عادوا الي فيلا السيوفي
توجه آدم الي غرفه والدته ليتفقدها في محاولة لمعرفة ماذا شاهدت لكي حدث لها كل هذا، أما علياء فذهبت لغرفتها كي تبدل ملابسها، ظل آدم يلملم أشياء والده الملقاة في جميع أرجاء الغرفة إلي ان وجد أوراق ومستندات و خطاب أصفر اللون، أخذه الفضول ليري ما بداخله ففتحه وقرأ تلك السطور المدونة عليه والذي اوشكت ورقته ان تتمزق، دمعت عيناه وازدادت اتساعاً من الصدمة، ظل دقائق طويلة علي حالته حتي استوعب ما أمامه وجمع الأوراق وذهب لأخته لتطمئن عليها فوجد النوم قد غلبها من شده التعب والبكاء فحمد الله لأنه يريد أن يخرج دون ان تشعر به وقد أجرى مكالمة هاتفية مع أحد الأشخاص
آدم: ايوه انا لازم اقابلك دلوقت حالاً
- .........
- مينفعش وبعدين لازم المكان يكون متغير
- ......
- صدقني اللي معايا خطير ويضرنا لو أتأخرنا
- .....
- تمام حاضر هكون هناك في أقل من ربع ساعه
__________
تمت المقابلة وعاد إلي الفيلا، بدل ملابسه واصطحب علا وحمل الحقيبة التي جهزتها لوالدتها وتوجهوا معا للمستشفى
دقت التاسعة مساءًا، ذهبت حور الي المديرية لإجراء مقابلة مع اللواء عزيز
حور: ايوه يا فندم الورق جهز
اللواء عزيز: ايوه يا ايناس
- انا حور يا فندم مش ايناس
- من دلوقت انتى ايناس معتز الشريف ده اسمك ودي فعلا الشهادات بتاعتها وتقريباً هي من سنك بس مسافره بره مصر من زمان ومش بترجع أو مش هترجع تاني فتقدري تنتحلي شخصيتها
- تمام يا فندم، يعني كده اقدر ابدأ المهمة ؟؟
هو كده، ابدأي علي طول في اللي اتفقنا عليه
- تمام يا فندم بعد إذنك
- اتفضلي
__________
خرجت حور من مكتب اللواء وتوجهت الي مكتبها وضعت الأوراق بخزانة الملفات وتأكدت من اغلاق الباب جيدًا ثم دخلت لمكتب رحمه لكي تبلغها عن عدم استطاعتها التواجد بشكل منتظم في المديرية لمدة شهرين أو اكثر بسبب انشغالها في مهمة خاصة بالعمل
- ازيك يا رحمه ؟؟
- الحمد لله بخير وانتي اخبارك أيه وشريف عامل أيه دلوقت؟
- الحمد لله انا بخير، مطحونة في الشغل زي ما انتى عارفة وشريف كمان بقا زي الفل، ممكن اطلب منك طلب صغير
- انتى تقولي من غير استئذان يا حوريتي
- حاضر يا رحوم، شوفي بقي اختك مُكلفه بمهمه خارج المديرية ممكن شهر أو شهرين مش عارفه المدة بالظبط اللي عوزاه منك تتابعي التحقيق بنفسك لحد اما شريف يرجع بالسلامة
ضحكت رحمه قائله: بس كده من عينيا يا ستي ده انا قولت هتطلبي مرتب الشهر كله ولا حاجه
ضحكت حور قائله: مش للدرجة دي يا رحوم يلا انا هروح بقي علشان الحق أجهز حالي للمهمة ودعواتك تخلص علي خير، سلام
- الله معك يا حوريتي وابقي طمنيني عليكي، سلام
__________
خرجت حور من المديرية بعد ان أخذت الأوراق وعادت الي البيت
- هلموا هلموا يا أهل البيت يا أهل الدار يا نااااس يا اللي هنا، أنا جيت
- أيه يا بنتي الدوشة اللي انتى عملاها دي، هتصحي العيال اعقلي بقي، حتي بعد الترقية وكبرتي وبقيتي رائد أد الدنيا لسه زي ما انتى مجنونة
ضحكت حور قائله : أيه يا حج روق كده، انت ليه بتقفش علي طول انا بهزر، مهزرش يعني ؟؟
وقفت حور فوق المقعد ورفعت اصبعها عاليا واردفت لازم الكل يقف انتباه سيادة الرائد حور اسماعيل البدري، بنت اللواء اسماعيل البدري علي سن ورمح رجعت بالسلامة
ضحك والدها قائلاً: لا اذا كان كده ليكي حق، هزري طبعا هو حد يقدر يمنعك من الهزار، بس تعالي احكيلي الاول عملتي أيه في القضية
نزلت حور من فوق المقعد واقتربت تحتضن والدها وقبلته ثم جلست بجانبه قائله: لا حياة لمن تنادي بنحاول نوصل للرأس الكبيرة بس سعيد ولا سكموله ده مش راضي يعترف بحاجة
- سعيد مين ؟؟
- أيه يا سياده اللواء هو المعاش اثر ولا أيه ده سعيد الشهير بسلموكه الايد اليمين للرأس الكبيرة اتقبض عليه في الهجوم الأخير
- ماشي يا سيادة الرائد، لازم تشوفي نفسك علينا وبعدين انا كنت هعرف منين انه الايد اليمين لرئيس العصابة
ربتت حور علي كتف والدها واردفت ضاحكة ولا تزعل يا يابني انا قولتلك اهو، هدخل أغير بقي في السريع الممل كده وراجعه تاني بسرعه نحكي علي مهلنا بقي، تمام ؟؟
- تمام يا شقية، روحي وانا منتظرك نشرب القهوة مع بعض علي ما والدتك ترجع من الشغل
دخلت بدلت ملابسها وتوضأت وصلت فرضها وعادت إليه مره اخري بعدما جهزت القهوة وقدمتها لوالدها واستمر النقاش بينهم في عدة جوانب تخص القضية حتي عادت والدتها من العمل وتناول معا العشاء ثم توجهوا كل منهم لغرفته حتي ينالوا قسطـًا من الراحة
__________
اقبل الصباح الجديد واخترقت اشعة الشمس بضيائها نافذة غرفة حور لتستيقظ بنشاط تُجهز نفسها لتبدأ مهمتها الجديدة، توضأت واتدت صلاة الصبح ودعت ربها أن ييسر لها أمورها ثم اسرعت ترتدي ثوبها الانيق واطلقت العنان لشعرها الطويل الحريري واردت نظارتها السوداء وحذاءها الاسود ذو الكعب الرفيع الذي زاد من تألقها، نزلت من بيتها واستقلت سيارتها حتي وصلت للشركة ودخلت بكل ثقه وتوجهت الي مكتب المقابلات وقدمت نفسها للسكرتيرة والتي بدورها طلبت منها ان تنتظر لنصف ساعة حتي يأتي موعد مقابلتها، مرَّ الوقت سريعاً وتمت المقابلة للعديد من الفتيات إلي ان جاء دور حور
ارتفع صوت السكرتيرة تنادي: ايناس معتز الشريف
ايناس (حور): ايوه
السكرتيرة : اتفضلي علشان المقابلة
دخلت ايناس( حور) الي المقابلة وكان امجد في انتظارها ليقوم بمقابلاتها ودار بينهم حوار طويل، تحدثت حور بطلاقه ولباقة لتجذب انتباه امجد حتي يوافق علي تعيينها في الشركة وهي الخطوة الاولي في نجاح مهمتها وبالفعل نجحت في ذلك وأعجب بطريقتها في الحوار وبثقتها في نفسها وبالإضافة إلي ذلك انها قدمت ملف كامل مرفق به شهادات تخرجها والاوراق الخاصة بها
- تمام يا استاذه ايناس، كده المقابلة انتهت تقدري حضرتك تتفضلي وان شاء الله نتصل نبلغك النتيجة قريب جداً
- ايناس(حور): تمام يا فندم بعد إذن حضرتك
- اتفضلي
_________
خرجت حور ترفع رأسها بشموخ وتخطو بثبوت خطوات ذات ثقه عالية بنفسها وفي نفس لحظه خروجها كان آدم قد وصل للشركة ليطلع علي نتيجة المقابلات التي تمت بعد الاطمئنان علي الحالة الصحية لوالدته وقد سمح لها الطبيب بالعودة لمنزلها بعد ان اكد علي عدم ازعاجها بأي اخبار سيئة وطلب منهم تنفيذ كل ما تطلبه حتي لا تعود وتنتكس مره اخري لكنه لم يقابل حور حتي هذه اللحظة، دق هاتف كل من حور وآدم في نفس اللحظة
ايناس تتحدث إلي اللواء لكي تطلعه علي ما تم في المقابلة اما آدم
مجهول : .......
- يعني كده الحاجه وصلت تمام؟
- .......
- أتصرف ازاي أنا دلوقت؟
- .......
- حاضر هنفذ كل حاجه مطلوبة بس لو حصل حاجه هيكون إيه التصرف وقتها
- متقلقش كل الامور تمام
- حاضر، هنفذ المطلوب سلام
انهي ادم المكالمة واغلق هاتفه ليصعد الي مكتبه وطلب امجد للحضور لمقابلته والذي اسرع إيه يطمئن منه علي زوجة عمه قائلاً: ايه يأبني، مرات عمي عامله أيه دلوقت، طمني في تحسن ولا مازالت تعبانه ؟؟
- الحمد لله بخير، اتحسنت عن الاول والدكتور سمح لها بالخروج، وصلتها البيت هيا وعلا وقولت اجي اشوف وصلتم لإيه، ها طمني عملت إيه في المقابلات النهارده، وميعاد الاجتماع بتاع امبارح حددتوه ولا لسه، يالا علي السريع طمني علشان لازم ارجع اطمئن علي الحاجة انت عارف من بعد موضوعي وهي قلقانه زيادة عن اللزوم
- عارف عارف، بس انت معرفتش إيه اللي حصل في غيابك واتسبب في تعبها؟
أمجد بعد تردد بسيط: افتكرت عمك وابني الله يرحمهم وقَعَدت تصوت لحد ما الضغط ارتفع وتعبت ؟؟
- الحمد لله انها جت علي قد كده ربنا يستر علي اللي جاي خلي بالك منها ولو علي الشغل انا موجود متقلقش من حاجه
- أكيد ان شاء الله خير وربنا يعديها علي خير بس قولي البنات اللي قابلتهم النهارده في كام واحده منهم تنفع للوظيفة ؟؟
- ممكن نقول اتنين وانت قارن بينهم، بس اعتقد انك هتختار اللي انا اخترتها
- فين الملفات الخاصة بيهم، بس الاول قولي ليه بتقول اني هختار نفس البنت ؟؟
- هتعرف من الملفات دلوقت
تناول آدم من أمجد الملفات وتفحصها جيدًا ثم توجه لأمجد بالكلام مره اخري
ايناس دي كويسه اوي دي معاها دورات كتير جداً و كمان عندها تلات لغات يعني كل المواصفات المطلوبة
- مَش قولتلك انك هتختار اللي انا اخترتها، تمام الحمد لله اختيارنا واحد عموماً هبلغ كارما تتصل بيها تبلغها موافقتنا
- تمام وتبلغها انها تكون هنا بكره الصبح الساعة 8 وتعرفها ان التأخير ممنوع لازم الالتزام
- خلاص يا عّم حاضر هقولها تبلغها وتأكد عليها الالتزام ، لا تقلق، سلام هطير أنا بقي اشرب قهوتي، تحب اطلبلك قهوة معايا، انا دماغي هتنفجر من الصداع بسبب المقابلات طول اليوم
- ماشي وانا كمان مصدع
خرج امجد من مكتب آدم وتوجه لكارما وطلب منها اجراء مكالمه لحور لإبلاغها انه تمت الموافقة علي تعيينها في الشركة
- خلي بالك من كل حاجه مش هوصيكي، الباشمهندس ابن عمي علي آخره ومش عاوزين مشاكل، الحاجه تعبانه وهو مش مستحمل اي حاجه
كارما: متقلقش كل حاجه هتبقي تمام بإذن الله
__________
صدح هاتف حور معلنا عن استقبال اتصال
ايناس(حور) : السلام عليكم
كارما: وعليكم السلام ورحمه الله وبركاته الأستاذة ايناس معايا ؟
ايناس (حور): ايوه يا فندم انا ايناس مين حضرتك؟
- انا كارما من شركة السيوفي للتصدير والاستيراد ببلغ حضرتك انه تم قبولك في وظيفه السكرتيرة
حور بسعادة: بجد فعلا تم قبولي معاكي، الحمد لله طب أجي من امتي استلم الشغل؟
- حضرتك تشرفينا بكره ان شاء الله الساعة 8 ونرجو الالتزام بالمواعيد وحضرتك هتعرفي كل حاجه
- حاضر، ان شاء الله هكون موجود في الميعاد
اغلقت هاتفها وظلت تقفز لنجاح أول خطوة في المهمة وقامت لتصلي شكراً لله والدعاء حتي يوفقها فيما هو قادم
ثم خرجت الي والديها تهلل كعادتها قائله: يا أهل البيت يا أهل الدار
نهى والدة حور ممازحة: عاوزه ايه يا مجنونة مش ناويه تعقلي بقي ؟؟
- مالك يا نونو بس هو الحاج يزعلك وتطلعيه عليا ولا أيه .. وبعدين أيه هتعقلي امتي دي، ما انتى عارفه اني مجنونه من وقت ما ولدتيني عوزاني اعقل ليه، هو في حاجه احلي ولا اجمل من الجنان يا ست الحبايب، اردفت ضاحكة وبعدين ما انا حلوة اهوه ووافقوا علي دخولي أكاديمية الشرطة ؟؟
والد حور: يا بنت بلاش شقاوة ومالك عامله دوشه ليه، تعالي احكيلي ؟؟
- اهلا اهو الحجوج الكبير وصل، المهم انا من موقعي هذا من نص الصالة تحديدا جايه ابلغكم اني من اليوم في مهمة ومضطرة للسفر حوالي شهرين كده
والد حور: فين يعني ؟؟
- المعلومات سرية للغاية يا سياده اللواء
نهى : يعني أيه سرية، يعني أيه ابقي قاعده ومش عارفه بنتي الوحيدة فين ؟؟
- خلاص يا نهى في أيه متتعصبيش كده، قالتلك سرية ده شغل مش لعب عيال، وبعدين يعني هيا لا اول مرة ولا هتكون الاخيرة ما كل مرة بيبقي عندها شغل بترفض تتكلم عنه
- يا اسماعيل انا بس خايفه عليها هفضل كده معرفش حاجه عنها لحد امتي
- خلاص يا ماما بقي متقلقيش انا هكون جوا مصر مش بره بس فين بالتحديد معرفش وكل فتره هكلمك اطمنك عليا واطمن عليكم، ها يا ستي تمام كده ؟؟
اسماعيل: تمام يا حبيبتي اهم حاجه تخلي بالك من نفسك
- حاضر يا سياده اللواء سمعاً وطاعة سيدي، أيه يا ست ماما مش عاوزه تقوليلي حاجة ؟؟
نهى بعد أن دمعت عيناها اردفت: خلي بالك من أكلك انتى مش بتآكلي كويس وانتي معانا هنا هتعملي ايه في نفسك وانتي لوحدك وتتغطي كويس وتكلميني كل يوم و...
- حاضر يا ماما من عنيا هغسل سناني ورجلي قبل النوم واشرب اللبن الصبح متقلقيش يا حبيبتي
- اتريقي عليا يا ست حور بكره تتجوزي وتبقي ام وتحسي باللي بحس بيه وتفهمي كلامي
- حاضر من عينيا الاتنين انتي بس متقلقيش، يلا هروح انا اجهز حاجتي علشان امشي
اسماعيل : ماشي يا حبيبتي روحي، ربنا يوفقك
#يتبع
********************
