الفصل الثاني
نزلت نانسي تقرع باب منزل رانيا
نانسي : ياله علشان منتأخرش، اردفت ضاحكة ماما مستنيه الفطار بدال ما ترفع المنفضة
رانيا : ماشي انا خلصت، ياله بينا، بس اعملي حسابك انا عاوزه اروح السوق اشتري لماما الخضار
نانسي : طيب ما نروح بقا الاول السوق نشتري الخضار واحنا راجعين نشتري الفطار علشان ميبردش يا فالحه
رانيا ممازحة: ماشي يا ام الذكاوة، أنتي كنتي فين من زمان
ضحكت نانسي قائله: انا هنا موجوده، هروح فين يعني، قولي بس اللي أنتي عوزاه وتلاقيني موجوده علي طول
رانيا : طيب ياله يا أم العوريف علشان منتأخرش
يتوجهوا للسوق لشراء الخضار ثم يتوقفوا عند المطعم لشراء السندوتشات للفطار وفي طريق عودتهم سألت نانسي رانيا
نانسي : بقولك إيه هو مين الشاب اللي ساكن قصادنا ده ؟؟
رانيا : قصدك مين، تامر ؟؟
نانسي : وهو لو انا عارفه كنت سألتك،
اردفت ضاحكة إيه يا بت الذكاء اللي بينزل عليكي مره واحده ده، هو انا بسألك ليه يا فالحه، ما أنا لو عارفه كنت سكت يا آخرة صبري
رانيا : طيب ساكن فين بالظبط ؟؟
نانسي ضاحكة: يا بت انا شوفته في البلكونة اللي قصادنا امبارح بالليل وشكله كان بيحب في التليفون
رانيا : يبقى هو تامر، شوفي يا سيتي،
اردفت بضحكة ساخرة قائله
الأخ تامر ده حته عسل كده، واد جدع وماما بقا اللي هي تبقي الست والدتي تبقا صاحبه امه الروح بالروح واحنا يعتبر متربيين مع بعض وانا وهو اكتر من اخوات
نانسي : هيييح يا بختك يا ختي، يا ريتني كنت مكانك
رانيا : هو انتى شوفتيه ازاي وامتي ؟؟
نانسي : شوفته امبارح وهو بيحب في التليفون وسمعته وهو بيقولها سلام يا حب هيييييح، اوعدنا يارب بأي حد يقول يا حب
ضحكت رانيا قائله: طب ياله يا ختي عشان اتأخرنا وهتلاقي امك مسكالك المنفضة وواقفة علي السلم ومستعده
وفي اثناء عودتهم رن هاتف نانسي واذا بالمتصل سلمي
نانسي: إلحق الحكومة
رانيا : شوفتي بقا، ردي عليها وقوليها راجعين في الطريق
سلمي : أنتي معاكي فلوس زياده ؟؟
نانسي : اه، معايا
سلمي: خلي رانيا تقولك السوق فين وروحي هاتي خيار وبصل
نانسي باندهاش متسائلة: إيه كل ده يا ماما انا لسه راجعه من السوق
ضحكت سلمي قائله: طيب كويس أنتي عرفتي المكان روحي بقا اشتري اللي قولتلك عليه وارجعي بسرعه ولا مش هتعرفي تروحي لوحدك، ما هو انا عارفه انك خيبه
نانسي : لا عارفاه بس نزلي السبت خودي السندوتشات واستنوني متآكلوش الفول كله لوحدكم، انا جيت تحت البيت اهوه
سلمي : لا عيب هنستناكي بس متتأخريش
رانيا : طيب بقول إيه بقي يا نوسه، هطلع انا علشان ماما متتخانقش هي كمان معايا واما تلاقي نفسك فاضيه تعالي نقعد نرغي شويه مع بعض
سلمي : اوك، بالليل هنزلك نرغي شويه
تناولت سلمي السندوتشات وعادت نانسي للسوق مرة لم تتذكر الطريق، استمرت في الذهاب والعودة لنفس المكان عدة مرات وفي النهاية فكرت أن تقف لتسأل أحد المارة لعل أحد يشير لها علي الطريق،
ولكن حين توقفت فجأة اصطدم بها طفل صغير يستقل الدراجة كان يمر وسط الطريق
الولد يرفع صوتها بحنق لنانسي قبل أن تتشاجر معه قائلاً: إيه ده مش تآخدي بالك قبل ما تقفي، وتركها وهرب سريعا من أمامها
نانسي : انت اكيد مجنون، يعني غلطان وكمان بتتخانق وبتكلم نفسك، الناس اتجننت باين عليها، وتحاول تنظيف ملابسها وحذائها، ثم رفعت رأسها واذا بتامر يقف أمامها
تامر : خير يا آنسه حصلك حاجه ، أنتي كويسه ؟؟
نانسي : لا انا كويسه ميرسي
تامر : طيب أنتي محتاجه حاجه ؟؟
نانسي : لا، شكراً، امم ...... وصمتت
تامر : قولي عاوزه إيه ؟؟
نانسي : لأ، هو انا مش عاوزه حاجه، انا عاوزه بس اعرف فين طريق السوق اللي هنا
تامر : السوق، بس كده تعالي معايا وانا أوصلك
نانسي : لأ، اروح معاك فين ؟؟
انت بس أوصفلي وانا هروح مع نفسي
تامر : أنتي خايفه ولا إيه ؟؟
احنا جيران علي فكره متقلقيش من حاجه ، انا همشي معاكي لحد هناك، اتفضلي
نانسي : طيب امري لله، اتفضل
__________
وصلت نانسي للسوق بصحبة تامر
تامر : اتفضلي يا ستي هو ده السوق، روحي اشتري اللي أنتي عوزاه وانا هستناكي هنا علشان اوصلك
نانسي : لا، خلاص ميرسي، انا هشتري الحاجه وهرجع علي طول
تامر : هو أنتي غرمانه حاجه، انا مستنيكي هنا، بس روحي ولا تحبي آجي معاكي ؟؟
نانسي : لا خلاص انا هشتري الحاجه وهرجع علي طول
دخلت نانسي السوق وبعد مرور ربع ساعه عادت
تامر : إيه ده، أنتي اتأخرتي كده ليه، مكنتيش عارفه تشتري الحاجه ولا إيه ؟؟
نانسي : لا، اشتريت بس المحل زحمه وعلي ما اخدت دوري في الميزان وفي دفع الفلوس حاجه آخر قرف
تامر : ماشي ياله علشان متتأخريش اكتر من كده
__________
اصطحب تامر نانسي إلي المنزل
تامر : أنتي اسمك إيه ؟؟
نانسي : انا نانسي
تامر : وانا تامر جاركم في البيت اللي قدامك ده، عموما اتشرفت بمعرفتك، عاوزه حاجه تاني ؟؟
نانسي : ميرسي كلك زوق انا تعبتك معايا سلام
تامر : سلام
نيره : كنتى فين يابت انتى كل ده ؟؟
نانسي : كنت بجيب الخضار يا فالحه وانتوا نايمين في العسل
نغم : وإيه اللي بهدلك كده ؟؟
نانسي : توهت وانا رايحه السوق وواحد خبط فيا بالعجلة والواد اللي ساكن قصادنا وصلني السوق واستناني ورجعني تاني، اوعوا تقولوا لماما اني توهت لتخرب الدنيا معايا
نغم : يا حلاوة يا حلاوة واد مين ده ؟؟ ابو عضلات
ضحكت نانسي قائله: ايون هو ده، ابو عضلات
نورهان : اهي قعدت تقولي يا حلاوة يا حلاوة بتاعتها دي لحد اما خالة الواد ماتت والجوازه اتأجلت، لأ وكمان مش هييجي النهارده
نغم ضاحكة: الله وانا مالي يا اووووختي هو انا اللي موتها
نانسي : مالك طيب زعلانه ليه يا نور هو أنتي اتخانقتي تاني مع مازن ولا إيه ؟؟
نورهان : لا، هو اللي اتخانق معايا علشان قولتله هستناك نقعد في البيت شويه وبعد كده ننزل نتمشى مع بعض، قالي لأ مش كل اما أجيلك ننزل واتخانق في الشارع بسببك وبسبب المعاكسات، كفاية المرة اللي فاتت كنت ها أموت الواد
ضحكت نيره قائله: انتى تفسخي الخطوبة احسن وتشوفي واحد يكون فرفوش كده بدل العصبي الغيور بتاعك ده
نغم : بس يا فاشله أنتي تسيبه إيه وفرفوش إيه احنا ما صدقنا نفرح بواحده هتحرضيها أنتي يا مفعوصه تسيبه.
وتتوجه نغم لنورهان لتردف قائله: اوعي تسمعي كلامها خليكي حلوه علشان عاوزين نحضر فرح ونلبس فساتين
نورهان في محاولة لإظهار الغضب وإخفاء الابتسامة قائله: لا يا حبيبتي احنا نتخانق اه، ونزعل من بعض اه، انما أسيبه لا، ده حبيبي أبت
وتغني نورهان أهو ده اللي مش ممكن ابدااااا
ضحكت الفتيات و ردوا عليها : ولا أفكر فيه ابدااااا
سلمي بحنق: أنتي يا بنتي منك ليها، هو احنا مش هنفطر ف يومكم ده ولا إيه ؟؟
الفتيات : جايين يا ماما
نورهان ضاحكة: ياله يا فالحه منك ليها قدامي نحضر الفطار قبل المنفضة ما تترفع ويبقا فطار الهنا
#يتبع
