بقلم نورسين محمد
الفصل الثامن
مرت الساعات سريعـًا ودقت الساعه الواحده ظهرًا في بيت محمد
أمينه : يالا يا محمد ، هنتأخر علي اسامه
محمد : يالا انا خلصت ، هي هاجر هتكون هناك ؟؟
أمينه : هي قالتلي هتخلص شغلها في المستشفي وهترجع علي المستشفي تاني ، ما هي راحت شافته الصبح قبل شغلها
محمد : طيب يالا بيناا
توجهت امينه بصحبة محمد للإطمئنان علي اسامه وفي تلك الاثناء كانت كل من ساره وتيسير قد تجهزوا للنزول وقد اصطحبهم كريم للمشفي وتقابل جميعهم عند الباب منتظرين الساعه تدق الثانيه حتي يُسمح لهم بالدخول
كريم : في حد اطمن عليه الصبح بالتليفون
ساره : انا كلمت الممرضه الصبح وانت في الكليه وقالتلي انه نايم
أمينه : هاجر كانت عنده الصبح واطمنت عليه واتصلت بياا وقالتلي انه كان تعبان من تأثير العمليه بس هي مسبتهوش غير اما اتحسن وبقي كويس ونام
كريم : طيب يالا الباب اتفتح خلينا نطلع نطمن عليه
فُتح الباب وسمحوا لهم بالدخول ، اسرعت ساره مع كريم لتري حبيبها التي تركته ليله كامله بين الاوجاع والألم لا تدري عنه شئ
دخلت ساره مسرعة الي غرفة أسامه لتجده نائمـًا مستغرقـًا في نومه ، فأقتربت منه وقبلت جبينه
فأستفاق وتحدث إليها بصوت خافت
بتعيطي ليه يا حبيبتي ، انا الحمد لله بقيت كويس واحسن من الصبح ، انا كنت بموت لولا هاجر اتصرفت كان هاين علياا ارمي نفسي من الشباك من شدة الألم بس الحمد لله انا احسن ، اهدي بقي
ساره : بعد الشر عليك يا حبيبي ، ربنا يتم شفاك علي خير
وفي تلك الأثناء كان محمد وأمينه وتيسير قد وصلوا للغرفه واطمئنوا عليه وتوجَّه محمد بصحبة كريم لمقابلة الطبيب حتي يطمئنوا منه علي حالة اسامه
محمد : مساء الخير يا دكتور
الطبيب : اهلاً وسهلاً يا فندم اتفضلوا ارتاحوا
محمد : عاوز اطمن من حضرتك اكتر علي حاله اسامه
الطبيب : طبعـًا احنا الحمد لله خلصنا الخطوه الاساسيه اللي هي العمليه انما الاهم بعد العمليه بأسبوع اننا نبدأ العلاج الطبيعي وده هيآخد مش اقل من ستة او سبع شهور علشان يقدر يرجع يمشي تاني علي رجله من غير مساعده وده اللي هيفهمه لحضرتك دكتور العلاج الطبيعي
محمد : طيب حضرتك ترشح لنا مين للعلاج الطبيعي ؟؟
الطبيب : في عند حضرتك ناس كويسه كتير بس لو هرشحلك حد يبقي خلينا في الدكتور عصام الناصر ده من الناس الكويسه اللي انا اعرفها وان شاء الله يرتاح معاه ويجيب نتيجه كويسه بسرعه
محمد : طيب ممكن رقم التليفون بتاعه علشان نآخد ميعاد منه
الطبيب : حاضر و علي فكره هو بييجي هنا تلات ايام في الاسبوع بس مش النهارده ، بكره ان شاء الله هيكون موجود و المريض هيخرج بكره بالليل او بعد بعد بكره الصبح بالكتير يعني ممكن يشوفه هنا قبل ما يخرج ، اتفضل الرقم اهوه وبلغه انك من طرفي علشان يبدأ معاه علي طول
محمد : حاضر هبلغه ان شاء الله ، بعد اذن حضرتك
الطبيب : اتفضلوا
خرج محمد وكريم من غرفه الطبيب وعادوا لغرفه اسامه وطمئنوا الجميع أنه من المحتمل ان يخرج اسامه من المشفي غدًا او بعد غد وانه سيبدأ العلاج الطبيعي بعد اسبوع من اجراء العمليه
انتهت مدة الزياره وطلبت منهم الممرضه الخروج من الغرفه
اقتربت ساره تسلم علي اسامه فقبـَّل يدها وهمس له هتوحشيني ومتعيطيش تاني
ساره : حاضر مش هعيط ، هو التليفون معاك ؟؟
اسامه : آه معايا
ساره : هكلمك بالليل وهسهر معاك علي التليفون للصبح
اسامه : ماشي هستناكي
انصرفوا جميعهم وعادوا لبيوتهم
في الجامعه وحين دقت الرابعه والنصف ، دخل احمد بصحبه نادر للمدرج فوجد چوري تجلس بمفردها فأشار له نادر عليها
نادر : روح كلمها ، فرصه انها قاعده لوحدها
احمد : طيب هروح
فأقترب منها أحمد : احم احم ، مساء الخير
فرفعت تلك الچورية الحسناء وجهها لتراه امامها فأحمر وجهها خجلاً ثم اجابته : مساء النور
احمد : انا آسف اذا ازعجتك بس زميلي كان تعبان شويه ومقدرتش اسيبه فضاعت مني المحاضره اللي فاتت هو انتي حضرتيها صح ؟؟
چوري : آه ، حضرتها
احمد : طيب ولو مفيهاش ازعاج ، ممكن دفتر محاضراتك انقل منه او هصور المحاضره بالفون وهرجعلك تاني ؟؟
چوري : آه طبعـًا اتفضل
فشكرها أحمد واخذ منها الدفتر وجلس بعيدًا يتأمل ذلك الخط الجميل الذي كتبت به وكأنها ترسم الحروف لا تكتبها وعلي الرغم من احمد يمتاز بالخط الجميل الإ انه اعجب بما رآه وسريعـًا إلتقط صور المحاضره الأخيره وبالقلم الرصاص الذي لا يفارق يده ابدًا كتب لها
انا أحمد وده رقم تليفوني ........ ولو تتكرمي علياا وتكلميني علشان نتعرف علي بعض اكتر اكون شاكر لكي ، يعلم الله وحده اني مش مستهتر ومفيش في نيتي الشر ولكن فضلت الطريقه دي علشان محدش من اصحابك يلاحظ ويسألك عن حاجه و ده اهداء بسيط مني ياريت تقبليه بس المره دي مش أشعار إنما هيا كلمات هقولك بيها كل اللي كان المفروض من زمان أوي تعرفيه بس الوقت بقي بتاع ربنا مش بتاعنا هو وحده اللي بيختار وبيحدد أمتي هنتكلم وأمتي هنقدر نعترف باللي جوانا
_____________________**_____________________
مع كل صباح جديد لا يذكرني بك فليعود من حيث أتي وليمضي في سبيله بسلام
وكل قطره من مياه البحر التي تغمرني الآن لا شأن لي بها اذا لم تجمعني بك
تعلمت بعد كل هذا العمر الذي مضي ان كل مطر لا يجمعني بك يزيد من عطشي وما السبيل إلي أرتوائي سوي ان انظر إلي عيناك ثم تحتضنني بقوة لأشعر ان عظامك قد أخترقت عظام صدري لتتلمس بيدك قلبي
فأنت كحبات المطر الكريستاليه التي تتلألأ في ضياء الشمس
كحبات الندي عندما يتنفس الصباح الجديد
حين تغيب عن عيناي .. تتوقف عجلة الزمن عن الدوران ..
انتظر عودتك لتنتظم دقات قلبي مع دوان عقارب الساعه من جديد
حينها .. حينها تبدأ الروح للعوده للحياه مره أخري
و أعود لأحسب عمري منذ اللحظه التي ترتوي فيها عيناي برؤيتك
انت من جنيت الحَب من ارضه .. فلتجني ما زرعت بداخلي
____________________________________________
اتمني تفهمي كلامي وتصدقي كل حرف فيه
واغلق الدفتر وعاد يرده لها مره اخري
احمد : اتفضلي ، انا متشكر جـدًا
چوري : العفو ، تحت امرك
احمد : بعد اذنك
چوري وقد افتر ثغرها عن ابتسامة خفيفه اخذت قلب وعقل ذلك المحب العاشق : اتفضل
عاد احمد لنادر واخبره بأنه فعل ما اتفق عليه معه
نادر : هننتظر بقى ونشوف هتتصل ولا لأ
احمد : طيب ولو متصلتش ، إيه هيكون الحل ؟؟
نادر : هننتظر يومين كده وبعدين نشوف هنعمل إيه ، بس انت اهدأ شويه
اما كريم فعاد مع اسرته للمنزل بعد انتهاء مدة الزيارة
كريم : ماما انا هدخل انام شويه ، مش قادر افتح عيني ، من امبارح منمتش ، هنام ساعتين وصحيني علشان عندي تقارير لازم اسهر اعملها هتتسلم بكره
تيسير : ادخل يا حبيبي نام ، نوم الصحه والعافيه
دخل كريم غرفته وبدل ملابسه واستلقي علي فراشه وسريعـًا ذهب في ثُبات عميق
مرت ساعه وكريم مستغرق في نومه وبعد مرور ساعتين
تيسير : يا ساره روحي صحي اخوكي علشان يخلص مذاكرته
ساره : حاضر يا ماما ، هدخل اصحيه
توجهت ساره لغرفة كريم وفتحت الباب واقتربت منه تنادي ، كريم ، كريم ، اصحي علشان تلحق تخلص اللي وراك
فلم يجيبها ومازال مستغرقـًا في نومه فرفعت صوتها كرريم وهزت جسده ليستفيق ، يالا قوم
استفاق من نومه وفتح عيناه ينظر إليها بتعجب وهو يفرك عيناه بيده وسألها : انتي مين ؟؟
ساره : هههههه انتي مين يعني إيه ؟؟
انا ساره يا ابني في إيه مالك ؟؟
كريم : اه ، اه ، ساره معلش الظاهر علياا كنت بحلم
ساره : لا ولا يهمك بس قوم علشان تآكل وتشوف مذاكرتك
وتركته وخرجت من الغرفه
كريم : مين اللي انا شوفتها في الحلم دي ؟؟
الظاهر علياا من التعب بدأت أخرف
#يتبع
