بقلم نورسين محمد
الفصل الثامن
انقضت الليلة، والليل يطوي أحزانهم .. ليهل الصباح الجديد
عبد الرحمن توجه لعبد الكريم: احنا هنتوكل علي الله يا خوي وهنرچعوا على مصر.
عبد الكريم : يا خوي لسه بدري، مستعچلين ليه، اديكوا قاعدين وسطينا كام يوم كمان.
عبد الرحمن : معلش يا خوي لازمن أرچع علشان الكلية، الشغل مبيرحمش، والامتحانات قربت.
عبد الكريم: طيب علي راحتك يا خوي انا كان بودي تقعدوا معانا كام يوم كمان لچل ما تحس حنين أنها اتعودت علينا بس انت أعلم بظروفك، آني معاوزش اعطلك عن اشغالك، ومتقلقش علي حنين، هي ف أمان اهنيه وسطينا ومع چوزها محدش يقدر يزعلها ولا يدوسلها على طرف طول ما آني وآدهم على وش الدنيا.
عبد الرحمن : انا متطمن عليها يا خوي وهي وسطيكم
وعارف إنكم هتحوطوها چوا عينيكم، ما انت أبوها برضوك
يا خوي، اسمحلنا نروحوا نچهزوا حالنا للسفر، يا دوب الوقت.
__________
منى : احنا هنرجعوا القاهرة النهارده بالليل، خلي بالك من نفسك ومن جوزك وتسمعي كلامه وتطيعي أوامره، ومش عاوزه اسمع أي شكوى منك.
حنين : أنا عاوزه ارجع معاكم، لازم أكمل دراستي وارجع كليتي.
منى : ابوكي اتفق مع أدهم انك هتكلمي دراستك وهو وقت ما يحب يرجعك القاهرة هيبقاا يجيبك هو بنفسه، انا هقوم علشان أكمل تحضير الشنط، ابوكي مستعجل.
تركتها منى بين أحزانها وعادت لغرفتها تجهز حقائب السفر حتى انتهت.
رفع عبد الرحمن صوته مناديا وسط الڨيلا: حنين
أسرعت تنزل من غرفتها لتجيبه بصوت متقطع: ن.. نعم يا بابا
عبد الرحمن : آني وأمك راچعين على مصر، چوزك وعمك معاكي هنه بدالي، وآني موچود اتصلي بيا لو احتاچتي لشي، كوني طوع لچوزك، ارضيه ومتزعليهوش.
حنين : طيب والامتحانات؟
عبد الرحمن : أدهم هيچهز كل حاچه قبل الامتحانات وهيرچعك على مصر.
__________
وفي المساء عاد عبد الرحمن يصطحب منى للقاهرة
عاد ادهم للڨيلا بعد أن انتهى من عمله، جهزي نفسك هنسافروا كام يوم لإسكندرية، المفروض اننا قِدام الناس عرسان چُداد ولازمن نسافروا نقضوا شهر العسل
حنين : حاضر، هجهز الشنط.
في صباح اليوم التالي
اقتربت حنين من أدهم تتحدث بهدوء : صباح الخير
أدهم : صباح النور
حنين : احنا مسافرين امتي؟ وهنقعد كام يوم علشان ابقى عامله حسابي وأنا بجهز الشنطة؟
أدهم : هنسافروا المغربية إن شاء الله، وبراحتنا مورناش حاچه، بتسألي ليه في حاچه؟
حنين : آه، في طبعاً
ادهم ينتبه لكلامها: أيه بقاا اللي وراكي يا بت عمي، مين مستنيكي عاوزه ترچعيله بسرعة أكده؟
حنين تدمع عيناها : أنا مفيش حد مستنيني، أنا عاوزه ارجع علشان الكلية والامتحانات.
أدهم : متقلقيش أما نرچعوا بالسلامة ربنا يسهل
ومتحضريش شنطتي فضه هتچهزها، انتي چهزي حالك وبس، تركته وذهبت لتجهيز شنطة السفر الخاصة بها.
دقت السادسة مساءًا، نزل أدهم ممسكا بيد حنين بعد أن أمرها ترسم ابتسامة والسعادة على وجهها حتى لا يلاحظها أحد ويتساءل.
توجهوا معا للحديقة حيث تجلس غنيه التي هللت عندما رأتهم : يا صلاة النبي، يا صلاة النبي، الله أكبر، ربنا يحفظكم يا ولدي ويسعدكم، أمبارك عليك، الحمد لله عيشت وشوفتك ماسك مرتك ف ايدك عقبال ما يطول ف عمري وأشوف ولادك ف ايدك يا ولدي.
أدهم : ربنا يديكي العمر والصحة ياما.
حنين : صباح الخير يا ماما.
الحاجة غنية : اتصبحتي بأنوار النبي محمد يا بتي، حلوة ماما منك يا بت الغوالي ومرت الغالي، يالا يا ولدي اتوكلوا على الله لچل ما توصلوا قبل الليل.
ادهم : سلمي على أبوي، دخلت عليه لقيته نعسان مرضيتش أصحيه واقلقه.
__________
استقل كل من حنين وأدهم السيارة متوجهين للإسكندرية
في منتصف الطريق اتصل أدهم بمحمود حارس الشاليه ليتأكد من أنه جهز كل ما طلبه منه
أدهم : ألو، إيوه يا محمود، نضفت الشاليه وچهزت كل حاچه زي ما قولتلك؟
أوعاك تكون نسيت شي.
محمود : ايوه يا بيه كل حاجه جهزت واشتريت المعلبات والعصاير والمايه وشغلت التلاجه ونضفنا الشاليه وغيرنا الفرش وكل شئ تمام، متقلقش منستش حاجه.
أدهم : طيب الحمد لله، ساعه وهكون عندك بإذن الله تعالي
محمود : توصلوا بالسلامة ان شاء الله
_________
توقف أدهم بالسيارة في الاستراحة ويتوجه لحنين قائلاً :
انزلي نشرب حاچه وبعدين نكملوا طريقنا.
حنين : شكراً انا مش عاوزه حاچه.
أدهم : على راحتك، نزل من السيارة متوجهاً داخل الاستراحة، تناول فنجان من القهوة، وهو متابع لحنين من بعيد خوفا من أن يضايقها أحد، وبعد أن ينتهي عاد لحنين يحمل حقيبة بلاستيكية واعطاها لها، تناولتها منه بهدوء ثم سألته
حنين : أيه ده؟
أدهم : افتحيها وانتي تعرفي؟
فتحت حنين الحقيبة لتجد بها كيس ورقي به شطائر الشاورما والبيرجر التي تحبها ومعهم علب العصير والبيبسي والشكولاتة والبسكويت
حنين : كل ده هعمل بيه أيه؟
أدهم : يعني هتعملي بيه، هيا الناس في العادي بتعمل إيه بالوَكل، يالا كُلي انتي من بدري ما دوقتيش الزاد
شعرت بحنيته وسألت نفسها قائله : طيب ما انت حنين أهوه أومال ليه مش عاوز تسمعني؟
عاد ليكرر لها أدهم حديثه : يالا افتحي وكُلي واشربي العصير كمان.
بعد اقل من ساعه تقريباً وصلوا للإسكندرية حيث البحر والهدوء
دقت الساعة الحاديه عشر مساءً...
ارتدي أدهم شورت چينز طويل وتيشيرت معه قميص مفتوح بنصف كم وحذاء رياضي أبيض وتوجه لحنين قائلاً: اني هخرچ اتمشي شوي تحبي تآچي معاي
نظرت له حنين وملامح الدهشة بدت عليها، يلاحظها أدهم ووجه لها سؤاله
ادهم : مالك في حاچه، بتبصيلي أكده ليه؟
حنين : هاه، لا ابداً مفيش حاجة، لأ بصراحة في، أصلها أول مرة اشوفك لابس كده، كنت فاكره أنك بتلبس جلابيه بس وملكش في لبس الكاچول والحاجات دي.
ادهم : كل وقت وله ادان يا بت عمي، هاه هتآجي معاي ولا أمشي لوحدي؟
حنين : اه، هآجي ثواني هغير هدومي
ارتدت بنطلون قصير وتيشيرت كشف ذراعيها وتوجهوا للبحر حيث صفاء الروح
ادهم : اني هقعد اهنه شوي.
حنين : ماشي، انا هتمشي شويه ومش هبعد هرجع علي طول، ممكن؟
تردد أدهم في البداية أن يترك حنين تمشي بمفردها ولكنه أومأ برأسه بعد ذلك بالموافقة قائلا: متتأخريش
حنين : حاضر، تركه وابتعدت بأحزانها حتى لا يشعر بها أحد، تنظر للبحر وكأنها تشتكي له عما جري بها
وبعد عشر دقائق تقريباً رجعت وبدون أن يشعر بها أدهم فقد كان غارقاً مع البحر يشكي همه كما اعتاد فهو عاشق للبحر وامواجه، واذا بها تسمعه عن قرب وهو يأن بحديثه ويتحدث مع البحر بعيون دامعه وكأنه يسمعه، يجلس بجواره ليلقي همه وغمه على البحر وكأنه صديقه الوفي الذي وعد بأن يحفظ سره، سمعته وهو يقول آني موچوع يا بحر وياريتني لاقي حل يداوي چروحي، كني ميت وعايش في الدنيه لچل ما اتحاسب على ذنب عمري ما عملته
اقتربت منه حنين بهدوء، شعر بها وعاد لصمته من جديد وحاول أن يُخفي دموعه عنها
ادهم: تحبي ترچعي؟
حنين تطبق يديها علي صدرها تشعر بالبرد: اه ياريت، الجو برد أوي، كفاية كده.
ادهم: علي راحتك، ياله نرچعوا.
وفي أثناء عودتهم لاحظ انها تشعر بالبرد، خلع قميصه ووضعه حول ذراعيها وفوق أكتافها، قربها منه قليلا حتى تشعر بالدفء استسلمت ولم ترفض اقترابه منها.. كل ما كنت تشعر به هو البرودة تسري في جسدها.
وعندما وصلوا للشاليه، أسرعت تتوجه للفراش وخلدت للنوم.
استيقظ عامر مبكرًا ليجد غنيه تجلس بمفردها فاقترب منها يقول:
- أصباح الخيرات ياما.
غنيه : يصبحك ويربحك وما بين عباده يسترك وما يفضحك يا ولدي.
عامر : بقول أيه ياما
غنيه : قول يا قلب أمك، خير يا ولدي؟
عامر : خير ياما، اني هتحدت ويا بوي يتحدت مع عمي عبمچيد عشان نتقدم لچميله.
غنيه : چمييييلة... چميله تاني يا ولدي؟
يا ولدي دي بت سيماويه ونكدية ومهتبطلش مشاكل ومهتنفعكش .. سيبني أچيبلك ست سيتها.
عامر : ياما آني معيزش ست سيتها، آني رايدها هيا، هيا وبس ياما.
غنيه : خلاص يا ولدي، انت وراحتك، اتحدت معاه وشوف هو هيقولك أيه.
__________
استفاق أدهم في الصباح، حنين مستغرقة في نومها، خرج ليمشي على البحر ثم عاد، تفقد حنين ليجدها مازالت مستغرقة في النوم، بدأ يشعر بالقلق وأخذ يتفقدها بين الحين والآخر، تحمم وجهز مائدة الافطار وابريق الشاي ووضع الأكواب على المنضدة، حاول يحدث ضجيج لتستفيق ولكن باءت محاولاته بالفشل ومازلت حنين نائمه علي غير عادتها، احتاجه القلق وتملكه التوتر، اضطر ان يدخل واقترب منها ليوقظها
ادهم: قومي يا حنين الضهر على آدان
حنين : هاه .. انااا .. انااا
ادهم : حنين، حنين، وضع يده علي جبينها واذا بحرارتها مرتفعة وبدأت تَهذى بالكلام، بردانة أوي يا ماما غطيني
توجه وفتح حقيبتها يبحث بداخلها عن أي ملابس ذات أكمام طويلة فلم يجد.
أيه ديه مفيشي ولا حاچه بكم طويل، اعمل أيه آني طيب دلوقت، فاضطر ان يُلبسها كنزه بكم من ملابسه ويساعدها في ارتدائه.
رفع ادهم صوته ينادي للمساعد : يا محمود
ليأتي محمود مسرعا يلبي نداؤه : نعم يا بيه، في حاچه؟
أدهم : بسرعه روح شوف دكتور، الهانم تعبانة قوي.
محمود : حاضر حالاً أهه يا أدهم بيه، أنا عارف دكتور قريب، هروح اجيبه.
تركه وذهب لإحضار الطبيب، تأخر نصف ساعة، يتابع ادهم حنين بعمل الكمادات الباردة ولكنها لا تستجيب، مازالت الحرارة مرتفعة، ينظر إليها في كل مرة يلمس فيها وجهها الملائكي وكأنها عادت كطفله بريئة لم تلوث بعد، عاد محمود يصطحب معه الطبيب.
ادهم : اتفضل يا دَكتور.
ساعده في الكشف على حنين.
الطبيب : نزلت برد شديدة، بس هي علشان ضعيفة شويه اتأثرت بهوا البحر، هديها حقنه دلوقت هترتاح شويه وان شاء الله هتبقا كويسه بعد ما تنتظم على العلاج والأدوية دي لازم تآخدها بانتظام لمده تلات ايام والاكل مسلوق وحاجات خفيفة.
أدهم : حاضر يا دَكتور، هنعمل كل اللي وصيت بيه المهم تبقى بخير.
الطبيب : متقلقش إن شاء الله هتبقى كويسه بس أهم حاجه تلتزم بمواعيد الادوية زي ما أنا كتبتها بالظبط وكله هيبقي تمام بإذن الله، استأذن انا
انتهي الطبيب واستأذن في الانصراف...
أدهم : يا محمود، تعالى هنيه بسرعة
محمود : نعم يا بيه، جيت أهوه أؤمرني.
أدهم : الامر لله، اقعد چار الباب لحد ما أرچع، لو الهانم فاقت قولها إني راچع على طول.
محمود : حاضر يا بيه تحت أمر حضرتك
__________
استقل ادهم سيارته متوجهاً للصيدلية لشراء الادويه ثم توجه لمحل ملابس حريمي ليشتري كنزات بأكمام طويلة لحنين، ثم عاد ليجدها مستغرقة في نومها.
أدهم : يا محمود، تعالى هنه.
محمود : حاضر يا بيه، جيت اهوه
أدهم : روح اشتري الفراخ وشوف حد ينضفها ويسويها عشان الهانم لازم تآكل مسلوق علشان السخونة.
محمود : حاضر متقلقش، هروح أشوف.
__________
دخل ادهم غرفة حنين ليجدها مازلت مستغرقة في نومها، لم تشعر به بعد... اقترب منها يلمس جبينها ليطمئن على درجة الحرارة ليجدها بدأت في الانخفاض تدريجيا، جلس بجانبها، مسك يدها وقبلها للحظات ينسى ما حدث، سلامتك يا قلبي، جومي بقى والله اشتقتلك، بدأ تتحرك فابتعد عنها بهدوء وخرج من غرفتها وبعد دقائق بدأت تستفيق وتنادي .. ماما .. ماما .. ااااه
ليجري عليها أدهم والقلق يبدو على وجهه: مالك حاسه بأيه؟
حنين : عندي صداع جامد وجسمي واجعني اوي،
بكت حنين كطفلة صغيرة في عمر الزهور...
يرق قلب أدهم لها، اقترب منها يربت على كتفها ويضمها لصدره هچيبلك الدوا حالا بس لازم تآكلي الاول
وبصوت مرتفع ينادي : محمود
جري محمود مسرعاً نحوه : نعم يا بيه، نعم اؤمرني.
ادهم : فين الشوربة؟
محمود : جهزت حالاً هجيبها، جري واحضرها على الفور
ادهم : سيبها واخرچ انت، رفع ادهم الوعاء ليقطع لها الدجاج قطع صغيرة داخل الحساء لتتناولهم معاً بسهولة، أطعمها بيده
حنين: آه، دي سخنة أوي
نظر لها ادهم بحنية وابتسم وتحدث لنفسه قائلا: ما زلتي طفلتي التي لم تكبر بعد، ثم بدأ ينفث بهدوء فيها حتي تبرد وقدمها لها، اعتدلت اكثر من نومها ليعطيها الدواء
نظرت لملابسها لتجد نفسها ترتدي قميصه
حنين : أيه اللبس ده، مين اللي لبسني؟
ادهم: آني، كنتي عوزاني اسيبك تموتي من البرد، وانتهز الفرصة وقدم لها شنطة الملابس التي قام بشرائها، عموماً متزعليش اني چيبتلك غير قميصي
حنين : شكراً انا تعبتك معايا
ادهم : مفيش تعب ولا حاچه يا بت عمي، يارب يعچبوكي ولو عاوزه تغيريهم نغيرهم عادي، متشيليش هم لشي، آني هسيبك ترتاحي وتغيري براحتك وترك الغرفة وخرج
حنين من دون أن تنتبه لعدد الكنزات بداخل الحقيبة أخرجت احدهم وحاولت ان تُبدل ملابسها ولكنها لا تستطيع لشعورها بألم في جسدها، ااااه مش مشكلة بقى دلوقت، ابقى أغير بعدين، وعادت تستلقى على فراشها من جديد وأغمضت عيناها وذهبت في ثُبات عميق.
__________
في المساء دخل أدهم غرفة حنين يوقظها لتتناول الدواء، اقترب منها ليجدها مازلت ترتدي قميصه
ادهم : قومي ميعاد الدوا، ساعدها لتعتدل وبعد ان تناولت حبة الدواء سألها
-ليه مغيرتيش الهدوم معچبتكيش؟
حنين بتعب واجهاد شديد : لأ مقدرتش اغير
لاحظ ادهم أن ملابسها قد ابتلت من شدة العرق ليردف قائلا:
بس انتي لازم تغيري، هدومك مبلولة، الحقنه نزلت الحرارة، هتتعبي تاني
حنين بوهن : مش قادره أقوم
ادهم يتردد كثيراً مهينفعش اكده وبصوت متقطع آااني هساعدك
حنين : لأ، مش مشكله خلاص أما أحس أني كويسه هبقى أغير.
ادهم : لاه مشكله وبعدين انسي أي حاچه دلوقت وافتكري بس إني چوزك دقيقة واحدة.
استسلمت حنين لشعورها بالبرودة مرة أخرى
يساعدها في نزع ملابسها ودون قصد منه يلمس جسدها العاري أمامه، لينتفض ويشعر بالبرودة تسري بجسده، شعرت به حنين فتحرك بسرعة للخلف
حنين : شكراً انا هكمل
#يتبع
