بقلم نورسين محمد
الفصل الرابع
انه الصباح الجديد
تستيقظ كريمه في السابعه صباحاً و ايقظت محمد و ملك وملوك وتوجهوا للمدرسه حتي يسألوا عن الاوراق المطلوبه للتحويل للمدرسه الجديده
كريمه تتحدث للمسئول عن شئون الطلبه : صباح الخير
الموظف : صباح الخير .. اتفضلوا .. طلباتكم اييه ؟؟
كريمه : الاولاد كانوا في مدرسه في القاهره ولكن حصلت ظروف واضطرينا نتنقل هنا وعاوزين نسأل علي الاوراق المطلوبه علشان النقل
الموظف : بس احنا قربنا نخلص الترم والنقل دلوقت مش هينفع .. لازم تنتظري في اجازه نص السنه وتحوليهم ويبقوا ينتظموا في المدرسه معانا مع بدايه الترم التاني ان شاء الله
كريمه : طيب وباقي الترم الاول هنعمل فيه اييه ؟؟
الموظف : والله لازم يكملوا الترم الاول في المدرسه اللي كانوا فيها وبعد نتيجه الترم الاول تسحبي الملفات وتجبيها هنا مع وصل كهرباا يثبت انك عايشه هنا
كريمه : بس ده مش هينفع يا استاذ .. بقول لحضرتك حصلت ظروف ومش هينفع ارجع القاهره تاني
الموظف : والله انتي عارفه ان دي قوانين وانا مش بإيدي اعمل حاجه
كريمه : طيب شكراً .. ياله يا ولاد
وعند خروجها من مكتب شئون الطلبه اصطدمت بالعامله زينب ..
كريمه : معلش .. مأخدتش بالي
زينب لاحظت الدموع التي تترقرق في عيون كريمه فسألتها : انتي كويسه ؟؟
كريمه : الحمد لله
زينب : طيب في حاجه مزعلاكي .. عاوزه حاجه ؟؟
كريمه : لأ ولا حاجه .. كنت بسأل علي نقل الولاد وقالولي مينفعش .. ومش عارفه اعمل اييه
زينب : طيب .. ما تدخلي تقابلي المدير .. ده راجل طيب وممكن يشوفلك حل
كريمه : ماشي .. ادخله .. هو فين مكتبه ؟؟
فأشارت لها زينب علي باب المكتب ..
كريمه : استنوني هنا يا ولاد .. انا هدخل لوحدي .. وتوجهت لمكتب المدير ثم استأذنت للدخول فسمح لها
المدير : اتفضلي .. خير ؟؟
كريمه : والله يا استاذ عندي مشكله وقالولي ان ممكن حضرتك تحلها
المدير : خير .. ان شاء الله .. ربنا ميجبش مشاكل
كريمه : ولادي كانوا في المدرسه في القاهره وعاوزه انقلهم هنا وقالولي مينفعش ولازم انتظر لاجازه نص السنه وانا مش هينفع ارجع القاهره تاني .. مليش حد هناك ولا لياا مكان اعيش فيه .. بصراحه جوزي طلقني وطردني انا وولادي وانا رجعت هنا وهعيش هنا
المدير : لا حول ولا قوة الإ بالله العلي العظيم .. صمت قليلاً ثم تابع كلامه .. طيب معندناش غير حل واحد
كريمه : اييه هو ؟؟
المدير : انتي عارفه ان الامتحانات قربت .. ف احنا بنعمل مجموعات تقويه في كل المواد ودي هتبدأ من الاسبوع اللي جاي والمدرسين هيبدأوا مراجعه المنهج من بدايته في كل المواد .. ف الحل هو ان الاولاد يحضروا المجموعات ويتابعوا دروسهم واما تيجي الامتحانات روحي بيهم يمتحنوا واسحبي الورق وهاتيه ويكملوا باقي الترم التاني معانا .. واكراماً ليكي علشان ظروفك انا هقبلهم يحضروا المجموعات من غير فلوس نهائي هما بس ييجوا يحضروا الشرح اللي فاتهم .. هاه اييه رأيك ؟؟
كريمه : خلاص كتر ألف خيرك .. انا موافقه مفيش عندي غير الحل ده .. ربنا يباركلك وانا هخليهم ييجوا من بداية الاسبوع ان شاء الله .. متشكره ربنا يكرمك ياارب
وتخرج متهلله الوجه وتبلغ اولادها بما حدث معها
في بيت سعيد
سوميه : هتنزل تروح لحامد علشان تتفقوا علي الشغل الجديد ؟؟
سعيد : اه .. ان شاء الله .. بس بالليل بعد ما اخلص شغل الورشه
يتناولوا افطارهم معاً ويتوجه لعمله
في بيت كريمه
محمد : يا ماما معاكي فلوس .. عاوزين نفطر
كريمه : معايا آخر عشرين جنيه .. هنشتري الفطار والغداا وبكره ربنا يدبرها من عنده
محمد : هو مش المدير قالك اننا هنحضر المجموعه بعد الضهر ومش هنروح المدرسه الصبح ؟؟
كريمه : اه .. قال كده
محمد : خلاص انا ادور علي اي شغل ف اي حته .. اشتغل الصبح لحد ميعاد المجموعه واما ارجع اذاكر .. لحد الاجازه
كريمه : لأ .. انت لسه صغير .. شغل اييه وبهدلت اييه .. انت تآخد بالك من دروسك ومذاكرتك وانا هتصرف متقلقش
دقت الرابعة عصراً فدق جرس الباب .. توجه محمد ليفتح واذا بها مجيدة ومعها زينه
محمد : يا ماما .. طنط مامة زينه
كريمه : اهلاً يا مجيده تعالي .. اهلاً دي اكيد زينه ما شاء الله .. قمر .. ربنا يحفظك .. روحي إلعبي مع اخواتك البنات .. خودها يا محمد عند ملك
محمد : حاضر يا ماما .. ثم توجه لزينه .. تعالي معايا
كريمه : اقعدي يا مجيده هعمل الشاي وارجعلك
مجيده : لا .. مش عاوزه شاي ولا حاجه .. مالك انتي شكلك زعلانه من حاجه
كريمه : مخبيش عليكي .. الفلوس اللي معايا خلاص خلصت وكنت مستلفاهم كمان من واحده حبيبتي قبل ما ارجع هنا .. كتر خيرها وقفت جنبي بعد ما رماني اللي ما يتسمي انا والاولاد .. ومش عارفه اعمل اييه .. انا لازم ادور علي اي شغل علشان اصرف علي العيال منه
مجيده : وشغل اييه اللي هتشتغليه هنا ؟؟ هو هنا في حد بيشتغل .. ما انتي عارفه اللي فيها .. هتبيعي جبنه وبيض ولا هتبيعي جرير وتقعدي ف الشارع ؟؟
كريمه : انا مستعده اعمل اي حاجه المهم ان العيال ميتبهدلوش .. ده محمد عاوز يدور علي شغل علشان يجيب فلوس نصرف منها وانا مش هسيبه يشتغل .. لازم يكمل تعليمه ..
مجيده : ايوه انا معاكي ان لازم تتصرفي في مصاريف الولاد بس متبهدليش نفسك ف الشارع انتي كمان
كريمه : طيب اعمل اييه .. اييه الحل .. اجيب منين اصرف علي العيال ؟؟ ده اخد اللي ورايا واللي قدامي وبيعني البيت والورشه بتوع ابوياا وسابني من غير ولا مليم والآخر طردني بالعيال .. اعمل اييه بس يا ربي
مجيده : طيب بقولك اييه .. انتي تعرفي تفصلي وتخيطي .. صح ؟؟
كريمه : بعرف بس علي قدي
مجيده : خلاص انتي تنزلي المركز وتدوري علي مشغل تتعلمي فيه الخياطه وتشتري ماكينه وتفصلي للناس اللي هنا .. احنا عندنا ستات عواجيز كتيير اووي بيدوروا علي حد يعملهم جلاليب .. انتي عارفه الناس اللي ذي دي مش بتستريح ف لبس الجاهز
كريمه : طيب وانا هجيب منين انزل المركز كل يوم لحد اما اتعلم ولو اتعلمت هجيب منين فلوس اشتري الماكينه ؟؟
مجيده : بصي .. انا هسلفك لحد اما تتعلمي وتبقي ترديهم اما تتيسر معاكي .. انا مش مستعجله عليهم وبعد كده نعمل جمعيه صغيره وندفع مقدم الماكينه وتبقي تكملي تمنها بالقسط .. في واحد هنا ف البلد بيجيب للناس اي حاجه بيطلبوها وبيبيعها بالتقسيط وانا هخلي ابو زينه يضمنك عنده
كريمه : خلاص انا موافقه .. ومن بكره هنزل المركز ادور علي مشغل اتعلم فيه الخياطه
مجيده : وانا هطلع وهبعتلك الفلوس مع زينه
كريمه : منحرمش منك يارب ولا من وقفت معايا .. ربنا يخليلك زينه ويفرحك بيها ياارب
تتركها وتتوجه لبيتها وبعد دقائق ارسلت لها زينه كما اتفقوا لتعطيها المبلغ
اما عن كريمه فحكت لمحمد ما دار بينها وبين مجيده وما قررت ان تنفذه
محمد : خلاص اللي تشوفيه اعمليه مع اني عارف انك هتتعبي بس ماشي
في المساء في ورشه حامد
سعيد : انا موافق اني اشاركك ف الشغل الجديد ان شاء الله .. وايدي ف ايدك يمكن نطلع بقرشين كويسين .. بس بشرط ان الفلوس اللي هتآخدها مني للشغل تسلمهالي من اول دفعه تقبضها ؟؟ لاني هسحب كل الفلوس اللي معايا
حامد : طيب خير ان شاء الله .. خلاص متفقين من اول دفعه هرجعلك فلوسك ونكمل شغلنا واما نركب ونشطب الشغل نبقاا نقسم المكسب اللي هيتبقاا بما يرضي الله .. هتجيب امتي الفلوس علشان نشتري الحاجات اللي ناقصه ؟؟ انا ملتزم مع المدير بميعاد تسليم ومش عاوزه يآخد فكره من البدايه اني مش ملتزم .. يمكن يكون في بيناا شغل تاني وتالت
سعيد : بكره الصبح ان شاء الله .. هروح اسحب الفلوس من البنك وارجع عليك
حامد : خلاص ان شاء الله في انتظارك .. نقرأ الفاتحه علي نية التسهيل
وقرأوا معاً الفاتحه علي اتمام الاتفاق
#يتبع
