بقلم نورسين محمد
الفصل السادس عشر
مازال الحفل مستمر
يستأذن محمد من كريمه لينفرد بمعشوقته حتي يتثني له ان يتغزل بها دون ان يسمعه احد .. وبعد قليل
ملوك : احم .. احم .. اييه بقاا هو انت مش هتعرفني علي القمر دي ولا اييه ؟؟ عموما انا هعرفها علي نفسي
تقترب ملوك وتُسلم علي يارا : انا اخت العروسه هههه وان شاء الله قريب اووي هبقاا العروسه وهبقاا اخت العريس كمان هههه
تضحك يارا وتسلم علي ملوك وتحتضنها وتقبلها : والله وحشتيني جداا
ملوك : وانتي كمان وحشتيني
محمد يضحك : بس يا ليمضه .. ويحتضنها محمد بحب وحنان ان شاء الله يا ملوكتي يا حبيبه قلبي هخلص منك انتي كمان قريب اووي
تنظر له ملوك بغضب ، انت عاوز تخلص مني ؟؟
محمد : لا يا حبي انا مقصدتش كده بالظبط ، انا اقصد افرح بيكي يعني علشان البيت يهداا من الوش شويه بقاا وتروحي تعيشي عند جوزك هههه
ملوك : شايفه يرضيكي اللي هو بيقولوا ده ؟؟
يارا : تبتسم ... لا طبعا هو البيت يبقاا حلو وانتي مش فيه برضو
ملوك : سامع الكلام اللي ذي السكر ، ماشي عموماً همشي انا بقاا مبحبش ابقاا عزول .. وتغمز لمحمد بعينها ثم تقول له .. الله يهنيك يا عم التومرجي ههههه سلام انا بقاا .. كفايه عليكوا كده
محمد ويارا يضحكون
ينتهي الحفل وتنقضي الليله
محمد في صباح اليوم الجديد يتوجه بالقرب من ورشة والده ويحاول ان يراه من بعيد ولكن دون فائدة وكعادته توجه لعم احمد ليسأل عن احوال والده
محمد : ازيك يا عم احمد
احمد : اهلا .. ازيك يا محمد يا ابني .. عامل اييه ؟؟
انت من زمان مش بتيجي ولا بتسأل
محمد : معلش يا عم احمد انت عارف الدراسه والشغل
المهم هو بابا عامل اييه ؟؟
احمد : والله يا محمد مش عارف اقولك اييه
محمد : خير في حاجه حصلت تاني معاه بعد السرقه ؟؟
احمد : اه طلق مراته ورجع قعد لوحده ف شقته القديمه اللي كان متجوز فيها وعلي طول تعبان ومش بينزل الورشه كتير والواد المساعد هو اللي واخد باله من الشغل
محمد : طيب انت عارف عنوان الشقه اللي هو عايش فيها ؟؟
احمد : هجيبهولك من الورشه .. استناني دقيقتين
وتركه وخرج متوجهاً للورشه ومحمد يراقبه من بعيد وهو يتحدث لأحد العاملين وبعد عدة دقائق عاد إليه وفي يده ورقه مكتوب عليها العنوان واعطاه اياها .. قدم محمد الشكر علي مساعدته له واستأذن لينصرف
احمد : مع السلامه يا ابني متبقاش تغيب علينا
محمد : ان شاء الله يا عم احمد .. سلام
انهي محمد يومه وعاد لبيته وبعد ان نامت كريمه اشار لملك وملوك ان يتبعوه بهدوء لغرفته .. ففعلوا
محمد : انا عاوزكم ف موضوع مهم
ملك : في اييه يا محمد ؟؟ قلقتنا
محمد : بصراحه احنا من وقت ما رجعنا من الشرقيه وانا بروح عند الورشه اطمن علي بابا من بعيد وعرفت انه كان متجوز وعنده بنتين تقريباً منهم واحده ف الاعداديه دلوقت وعرفت انه باع بيتنا القديم وكان عنده فلوس ف البنك واشتري بكل اللي كان معاه حديد والمخزن اتسرق وكل اللي كان معاه راح وبعد فتره المدام مقدرتش تستحمل قلة الفلوس فطلقها ورجع عاش لوحده وهو دلوقت تعبان ومش بينزل الورشه وانا اخدت العنوان اللي هو موجود فيه
ملوك : وانت بتفكر ف اييه ؟؟
ملك : بعني بعد كل اللي عمله فينا كل السنين اللي راحت دي وانت عاوز تروحله بعد ما رمانا ف الشارع
محمد : مهما حصل منه هيفضل ابونا غصب عننا كلنا وانا لازم هروحله مش هسيبه ومش بحكيلكم عشان آخد رأيكم .. انا بحكي علشان لازم تعرفوا كل اللي حصل معاه .. وانتوا حريين انا مش هغصب حد منكم يروح معايا
ملوك : تنظر لملك بعين دامعه .. الظاهر ان كلام محمد صح .. انه ابونا وهيفضل كده لحد ما نموت ثم توجه كلامها لمحمد .. انت روح الاول واطمن عليه وانا هروح معاك تاني مره
ملك : ماشي بس انا مش موافقه اروح بعد كل العمر ده واشوفه عيان .. انت روح وبعد كده نشوف .. ياله ننام
إلتقط محمد هاتفه بعد ان غادروا الغرفه وقام بالاتصال بيارا
ازيك يا حبيبتي .. اخبارك اييه ؟؟
يارا : انا الحمد لله .. فيك اييه ؟؟
ابتسم محمد بعد حزنه الشديد : تعرفي اكتر حاجه بحبها فيكي اييه ؟؟
يارا : اييه ؟؟
محمد : انك بتحسي بياا اول ما بتسمعي صوتي حتي من غير ما تشوفيني .. ومهما احاول اخبي عليكي بتعرفي
يارا : عشان انت عايش جواياا .. ازاي عاوزني محسش بنفسي
محمد : ربنا يخليكي لياا يا اجمل هديه ربنا بعتهالي
يارا : هاه .. مالك بقاا احكيلي
محمد : سرد لها كل ما توصل إليه وبعد ان انتهي سألها .. رأيك اييه في اللي سمعتيه ؟؟
يارا : انت صح يا محمد في كل اللي عملته .. ده والدك مهما حصل منه .. ولازم تسأل عليه ولازم تزوره وتطمن عليه ولو محتاج حاجه تقف معاه وتستانده انت ابنه الوحيد
محمد : انا فعلاً هعمل كده .. بكره هروح اشوفه .. مع اني مش متوقع ازاي هتكون مقابلته لياا بعد العمر ده كله ومش عارف اذا هيقبلني بعد ما طردني انا وامي واخواتي وكانوا لسه صغيرين بس معنديش حل تاني لازم اروح .. انا سهرتك النهارده وانتي عندك الصبح بدري شغل .. روحي ارتاحي وادعيلي وبكره ان شاء الله هطمنك .. احلام سعيده يا حبيبتي
يارا : ماشي حبيبي ان شاء الله هتعدي علي خير وانا هستني تليفونك .. سلام
محمد بعد ان انهي معها المكالمه وضع هاتفه جانباً وبدأ يفكر .. كيف ستكون مقابله والده له بعد مرور كل هذه السنوات .. هل سيقبله ام سيعاود ويجافيه ويطرده مره اخري .. ظل يفكر طوال الليل لم تغمض عيناه حتي ساعات الصباح الاولي وحين غفت عيناه واذا بصوت المؤقِت علي هاتفه يدق ليوقظه انها التاسعه صباحاً
استيقظ ودخل ليطمأن علي كريمه
صباح الخير يا ماما عامله اييه ؟؟
كريمه : صباح الخير والسعاده .. انا بخير يا حبيبي طول ما انت واخواتك بخير
محمد : فين البنات ؟؟
كريمه : فطروا و نزلوا من بدري .. هحضرلك الفطار علي طول عشان متتأخرش
محمد اقترب منها وقفل رأسها ويدها : ربنا يخليكي لياا وميحرمنيش منك يا رب .. اعمليلي ساندوتش واحد وكوبايه شاي .. انا نازل علي طول
كريمه : واحد بس يا محمد .. هو ده اكل يا ابني
محمد : معلش يا ماما حبيبتي .. لو حسيت بالجوع هبقاا آكل اي حاجه براا
وبعد ان تناول طعام بدل ملابسه وتوجه للعنوان المكتوب في الورقه
وعند وصوله سأل احد الماره : البيت رقم 33 فين من فضلك .. فأشار له عليه .. فشكره محمد وتوجه للبيت وصعد ولكنه لم يعرف اي من تلك الشقق هي التي يسكنها والده .. فإضطر ان يدق باب احداها ليسأل عنه
محمد : صباح الخير .. انا آسف للإزعاج .. الاسطي سعيد ساكن ف انهي شقه من فضلك يا حاجه .. فأخبرته .. فشكرها ثم صعد ودق عليه الباب واذا بصوت ضعيف يتحدث إليه من خلف الباب .. ايوه دقيقه واحده جاي اهوه
فأنتظر محمد للحظات حتي يفتح له الباب
سعيد : نعم ..مين حضرتك ؟؟
محمد وقد دمعت عيناه .. وتوقف الكلام بين شفتيه .. ولكنه استجمع كل قوته ليرد عليه .. حضرتك مش عارفني ؟؟
سعيد : لا والله مش وآخد بالي
محمد بصوت ضعيف : انا ... انا محمد يا بابا
سعيد : محمد !! محمد ابني واقترب منه سريعاً يحتضنه وهو يبكي .. تعالي .. تعالي يا محمد ادخل .. انتوا كنت فين كل ده ؟؟ وحشتني اووي يا محمد .. سامحني يا ابني انا دورت عليكم كتير ومعرفتش مكانكم .. سامحني يا محمد .. تعالي ادخل .. انتوا كويسين .. واخواتك .. اخواتك كويسين .. وامك عامله اييه .. كويسه ؟؟
محمد يمسح دموعه ويدخل معه ويجلس علي اقرب كرسي بجوار الباب ويجلس سعيد بجواره .. ثم يبدأ محمد بالكلام .. احنا كويسين كلنا الحمد لله .. وماما كويسه .. ملك مخطوبه وف آخر سنه ف كليه اعلام وان شاء الله هتبقاا صحفيه وملوك آخر سنه ف فنون تطبيقيه وهتتخطب قريب لمعيد عندها في الجامعه وهتبقاا مهندسه قريب اووي وانا في امتياز طب يا بابا الحمد لله
سعيد يزداد في البكاء .. ما شاء الله عرفتي تربي يا كريمه وربنا كرمك ف اولادك .. انا عندي دكتور و مهندسه وصحفيه .. ربنا يباركلك ف امك
محمد : ويباركلي فيك ويشفيك يا بابا
سعيد : انا غلطت ف حقكم وحق امك وربنا عاقبني وكل اللي اخدته منها راح .. انا دورت عليكم ف كل حته ومعرفتش مكانكم لحد ما يأست اني ألاقيكم .. انتوا كنتوا فين طول الفتره دي ؟؟
محمد : كنت بتدور علينا ليه ؟؟
علينا احنا يا بابا !!!
#يتبع
