بقلم نورسين محمد
فضة : ماشي خليكم مرتاحين واما تصحوا براحتكم نادم عليّ اچهز لكم الوَكل
تركتهم وتوجهت لتخرج من الباب واوصدته بهدوء حتي لا تسبب ازعاج لهمسه وهي تدعو لهم بدوام السعادة
والله يا ولدي شرحت صدري ربي يبارك فيك ويچعلك حنين علي مرتك أكده علي طول
هشام اقترب من همسه يداعب خصلاتها التي تساقطت علي جبينها ،، لثم شفتيها الناعمتان ووجنتيها قائلا بهمس : همستي يالا قومي آني چوعت قوي وچدك رچع ومستنيكي تحت
أخفت همسه رأسها في صدره وتحدثت بتعب : أنا عاوزه انام مش قادرة اقوم خلينا شويه
ضمها لصدره والتقط هاتفه وكتب لفضه نايمين ياما
فضة : يالا احنا نتغدوا وهما اما يصحوا يبقوا ينزلوا براحتهم
_____________________
في المساء استيقظ العروسان وابدلوا ملابسهم وتأبطت تلك الهمسه الناعمه ذراع هشام ونزلت تتمايل علي درجات المصعد كفراشة حسناء تتنقل بخفة فوق الازهار
وقد ارتدت عقد جدتها وزينت به عنقها
جميله : حمدلله علي سلامتكم ،، كنكم مشبعنينش نوم أياك ؟؟
فضة : وفيها ايه دي ،، سبيهم يناموا ويتهنوا ويشبعوا نوم ،، تعالي يا مرت الغالي
همسه : فين جدو وعمو منصور وفين حمزة ده وحشني اوي
ومن خلفهم ظهر حمزه : انا هنا اهوه يا حبيبتي ،، اسرع واقترب منها يحتضنها بشوق جارف واردف : وحشتيني اوي والبيت وحش من غيرك متسافروش تاني
همسه ضمته بفرحه : حبيبي وحشتني اوي اوي ،، حاضر
ان شاء الله مش هنسيبك تاني
ربت هشام علي ظهره قائلا : عقبال ما تآخد عروستك وتقضي شهر العسل يا واد خالي وترچع مبسوط
ضحك حمزه قائلا : يااااه ده لسه بدري اوي متستعجلش يالا نروح لجدي
همسه : يالا هو في حد عنده يا عمتو
فضه : لاه يا قلب عمتك ،، مفيش غير عمك عامر وعمك منصور وبعد شوي چاي عمك بدر ومعاه مالك
هشام : طيب يالا نسلموا عليهم وخلي البنات يچهزوا الوَكل بسرعة ياما انا ميت من الچوع
همسه : اه وانا كمان يا عمتو وعاوزه تفاح
فضة : تفاح بس اكده حالا نچيبوا التفاح وكل اللي تشتهيه يا قمر
نظرت غنية لها وابتسمت فاقتربت منها فضه فهمست لها هتتبسمي ليه ياما ؟؟
غنية : البت شالت ومتچبيش سيرة لحد ،، راعيها انتي بالوكل والفاكهه
لمعت عين فضة وكاد قلبها يتوقف من الفرحة قائله : لاه مهقولش حاچه ،، يااااارب تراضيني فيهم وترزقهم الخلف الصالح
_______________________
عبد الكريم فتح ذراعيه لهمسه فاختبأت داخلهما فأغلق عليها قائلا : اهلا بالغاليين اتوحشتكم قوي
سلم هشام علي عامر ووالده واقترب يقبل يد عبد الكريم قائلا : كيفك يا چدي وكيف صحتك ؟؟
همسه : انت وحشتني اوي اوي يا جدو كأني كنت غايبة عنكم سنين مش كام يوم
عامر : حمدلله علي سلامتكم انشاله تكونوا اتبسطوا من الچو هناك احسن من هنه بكتير
همسه : اه الجو جميل بس من غير جدي وجدتي وانتوا كلكم مفيش حاجه ليها طعم ،، كل حاجه هنا احلي كتير
ضحك منصور : الله لا يحرمنا چمعتنا الحلوة دي يا بت اخوي
مرّ اليومين سريعا وعادت حنين تضم ابناءها بين ذراعيها بحنانها
_____________________
مصطفي : اخيراااا كده الڤيلا الحمد لله انتهينا من تشطيبها ذي ما طلبتي والباقي بقي ننزلوا ننقوا الفرش او اتصل بالشركة تبعت لنا الكتالوچات ونقي اللي تحبيه متنسيش اننا اچلنا الچواز بسبب التشطيبات الچديدة اللي غيرتيها
وسام : طيب تمام معنديش مشكلة لو انت مفيش عندك وقت ننزل ممكن نختار من الكتالوجات
شويكار وقد رفعت انفها وتحدثت بتكبر : وليه معندهوش وقت ده جواز مش لعبه وبعدين هو بيفرش بيته مش بيت حد غريب يعني لازم تنقوا وتختاروا اللي هيناسبكوا
وسام : يا ماما مصطفي هيسافر قنا علشان جده وجدته كلها كام يوم وهيسافروا الحج انتي نسيتي انه بلغنا ان الجواز هيبقي بعد ما هما يرجعوا علي طول بإذن الله ،، فخلاص بقي انتي معايا اهوه وهنختار انا وانتي وبعدين هو حد بيفهم في الاذواق الراقية ذيك انتي يا ست المل وسيبي مصطفي يشوف اللي وراه وأنا هبقي أبعتله انا صور الحاجات اللي اخترناها علي الواتساب وخلينا نخلص كل حاجه انا وانتي
تهلل وجه شويكار بعد ان سمعت تلك الكلمات من وسام و ردت قائله : اكيد محدش هيفهم اكتر مني في الاذواق عموما ماشي اتصل بيهم وخليهم يبعوا الكتالوجات علشان نلحق نخلص مفيش عندنا وقت كتير
مصطفي : حاضر يا حماتي
انقلبت ملامح وجه شويكار حين وقعت علي مسامعها تلك الكلمة وكأنها كالصاعقة التي احرقتها وتحدثت قائله : حماتي ،، في حد هيعيش في مجتمع راقي يقول حماتي دي كلمة وحشه اوي
مصطفي : طيب اقولك ايه يا حماتي ما انتي حماتي
شويكار : انا عارفه اني حماتك يس ممكن نغير الكلمه و ده مش هيغير حاجه في الواقع والحقيقه اللي هيا اني حماتك
مصطفي بحنق : طيب ماشي قوليلي حضرتك عوزاني اقولك ايه وآني هنفذ
شويكار : ممكن تقول يا طنط او طنطي اللي يريحك ناديلي بيه
مصطفي : انتي عوزاني اني مصطفي الصعيدي عوزاني اقول تنت او تنتي
شويكار : اولا اسمها طُنط ثانيا و ده الاهم انك هتعيش هنا في القاهره مش في قنا وبعدين هنا محدش يعرفك علشان تتكسف تقول قدامه طُنط والمفروض ان من دلوقت لازم تتعود تغير طريقة كلامك انت هتقابل ناس غير اللي كنت بتقابلهم في قنا
مصطفي بتأفف : ان شاء الله يا حماتي أقصد يا تنت ،، بقولك ايه يا وسام آني عندي ميعاد مهم في الشركة بعد ساعة ولازمن امشي ،، آني هتصل بالشركة وهبلغك ميته هيشيعولك الكتالوچات واستأذن آني دلوك بقي ،، حابين اوصلكم لأول ؟؟
وسام : لا يا حبيبي روح انت متأخرش نفسك ،، السواق منتظرنا برا
مصطفي : طيب يا قلبي هبقي اتصل بيكي بالليل ان شاء الله ،، سلامو عليكو
وسام : وعليكم السلام ورحمة الله وبركاته
شويكار : هو انتي ازاي بتفهمي كلامه ،، ده نص كلامه عاوز مترجم ،، انا والله مستغربه امرك
صدح صوت وسام بالضحكة فتردد عبر حوائط الڨيلا الفارغة قائله : مامي حبيبتي ،، اللي بيحب حد بيقبل اي حاجه منه وانا بحب مصطفي وقابله منه اي كلام وفاهمه كل حروفه ومعنديش اي اعتراض انه يفضل يتكلم بنقس الطريقه مع كل الناس ،، كفايه انه صعيدي راجل بمعني الكلمة ،، راجل اقدر اتسند عليه من غير ما يكل ولا يمل ولا يقول تعبت وهروح لمامي ،، يا حبيبتي انا حابه خشونته وعصبيته ورجولته عاوزه اعيش مع راجل مش عاوزه عيل يرجع لمامته في كل تصرفاته ،، انا عوزاكي تطمني وبأكدلك اني مع مصطفي هكون اسعد واحدة في الكون
شويكار : عموما انتي حرة انتي اللي هتعيشي وانتي اللي هتقابلي الناس معاه
وسام : متقلقيش يا مامي ،، اني امشي وايدي في ايد مصطفي وهو بيحبني الحب ده كله يبقي شرف كبير اوي ليا ولازم احمد ربنا انه رزقني حبه
شويكار : غريب امرك
وسام : لا يا مامي ،، قصدك تقولي غريب امر الحب ،، يالا بقي نمشي السواق برا
_____________________
زهيرة : هتعمل ايه ف الشغل دلوك يا واد عمي بعد اللي حوصل بينك وبين اخوك ؟؟
عبد المجيد بحنق : هعمل ايه يعني ما انتي شايفه بنفسك اللي بقيت فيه ،، اخوي ركني علي الرف وولدي بقي مكاني وهو اللي ماسك الشغل كلاته واخوي قعدني في البيت
زهيرة : وانت هتستسلم اكده وهتقعد في البيت ذي الحريم أكده ولا ايه ،، بقي عبد المچيد القناوي عين اعيان قنا يقعد في البيت ذي الحريم وولده يصرف عليه
عبد المجيد : ايه حريم دي يا وليه كنك اتخبلتي ،، اسكتي وسدي خشمك چاك خابط
زهيرة : يا واد عمي آني مقصدش ،، آني عوزاك ترچع احسن من لأول ،، انت لازمن ترچع تشتغل وتثبت لأخوك وولده انك قادر تشتغل من تاني وليك معارفك
عبد المچيد : خلاص قفلي كلام ف الموضوع ديه وبكره يحلها الحلال وهبقي اشوف حد من المعارف التقال وارچع اشتغل معاه بالفلوسات اللي كنت مچنبهم بعيد عن الحسابات بتاعه الشغل وربك كريم يعدلها ويحلها بمعرفته ،، نامي بقي وبطلي رط كتير آني مناقصش وچع رآس آخر الليل
#يتبع
