي صديقتي وانا خايفه عليكي ، ارجعي فوقي لنفسك واوعي لاي سبب من الاسباب تكوني سبب في خراب بيتك بإيدك ، لازم تتكلمي مع جوزك وتحسسيه انك مشتقاله واتصلي بيه اما يغيب عنك وقوليلوا وحشتني ، حسسيه بحبك ليه وانك محتجاله دايما ومحتاجه لوجوده وبالنسبه لآسر لازم تقطعي كلام معاه ومتطلبيش منه حاجه ابدا في غياب جوزك ، انا لو منك آخد ولادي وانزل افسحهم واوصل للسوبر ماركت اشتري حاجتي وحاجات الولاد وابقي ضربت عصفورين بحجر واحد اتفسحت انا والولاد وكمان اشتريت حاجتي من غير ما ألجأ لحد اما مراته اللي هيا زي ما بتقولي كانت صاحبتك وبتحبيها افرحيلها واتمنيلها دايما الخير وقتها هتلاقي ربنا راضي عنك وانتزع حبه من جواكي ورجعتي تحبي جوزك وتشتاقيله تاني 

ضحكت تيسير قائله : والله يا شيخه كويس ان في حد في الايام دي بيفكر في الحب والكلام ده ، ده الواحد مبقاش بيفكر غير في التنضيف والتطهير والتعقيم وامتي هنخلص وامتي هنام علشان نصحي نعقم ونطهر وهالما جرا 
ضحك الجميع عندما سمعوا حديثها ولكنها اردفت : والله مقصدتش يا سهر اقلل من الكلام اللي قولتيه ابدا ، انا بس حسيت ان الكل مشدود شويه فقولت افك بكلمتين والحمد لله اهو الكل ضحك 
المهم الله يريح قلبك وبالك ومش هكلمك عن الحلال والحرام الاكيد انك عارفه كل ده كويس بس لازم اقولك حكمي ضميرك لان انتي بتصرفاتك ممكن تهدي بيت واسرة ملهاش ذنب غير انك حبيتي رب اسرتها ، علي فكره مش انتي لوحدك اللي عندك مشاكل في كتير جدا عندهم مشاكل اكتر من كده اللي جوزها مات وعايشه مع حماتها واللي اتطلقت ومش عارفه تشوف ولادها وغيره وغيره فأنتي مازلتي عايشه في نعمه حافظي عليها علشان متزولش من بين ايديكي وحطي ولادك قصاد عينيكي 

تغريد : انا بقي هقولك وداويها بالتي كانت هي الداء.... يعني حبك ده مش حب حقيقي ده حب احتياج فقط ومعني ذلك انك عندك نقص عاطفي بصي لنفسك انك الداء ومرضك هو عدم وجود جوزك اللي وقت غيابه الشيطان زينلك حب غيره وحلاه في عينك وخلاكي تغلطي وتسلمي قلبك حتي لو بينك وبين نفسك بس لو فضلتي كده مش هتقدري تسيطري علي نفسك والغلط وارد جدا انه يخرب بيتك ، بس انتي فطرتك وداخلك مازال نضيف و ده ظاهر في احساسك بالذنب.. ف اول خطوة لازم تعمليها انك تطبقي الدين ، ربنا سبحانه وتعالي قال " واستعينوا بالصبر والصلاة علي قضاء حوائجكم " اصبري علي بعد زوجك لان ده شيء غصب عنه وامر اتفرض عليه اوعي تخسريه لاي سبب من الاسباب وتفرطي فيه لأنك هتنزلي وقتها من نظر نفسك  وبعدها من نظر جوزك وصاحبه ومرات صاحبه لو عرفوا الحقيقه والمجتمع اللي عايشين فيه مش هيرحمك ابدا  ثانيا لازم تبعدي عنه وتقطعي كل علاقتك بيه ، يعني رقم التليفون وصداقة الفيس والواتس كل ده يتمسح ومش هو بس لأ هو ومراته كمان واعتبريهم اغراب عنك و زي ما بيقول المثل البعيد عن العين بعيد عن القلب والاكيد مع الوقت هتنسيه وانا متأكدة انك مش هتغلطي ابدا وإلا مكنتيش اعترفتي دلوقت وطلبتي مساعدتنا فسبيهم واطلعي من حياتهم بحب ورضا وتسامح احسن ماتطلعي بمشاكل وفضيحة ويبقي وقتها اللي هيتكلموا هيقولوا عضت الأيد اللي كانت بتتمدلها بالخير والمساعدة وربنا يصلحلك حالك ويبعد عنك الشيطان ووقتها هتتأكدي بعد ما تبعدي انه كانت نزوه مش حب حقيقي وتحمدي ربك ألف مره انك مغلطيش واغضبتي ربنا وخسرتي بيتك وولادك وهدمتي اسرة 

ادمعت عينا سهر قائله : الحمد لله انا ارتحت جدا بعد ما اتكلمت معاكم وان شاء الله هعمل اللي قولتولي عليه وربنا يكتب الخير يارب وافتكروني في صلواتكم وادعولي دايما 
#نوري
#تمت