الفصل الثاني عشر
نانسي بعد ان سمعت الموسيقي وكلمات الاغاني دُهشت وتحدثت لنفسها متسائلة: تامر معقول يكون هو؟؟
أسرعت وخرجت لشرفتها واذا به يقف مستنداً علي المقعد لكي يطفئ نيران قلبه وقلب محبوبته التي حُرم من رؤيتها لأسبوعين كاملين
وحين وقعت عيناها عليه، ابتسمت ابتسامه هادئة ووضعت يدها علي قلبها حتي يهدأ ثم أغمضت عيناها للحظة وعادت من جديد تنظر إليه لتتأكد انها تراه امامها حقيقه وليس في الأحلام
ثم اشارت له من بعيد ان يدخل، فسمع لها ودخل وبعد لحظات التقط هاتفه واتصل بها قائلاً:
- ألو يا عمري، وحشتيني
- وانت كمان كنت وحشتني اوي، بس علشان خاطري بلاش تتعب رجلك وتقف عليها، لسه شويه علي ميعاد فك الجبس
- مقدرتش كان لازم اشوفك واطمن عليكي، قلبي كان مشتاقلك اكتر ما كانت عيني مشتقالك، دلوقت بس ممكن يرتاح ويهدا شويه
__________
في صباح اليوم الجديد، نغم تقابل زين في مكان هادئ - بقولك أيه، تيجي نتمشى شويه ونتفرج علي المحلات ونختار الفرش؟؟
- بس لسه بدري كده قدامنا كذا شهر علي الفرح هنتفرج من دلوقت؟؟
- اه نتفرج من دلوقت علشان تتفرجي براحتك علي محل واتنين وتلاته وتختاري اللي يعجبك
- خلاص ماشي مفيش مشكله، ياله بينا واثناء مشاهدتهم للغرف الخاصة بالنوم وقعت عين نغم علي غرفه اخذت تتوجه نحوها اكثر لتشاهدها عن قرب واذا بها تتحدث لزين قائله: الله دي حلوه اوي
- عجبتك دي ولا عاوزه تتفرجي علي حاجه تاني الاول ؟؟
نغم بابتسامتها الساحرة أجابته: لأ دي جميله اوي
- تمام، توكلنا علي الله، تعالي معايا
- علي فين ؟؟
- هنروح نحجز الاوضه قبل ما حد يخدها غيرنا
- من دلوقت ؟؟
وبعدين احنا لسه معرفناش سعرها كام
- لأ انا عرفت سعرها كان مكتوب علي جنب الكرسي بس انتى مأخدتيش بالك
- طيب بكام .. انت ليه مقولتليش ؟؟
- وانتي عاوزه تعرفي ليه، انتى ليكي تختاري وبس
- لأ معلش لازم اعرف، يمكن اختار غيرها
زين بحنق شديد اجابها بعد أن قطب حاجبيه قائلا: تختاري غيرها، ليه بتسألي عن السعر وعاوز الحقيقة؟؟
- اه لو غاليه هختار غيرها، ليه ندفع مبلغ كبير في اوضه واحده واحنا ممكن نجيب حاجه تانية
- تمام، انا مش هجيب غير اللي انتى اختارتيها وملكيش دعوه بالفلوس، غاليه، رخيصة مش مهم اي حاجه ولا اي فلوس، انتى عليكي تختاري اللي تحبيه وبس ولازم تعرفي اني طول عمري من وانا صغير بشتغل مع بابا ومعايا اللي يكفي الجواز ويفيض كمان متقلقيش من حاجه، احنا مش هنتجوز كل يوم ومش هنجهز شقة جوازنا غير مره واحده وموضوع الفلوس ده متتكلميش فيه تاني، اتفقنا؟؟
- اتفقنا بس .......
- هاااااااه، خلاص بقا مفيش بس، كفاية عليا اشوف الفرحة والسعادة في عيونك ومش عاوز حاجه من الدنيا تاني، ياله نروح نحجز الاوضه قبل ما حد يآخدها
فرحت نغم قائله: ماشي ياله
توجهوا معاً لحجز الغرفة
- من فضلك عاوز احجز الاوضه دي وأشار للبائع عليها
البائع: حاضر يا فندم، تحت امر حضرتك
- بس انا هدفع المقدم دلوقت وعاوز حضرتك تبعتلي حد يآخد مقاس الاوضه عندي علشان لو كبيره ومش هتنفع يبقا حضرتك تصمملي واحده بالمقاس المطلوب
وهتفق مع حضرتك علي ميعاد الاستلام بالظبط علشان تكون الشقة جهزت
- تمام، مفيش اي مشاكل بكره ان شاء الله هبعت لحضرتك واحد علشان المقاسات بس من فضلك اكتبلنا العنوان ورقم التليفون بالتفصيل
- اتفضل ده الكارت فيه رقم التليفون وهكتب العنوان معاه علشان يبقا عندك بالتفصيل
__________
مرت الايام وعادت نورهان لزيارة بيت والدها بصحبة مازن ليلتف الجميع حول المائدة
محمود: مالك يا نور انتى شكلك تعبان ليه كده ومش بتآكلي كويس ؟؟
- مش عارفه يا بابا والله من كام يوم معدتي تعبانة وبيجيلي مغص كل ما آكل اي حاجه
- خودي البنت وروحي اطمني عليها عند الدكتورة بتاعتك
مازن: يا عمي ما انا موجود، ليه ماما تتعب نفسها، انا من وقت ما تعبت وانا بتحايل عليها نروح لأي دكتور وهي بتقولي لأ ده برد في معدتي وهشرب حاجه سخنه وهبقا كويسه ومش بتسمع الكلام
محمود: يا ابني انا عارف انك مش مقصر فأي حاجة بس أهي فرصه انها موجوده عندنا وأهي حماتك تآخدها وتطمن عليها وتطمنا
سلمي: حاضر بعد الاكل هنزل بيها للدكتورة
وبعد نصف ساعه سلمي ونورهان في غرفه الطبيبة تسنيم
نورهان: مساء الخير يا دكتوره، ان شاء الله تكوني بخير
تسنيم: الحمد لله، ازيك يا عروسه، عامله أيه ؟؟
من وقت ما اتجوزتي معرفتش عنك حاجه، أيه الاخبار ؟؟
سلمي: اهي تعبانة وجايه تشوف في أيه
تسنيم: خير ان شاء الله، بتشكي من أيه ؟؟
نورهان : انا ب أحس اني ............
تسنيم : تمام، اتفضلي علي السرير لازم نطمئن.
قامت الطبية بإجراء الكشف علي نورهان ..
نورهان: خير يا دكتوره ؟؟
تسنيم بعدما ارتسمت الابتسامة علي وجهها قائله: خير بإذن الله، جهزي هدوم النونو يا ماما، ألف مبروك
نورهان تهلل وجهها فرحـًا فقالت متسائلة: بجد يا دكتوره ؟؟
الطبيبة: اه طبعاً بجد، مش مصدقه ليه، عموماً هكتبلك علي شويه تحاليل لازم تعمليهم وفي الاستشارة بعد عشر أيام هتجبيهم وترجعي بيهم علشان نطمئن
نورهان: ان شاء الله يا دكتوره هعمل التحاليل وأرجعلك بإذن الله
__________
عادت نورهان مع سلمي للبيت والفرحة تملأ وجهها وقلبها
مازن علي وجهه ملامح القلق ليقترب من سلمي متسائلاُ: خير يا ماما، الدكتورة قالت أيه ؟؟
- متقلقش مقالتش حاجه،
ضحكت ممازحة مبروك يا بابا، جايلك نونو في الطريق ان شاء الله، بس كده
مازن بفرحة قائلاً: بجد يا ماما، انا هبقا أب، مبروك يا نونه، مبروك يا قلبي
نورهان بسعادة قائله: الله يبارك فيك حبيبي
ضحكت نيره قائله: هيييييه هنجيب نونو نلعب بيه
ضحكت نانسي ممازحة: مبروووووك يا ام عتريس، هاتيه بسرعه بقا عشان نلاقي حاجه نلعب بيها، واغنيلك كمان عشان منبقاش حرمنا النونو من حاجه
هيدا أول ملاك عيونه بحضني ناموا
يا ربي بترجاك تمرقني بأحلامه
حتى يعرف شو عامل بقلبي غرامه وهوى
بحس بقلبه عم ينبض بروحي وبجسمي
وَدَمُي الْمَاشِي بِعُرُوقِهُ هُوِيَّ ذاته دَمَي
هُوَ وَأَنَا صِرَّنَا واحدَ اِسْمِهُ يَعْنِي إسمي وَبِهَوًى
رايق حبيبي رايق عدد الدقايق والثواني
__________
تامر متأففـًا بعدما اتصل بنانسي قائلاً:
- اووووف، اووووف مش بتردي لييه؟؟
- مالك يا واد انت اتجننت بتكلم نفسك، ومالك متعصب كده ليه ؟؟
تامر بحنق شديد: مفيش حاجه
- كل الدخان اللي طالع من وشك ده ومفيش، اردفت ضاحكة: طيب لو في هيبقاا شكلك عامل ازاي
- انا مش فايق لهزارك ده، اقولك اعملي فيا معروف واتصلي بنانسي من تليفونك يمكن ترد عليكي
- اااااه نانسي، طيب مش كنت تقول كده، يعني هي سبب الدخان ده، ماشي امري لله
_________
اتصلت هدير بنانسي بناء علي رغبة تامر وعندما أجابت، أسرع تامر يخطف الهاتف من يد هدير متحدثـًا بحنق شديد قائلاً:
- ألو، انتى مش بتردي عليا من بدري ليه ؟؟
رنيت عليكي خمسين مره
- الفون كان ف الاوضه ومسمعتهوش، هو في أيه انا مش فاهمه حاجه وانت متعصب كده ليه؟؟
- لما حضرتك تبقي واقفه وبتغني وبترقصي تبقي تقفلي البلكونة علشان في حيوان بيتفرج عليكي ومنسجم اوي
نانسي بدهشة : حيوان !! حيوان مين ده ؟؟ انا مأخدتش بالي، اصلنا بنحتفل بالنونو للجديد
- يا سيتي احتفلي زي ما انتى عاوزه محدش منعك بس اقفلي البلكونة
- حاضر، حقك عليا، بس هو مين اللي كان بيبص عليا ؟؟
- الحيوان اللي اسمه هشام، الواد ده مش بينزلي من زور واما جيه الحته جديد عاكس هدير وانا اتخانقت معاه وضربته والناس حجزونا بالعافية، كنت هموته ومن وقتها مش بنتكلم ولا بينطق بعض بس لو فكر يبصلك تاني مش هيكفيني فيه عمره
- لا لا خلاص هآخد بالي بعد كده، متتعصبش بقا
اهدأ والله انا اول مره اعرف الكلام ده ولو اعرف كنت قفلت البلكونة ..
تامر بعصبيه قائلاً: خلاص بس خودي بالك بعد كده ومبروك علي النونو الجديد عقبال النونو بتاعنا يا قلبي
نانسي بابتسامة خجل قائله: يارب يا حبيبي ويكون أمور شبهك كده
- شبهي انا، أنا أمور اومال أنتي إيه؟؟
اردف ضاحكا: روحي شوفي هدير
___________
مرت الايام وتوجه تامر للطبيب حتي يعيد الكشف لفك الجبس كما هو مقرر له، أجرى تامر اشاعه وبعد ان اطمئن عليه قام بفكه
عاد تامر من جديد لبيته وقام بتشغيل الموسيقي كما كان معتاد حتي تخرج نانسي وتتقابل عيونهم حتي تهدأ قلوبهم من الاشتياق
سمعت نانسي كلمات الأغنية واذا بها تخرج لتري تامر يقف علي قدميه وعادت ابتسامته من جديد، علت الابتسامة وجهها وكاد قلبها ان يرقص فرحاً لشفائه، اسرعت وهاتفته لتطمأن عليه اكثر قائله:
- ألو، حمدلله علي سلامتك حبيبي، طمني الدكتور طمنك وقالك ان الامور تمام ؟؟
- الله يسلملي قلبك يا قلبي، انا بخير الحمد لله والدكتور طلب اشاعه قبل ما يفك الجبس واما اطمن فكها وانا قدامك اهوه تمام
- الحمد لله، كانت ايام صعبه ربنا ما يعيدها تاني، طيب انا مضطرة اقفل دلوقت هنزل آخد ملزمه مهمه من صاحبتي علشان الامتحان واما ارجع هطمن عليك
- تمام متتأخريش هستناكي وخلي بالك علي نفسك
- حاضر، سلام مؤقت.
__________
مرت الايام وانتهي الترم التاني، انه صباح يوم جديد، دقت الثامنة صباحاً
- يارب صبحنا وربحنا وما بين العباد ما تفضحنا
سمعتها نيره وضحكت قائله: إيه يا بنتي ده علي الصبح، رايحه تبيعي لبن مع عبحميد
ضحكت نامسي ممازحة: عبحميد مين أبنتي، عندنا امتحانات، بس تصدقي فكره كويسه بتاعة اللبن دي، ممكن افكر اني اشتغل معاه بعد الامتحانات، اهو الواحد يلاقي حاجه يضيع فيها وقته.
نامي يا فالحه انا نازله الامتحان، ادعيلي أبت يمكن تتيسر والامتحان يبقا كويس
- ان شاء الله يا نوسه هييجي سهل، ربنا معاكي
_________
انقضت ايام الامتحانات سريعاً
زين ونغم مشغولين في تجهيز بيت الزوجية، نجحت نيره بمجموع مرتفع في الإعدادية، نورهان تتابع مراجعه حملها عند الطبيبة تسنيم كل شهر مره وقد تبين ان الجنين ذكر، فرح الجميع بذلك الخبر
اما عن نانسي وتامر فينتظروا ظهور نتيجة العام، تامر يواصل متابعه مشروع الكمبيوتر مع عبد الرحمن جاره وكلما تحصل علي مبلغ كبير يقوم باستكمال تجهيز جزء في شقه الزواج وكان يقوم باستشارة نانسي في كل ما يقوم به من تجهيزات ويتشاور معها حتي يقوم بتنفيذ كل ما يعجبها
#يتبع
