بقلم نورسين محمد
الفصل ١١
توجهت فضه لحنين قائله: دقايق وهفضالك هو متعود بس لما ابوه بيسافر انما غير اكده بينام لحاله .
حنين: لا ولا يهمك علي راحتك، أنا هسمع معاكم.
قفز هشام الي الفراش وبجواره فضه ليدخل بين أحضانها وبدأت فضة الحكاية
فضه: كان ياما كان يا سعد يا اكرام ولا يحلي الكلام اللي بذكر النبي عليه الصلاة والسلام.
هشام وحنين: عليه الصلاة والسلام، تتنبه لها حنين
فضه: كان في طفل جميل، عيونه حلوين، متعود كل يوم يروح يقعد تحت التوتة وف يوم من الايام سمع صوت ضعيف فضل يدور لحد ما لقي قطة صغيرة واقعه ومتعورة ورچليها مكسورة...
هشام: وبعدين ياما عيمل أيه؟
فضه: شالها وحطها چاره تحت التوتة عشان يحميها من الشمس، وبعدين فكر شويه وچري عند النچار اللي چنب بيتهم وأخد منه خشبه وراح لأمه وأخد منها قماشه قديمة ورچع للقطه ومعاه مايه ووكل
وچبر رچليها وأكلها وسجاها وبقا كل يوم يروحلها مره الصبح ومره بالليل لحد ما خفت واتعافت واخدها البيت حممها وبقت صاحبته وبتمشي ف ضله منين ما يروح تروح وياه وتوته توته فرغت الحدوته.
ثم توجهت لحنين التي كانت تختلس النظر إليها من حين إلي آخر وهي تحتضن هشام بحنان، خلاص نام الحمد لله، هاه تآچي انتي كمان احكيلك حدوته.
ابتسمت حنين وأومأت بأنها موافقه، تفتقد حضن والدتها منذ أن سافرت وتركتها لأحزانها.
فضه فتحت ذراعيها وأشارت لحنين لكي تدخل هي الأخرى حضنها حيث شعرت بها وبوحدتها وافتقادها لوالدتها
واذا بحنين تجري لتدخل بين ذراعيها وتحتضنها وتنام على صدرها
بكت حنين بهدوء وتساقطت دمعاتها.
فضه تحتضنها اكثر متبكيش يا حبة عيني آني چارك،
اقولك هحكيلك حدوته حلوه هتعچبك
أومأت حنين بالموافقة لتبدأ فضة الحكاية
فضه: من زمان قوي ومنصور وادهم صحاب مقربين قوي من بعض، مكنش بيفرقهم بس غير وقت النوم
وف مره من المرات كان منصور عندينا وقالي اني رايدك وكنا صغار وقتها.
سيبته ومرضيتش عليه، هو خاف لأقول لأدهم ويتعاركوا مع بعض، يروح هو بقا يقوله آني رايد فضه وهحبها من زمان وهتزوچها وبقولك من دلوقت عشان تبقا عارف، فضه ليا آني ومهسبهاش لحد يآخدها مني، هههههه علي فكره هو اللي حكالي بعد ما اتچوزنا
ادهم وقتها كان اكبر من منصور بسنتين، فقاله اما نشوف هتعمل أيه عشان تآخدها
تعدي الايام والسنين وهو بيآچي الڨيلا مع ادهم وابوي بأي حچه عشان يشوفني هو كان عارف اني عشقاه ومستنياه اما يخلص دراسته وييچي يتقدملي
وبعد ما خلص راح لأدهم وطلبني منيه لاول وقاله اتكلم معاها لو موافقه هكلم عمي ولو مش موافقه بقا يبقا خلاص، ولقبت ادهم چاي يقولي
فضه أيه رأيك ف منصور واد خالتك؟
احمريت واخضريت ووشي چاب ألوان وعرقت ومبقتش عارفه ارد عليه
فقالي ساكته ليه؟
قولتله عاوزني اقول أيه يا خوي؟
ورأيي ف اييه؟ اني مفهماش
قالي شوفي يا بت والدي، منصور رايدك من زمان وهو دلوقت طالبك علي سنة الله ورسوله، أيه رأيك اقوله يقابل ابوكي ولا ليكي رأي تاني؟
آني سكتت ومرديتش فقالي طيب خلاص هقوله انك مش موافقه، تنحت واما جيه يقوم قولتله لاه آني موافقه قالي ما كان من لاول ماني عارف انك عشقاه هتداري علي، وباركلي والحمد لله اتچوزنا وعايشين ف خير ما بعده خير
حنين: ربنا يهنيكي ويسعدك .. أ ..أ ..
فضه: قولي، عاوزه تقولي أيه؟
حنين: لأ، خلاص ولا حاجه
فضه: لاه، ازاي في حاچه، وحاچه كبيرة كمان، قولي اللي في نفسك
حنين: هو انتي ممكن تحكيلي عن ادهم؟
فضه: ااااه، مش تقولي أكده من بدري، مستحيه ليه؟
شوفي يا سيتي ادهم زينة شباب قنا، منين ما يمشي انظار البنته ما بتنزلش من عليه، بس هو ولا بيعنيله شي، هو من زماااان قوي من لما كان صغير وقلبه متعلق بواحدة بس، هي اللي واخده قلبه وعقله ومع انه مكنش بيشوفها غير مرة كل شهر، بس روحه كانت متعلقة فيها، بيعيش طول الشهر علي المرة اللي بيشوفها فيها، بسمعه وهو بيقول فيها شعر وهو هيمان بحُبها، بس هي مكنتش عارفه انه بيحبها ولا حاسه بيه.
تنتبه حنين لكلامها وتسأل: ادهم بيحب وعاشق، مين دي؟
فضه: دي يا سيتي تبقا نانا
حنين: نانا! نانا مين؟ دي موجوده هنا في قنا؟
فضه: هي بقت موجوده ف قنا، الاول كانت ف مصر
حنين: مصر!
انا مش فاهمه حاجه، انتي تقصدي مين؟
فضه: آني اقصدك انتي يا نانا، ادهم عاشقك انتي ومحدش ساكن قلبه وعاقله وروحه غيرك انتي.
انهمرت حنين في البكاء وتساءلت: ادهم بيحبني انا كل الحب ده، طيب ليه مش عاوز يسمعني؟
احتضنتها فضه قائله: قوليلي يا حبة عيني، آني مستعده اسمعك للصبح، قوليلي ليه باكيه علي طول، من يوم ما چيتي وانتي حزينة، حابسه نفسك ومش بتشوفي حد، قاطعه الزاد اما خسيتي ووشك بهت لونه، انتي مكنتيش عاوزه ادهم؟
غصبوكي عليه؟
قوليلي اللي چواكي
حنين: لأ، محدش غصبني عليه
فضه: طيب حكيلي اني چارك، قوليلي ادهم مزعلك؟
اني سمعته مره غصب عني وهو بيزعق معاكي
شعرت حنين بالأمان من كلام فضه وقررت ان تحكي لها
حنين: انا هحكيلك علي كل حاجه، انا في ف حياتي سر ميعرفهوش غير ماما وبابا وادهم وانتي هتعرفيه دلوقت، وتحكي لها عما حدث معها.
بكت فضه واحتضنها قائله: يا قلبي عليكي، يبعتله اللي يفضحه في عرضه انشاله يارب قادر كريم، انتي غلطانه، ليه ساكتي كنتي لازمن تقولي الحقيق، لازمن يعرفوا انك مظلومة، لازم يرچعولك حقك منه، وادهم كمان لازم يعرف الحقيقة
اني هقوله علي كل حاچه ..
فضة: آني لازمن أقوله على كل شي
حنين: لأ، أنا حاولت كتير اقول اللي حصل لكن كلهم فاكرين أنه كان بمزاجي وأن الولد لما خاف اني اموت لما لقاني بنزف بلغ حد يبلغ بابا، أنا كل ما اتكلم يقولوا انتي اللي عملتي كده في نفسك، اوعديني انك متتكلميش معاه ولا تحكيله حاجه، بلاش تخليني اندم اني حكيت حاجه واللي ربنا اختاره هيكون انا راضيه باختياره، انا حاولت اكتر من مره احكيلهم مفيش حد سمعني ولا حتي امي، خلاص بقا
فضه: خلاص يا بت عمي علي راحتك، اوعدك مش هقوله حاچه، ياله نامي چاري بلاش تروحي أوضتك
احتضنتها حنين بعد أن جففت لها دموعها وذهبت في ثبات عميق وكأنها استقرت وشعرت بالأمان الذي افتقدته
تنقضي الليله وحنين في غرفه فضه وفي الصباح
فضه بابتسامتها المعهودة: قومي يا ست البنات عشان توفطري
حنين: بس انا مليش نفس
فضه: لاه، مفيش حاچه اسمها مليش نفس، انتي عاوزه المتيم بتاعك يبهدلني، والله والله ده موصيني عليكي
*** فلاش باك ***
ادهم : اتصبحتي بالخير يا فضتي
فضه: يصبحك ويربحك ويملا قلبك سعاده وفرح يا قلب فضتك، عامل أيه يا قلب اختك؟
ادهم: ف نعمه من ربي الحمد لله
فضه: علي لسانك حديت عاوز تقوله
ادهم: اني هغيب عن حنين يومين، عاوزك تخلي بالك منيها، لو طلبت اي حاچه تنفذيها، متتأخريش عليها ف شي ومتسبيهاشي قاعده لحالها طول الوقت، لازمن تآكل وسطيكم، شربيها لبن الصبح، عاوز ارچع ألاقيها زينه
فضه: يا عيني يا عيني ع الحب، حاضر يا خوي، كلامك اوامر.
نرجع لأحداثنا
توجه ادهم ومنصور لإنهاء باقي الاوراق الخاصة بأعمالهم، وقت العصر توجه ادهم لاستلام السلسلة
ادهم: الله عليك، تسلم يدك يا واد عمي، طلعت احلي من اللي اتوقعته، اني محتاچ منك طلب كمان معلش هتعبك معايا بس اني غريب عن أهنه.
البائع: لاه، مفيش تعب اؤمر
ادهم: عاوز علبه قطيفه علي شكل سبت صغير له يد، ألاقي عنديك منه؟
البائع: لاه بس استنظرني دقيقتين هجيبلك وآچي آني معنديش الشكل ديه بس هچيبلك.
خرج وبعد نصف ساعة عاد ومعه ثلاث علب قطيفه بألوان مختلفة بالشكل الذي طلبه ادهم
ادهم: أتأخرت قوي عليَّ يا واد عمي
البائع: كنت بدور عليها، لولا اني شايفك مستعچل مكنتش سيبت المحل ومشيت
ادهم: كتر خيرك، اني هآخد الزرقا دي، حسابنا كام
العامل: الحساب ......
ادهم: اتفضل يا واد عمي حسابك وبالزيادة كمان، سلاموا عليكوا
فرح العامل بالمبلغ وتهلل وجهه فرحاً، طريق السلامة يا واد عمي.
زهيره: يا چميله چهزتي شنط الخلجات اللي هنبعتها ڨيلا عبد الكريم؟
جميله: لاه، ليه ملميتش حاچه
زهيره: ليه يا بت چوزي، هنعيدوه تااااني؟
جميله: لا تاني ولا تالت يا مرت ابوي، آني هچهزهم وأبقا ابعتهم ف أي وقت
زهيره: يا بتي خطيبك اتحددت ويا ابوكي وخبره ان الاوضه الچديده اتفرشت خلاص، معيزينش نتأخروا احنا بقا، لازمن نودي خلجات العروسة چميلة بيت عبد المچيد
جميله: طيب يا مرت ابوي، هقوم اهاه
دخلت قسمه عليهم الغرفة متسائلة:
قسمه: تحبي أساعدك ف حاچه يا چميله
جميله: لاه .. خليكي يا مرت اخوي، بطنك قدامك مترين ليچرالك حاچه مهنخلصوش من چوزك
قسمه: طيب يا بت عمي، علي راحتك، بس آني موچودة اذا احتاچتي لشي شيعيلي مع تقى.
جميلة: الله يفرحك بيها.
__________
شهد : يا جماعه في حد يعرف حاجه عن حنين؟
دي من فتره كبيره جدا منعرفش عنها حاجه، في حد منكم اتصل بيها
ردت احد زملائها: انا اتصلت بيها اكتر من مره تليفونها مغلق.
زميلة اخري: وانا كمان اتصلت بيها مش بترد عليا ومش بتفتح النت خالص.
شهد وانا كمان اتصلت بيها أكتر من مرة ومش عارفه اوصلها انا هتصل على مامتها أعرف هي فين وهبقا ابلغكم،
استمع إلي كلامهم يوسف والشيطان محمود كانوا يجلسون على المنضدة المجاورة لهم في كافيتريا الجامعة
محمود يلاحظ توتر يوسف فوجه له سؤاله: هو انت عملت أيه؟
يوسف: فأييه؟
محمود: هيكون فأييه يا ابني أنت، ف البت بنت الدكتور الرخم بتاعك؟
يوسف: معملتش حاجه
محمود: هتخبي عليا انا بردو
يوسف: انت مجنون مش هينفع نتكلم هنا احسن حد يسمعنا نروح ف داهيه، اقولك تعالى نمشي وهحكيلك كل حاجه
محمود: ماشي، يالا يا بروو
تحركوا معاً خارج الجامعة وحكي له ما فعله
يوسف: عملت اللي قولتلي عليه وبعت لأبوها رساله ييجي يآخدها وروحت العيد ميلاد والكل شافوني هناك وبعد ما خلص نزلت ورجعت المكان تاني وراقبتهم وانا في العربية لحد أما نزلوا بيها من البيت ومن وقتها معرفش عنها حاجه.
محمود: طيب، انسي بقا طالما اهلها استلموها يبقا خلاص موضوع وخلص ولو حد من صحباتها البنات سألوك عليها انت مشوفتهاش ولا تعرف عنها حاجه من قبل العيد ميلاد كمان.
يوسف: ماشي
__________
ادخلت منى غرفة مكتب عبد الرحمن
منى: يا عبد الرحمن، شهد صاحبة حنين اتصلت بيا وسألتني علي حنين، قالتلي بتصل عليها من فترة وتليفونها مغلق أغلب الوقت ولو اتفتح مش بترد عليا، ومن يوم العيد ميلاد معرفش عنها حاجه، هي كويسه؟
وليه مش بتيجي الجامعة؟
دي وحشتني اوي
انا معرفتش اقولها حاجه غير انها مسافره البلد عند أهل باباها ومش هترجع غير على الامتحانات
عبد الرحمن: وليه مقولتيش انها اتچوزت؟
منى: خوفت يسألوني هي ليه اتجوزت بسرعه كده، خوفت وملقيش رد على أسألتها فقولتلها كده وأما نشوف هي هترجع امتي وتبقا تقولهم هي براحتها.
عبد الرحمن: طيب ماشي، سيبك من الكلام ديه واعمليلي شاي دماغي وچعاني من التفكير، حاسسها هتنفچر
منى: حاضر سلامتك
تركته وهي أيضا تراودها تساؤلات كثيرة وتبحث عن اجابة لها
سريعاً انقضي النهار وفي المساء عاد ادهم ومنصور، توجه ادهم لصديقه الوفي... ليرتفع صوته مناديا
- بندق، تعال، كيفك، اتوحشتك، واتوحشت قعدتي وياك يا صديقي.
أسرع إليه بندق يلعب معه كعادته
ادهم: شوف يا صديقي، هطلب منك طلب صغير أكده، ووضع العلبة علي الارض واشار له بحملها وان يتوجه بها ليعطيها لحنين، فأطاع بندق اوامره
حمل العلبة بأسنانه وتوجه لغرفة حنين وبدأ ينبش في باب الغرفة حتي تنبهت وقامت لتتفحص ماذا يحدث بالخارج واذا بها تجد بندق يقف بجوار الباب، تراجعت في البداية للخلف ثم لاحظت ما بين اسنانه، اقتربت منه على رغم خوفها الشديد ولكن حباً لاستطلاع ما يحمله اضطرت للاقتراب منه
وامسكت بالعلبة فتركها بندق وجري مسرعاً ليعود لصديقه،
فتحت حنين العلبة واذا بها تجد السلسال وانبهرت بجمالها،
في تلك اللحظة اقترب ادهم من باب الغرفة فسمعها
حنين: الله، الله، أيه الجمال ده، دي حلوه اوي، بتاعة مين دي يا ترى؟
فتح ادهم الباب ورد عليها بتساؤله: عچباتك؟
حنين: انا آسفه فتحتها من غير ما اعرف بتاعة مين
ادهم: اني بسألك، عچبتك؟
حنين: اه .. جدا
ادهم: كل سنه وانتي طيبه
حنين: علشاني انا؟
ادهم اني هنزل اطمن على ابوي، تركها بين اسئلتها التي لا تنتهي لتتحدث لنفسها…
انت عارف عيد ميلادي؟ انت بتعمل ليه كده معايا؟ انت لسه بتحبني رغم اللي انت شايف اني عملته؟
طيب ليه مش عاوز تعرف مني اللي حصل
ارتدت السلسال بعد ان تأملتها، واردفت تتساءل: بس هي مكتوب عليها أيه؟
وما من أحد يجيبها، فلا يعلم احد ما المكتوب عليها غير ادهم.
_________
تنقضي الايام وتم تجهيز كل المطلوب لفرح عامر وجميله، وصل عبد الرحمن ومنى، سلموا علي حنين وكأنها لم تغيب عنهم وكأنهم بالفعل اصبحوا اغراب عنها
جهز الجميع أنفسهم حتي حنين ارتدت فستان اسود قصير بوسط مبطن، مطرز بالخرز الاسود وحذاء اسود بكعب مرتفع وقد احضر لها ادهم مصففة مخصوصه لتزينها، أطلت عليهم كالملاك الصغير، تجملت وتزينت واسدلت شعرها الطويل على ظهرها ليغطيه وانبهر الجميع برقتها وجمالها الهادئ.
عندما نظر إليها ادهم تمني لو اخفاها بين ضلوعه واغلق عليها حتى لا تراها عيون أحد غيره، وتهلل وجهه فرحاً عندما رآها ترتدي السلسال الفضي الذي اهداها اياها
غنيه: الله اكبر، الله اكبر، ما شاء الله عليكي يا مرت ولدي قمر، قمر، له حَق ولدي يرفض الچواز قبلك، تعالي اقعدي چاري يا مرت الغالي.
سمعتها جميله فاحمرت عيناها غيظـًا
انتهي الفرح سريعاً، وداخل غرفة عامر وچميله
عامر: مبروك يا عروسة
جميله: مبروك على أيه؟
اندهش عامر من ردها وتساءل: مالك، مين مزعلك يا بت عمي، في عروسه تبقا منكده اكده ليله فرحها؟
جميله: انت مسمعتش امك وهي بتتغزل ف الست حنين واني العروسة حتى متقوليش كلمه واحدة زينة طول الفرح، ليه يعني وحشة ولا كنت وحشة.
عامر: لاه، وحشة كيف يعني، ده أنتي قمر، طيب انتي زعلانه من امي، انا أيه ذنبي بقا، وعموماً متزعليش حقك عليا اني يا قمر، حاول ان يقترب منها
جميله: باعد عني اني تعبانه وعاوزه انام، الليالي كتير
محبكتش الليلة.
عامر بانكسار: على راحتك يا بت عمي، قومي غيري فستانك وتعالوا نتعشوا.
#يتبع
