الفصل السابع عشر
سعيد : اه يا محمد .. متستغربش يا ابني اللي حصل كان ساعة شيطان وانا فوقت متأخر ودورت عليكم عشان ارجع امك تاني بس ربنا كان عاوز يعاقبني
محمد : الكلام ده نأجله لوقت تاني يا بابا .. انا جيت اطمن عليك بعد ما عرفت انك تعبان ومش بتنزل الورشه
سعيد : عرفت !! عرفت من مين ؟؟
محمد : انا عارف كل اللي حصل معاك من وقت ما ...
وسكت للحظه ثم تابع كلامه .. من وقت ما طردتنا لحد دلوقت .. خلينا في المهم .. انت بتشتكي من اييه ؟؟ اييه اللي واجعك ؟؟
سعيد : انا تعبان من فتره كبيره بيجيلي مغص شديد علي غفله والدكاتره مش بيقولوا حاجه .. اللي يقولي إلتهاب فالمعده واللي يقولي برد واللي يقول القاولون والادويه مش بتجيب نتيجه
محمد : وبتحس بأييه كمان يا بابا ؟؟
سعيد : بحس بألم ف ............
محمد : طيب قوم إلبس وتعالي معايا
سعيد : بس انا تعبان يا محمد .. مش قادر اروح فأي حته .. انا فتحتلك الباب بالعافيه .. هنروح فين دلوقت ؟؟
محمد : معلش يا بابا انا محتاجلك معايا في مشوار ضروري .. ممكن ولا لأ ؟؟
سعيد : حاضر يا محمد .. هروح اغير وارجعلك
توجه محمد بصحبة والده إلي المستشفي التي يعمل بها محمد لكي يجري الفحوصات اللازمه عليه ويستشير استاذه في الحاله
في معمل التحاليل الخاص بالمستشفي
الممرضه : اهلاً دكتور محمد .. خير ان شاء الله
محمد : اسحبي العينه وبلغي الدكتور اني منتظر النتيجه بسرعه
الممرضه : حاضر .. هبلغ حضرتك بالنتيجه علي طول
توجه محمد مع والده لمركز الاشعه الملحق بالمستشفي
دكتور الاشاعه : اتفضل يا دكتور محمد ..حضرتك واقف علي الباب ليه ؟؟
محمد : معلش يا دكتور هتعبك معايا .. محتاج الاشاعه دي ضروري دلوقت
دكتور الاشاعه : حاضر يا دكتور .. هخلص وابعت لحضرتك التقرير حالاً
سعيد ينظر لأبنه و قلبه يرقص فرحاً به و بحب من حوله له .. ويقول في نفسه صبرتي وربنا رزقك بنجاح ولادك يا كريمه
توجه محمد لسعيد بالكلام ..بابا احنا هنطلع ننتظر نتيجه الاشعه والتحاليل وهندخل للدكتور
سعيد بعين دامعه : يا محمد انت كبرت الموضوع يا ابني .. ف الآخر هيطلعوا شويه برد وهيروحوا لحالهم
محمد : معلش مش هنخسر حاجه هنطمن اكتر
مر الوقت واستلم محمد نتيجه التحاليل والاشعه
حين قرأ التقرير المرفق بالاشعه تغير وجهه ولاحظ سعيد فسأله
في حاجه ف النتيجه ؟؟
محمد : لا .. حاجه بسيطه بس لازم نشوف الدكتور هيقول اييه ..اتفضل معايا
وبعد قليل محمد مع سعيد في غرفة الطبيب
محمد : مساء الخير يا دكتور .. اعرف حضرتك بوالدي
الدكتور : اهلاً وسهلاً .. اتفضل ارتاح .. خير يا محمد ؟؟
محمد شرح الاعراض باللغه الانجليزيه وعرض عليه الاشعه والتحاليل ثم اطلعه علي التقرير
الدكتور رد عليه باللغه الانجليزيه وكان الرد انه يجب ان يبدأوا العلاج بإستخدام اقراص الكيماوي نظراً لوجود ورم في المعده وسيتابعوا الحاله وإن حدثت أي تطورات فيجب التدخل الجراحي لإستئصاله
محمد شكره واستأذن منه وانصرف مع والده ثم اصطحبه للبيت وشرح له الحاله وأكد عليه الإلتزام بمواعيد العلاج
سعيد : يتقبل الامر ويقول الحمد لله علي كل حال .. ماشي يا محمد هآخد الدواا في مواعيده
محمد : انا همشي دلوقت يا بابا وهجيلك تاني ان شاء الله علشان اطمن عليك
سعيد : شكراً يا ابني .. انا معملتش معاك انت واخواتك حاجه تخليك تعمل معايا كل اللي انت عملته النهارده
محمد : مش لازم تعمل انت ابويا مهما حصل منك وانا مش هفرط فيك
تدمع عين سعيد : ربنا يباركلي فيك يا محمد .. اتوكل علي الله علشان متتأخرش انت
في بيت كريمه وبعد ان تناولوا الغداء .. اشار محمد لملك وملوك بأن يتبعوه لغرفته لكي لا تسمعهم كريمه حيث انها بالمطبخ
محمد يحكي لهم ما فعله مع سعيد
ملوك : يعني هيعمل عمليه ؟؟
محمد : لو في تطور ف الحاله اكيد هيعمل عمليه وهنستأصل الورم
ملك : تفتكروا احنا لازم نفضل مخبين علي ماما ولا المفروض نقولها ؟؟
محمد : اكيد لازم تعرف كل حاجه بس اما ييجي الوقت المناسب انا هتكلم معاها ف كل حاجه
تنطوي ساعات النهار و يحل الليل سريعاً .. محمد يتحدث مع يارا عبر الهاتف ويحكي لها كل ما حدث
يارا : طيب انت شايف ان ممكن الحاله تتحسن ولا هيحتاج عمليه فعلاً
محمد : الاحتماليه الاكبر ف الحالات اللي مرت علينا ان الورم مش بيستجيب للعلاج وبنضطر نستأصله وبعدها بيتعالج المريض فتره بجلسات العلاج الكيماوي
يارا : ألف سلامه عليه يا محمد .. ان شاء الله هيبقاا كويس .. بس انت هتعمل اييه مع مامتك
محمد : انا اكيد هحكيلها علي كل حاجه بس انا قولت هستني شويه .. بعد خطوبه ملوك انتي عارفه انها بعد عشر ايام
يارا : بصراحه انا خايفه تعرف متأخر وتفتكر انك كنت مخبي عليها فتزعل منك ووقتها هيبقا معاها حق ..
محمد : طيب انتي شايفه اييه .. احكيلها من دلوقت ؟؟
يارا : اه .. انا شايفه ان كده احسن
محمد : طيب امري لله هروح اتكلم معاها وهحكيلها علي اللي حصل كله وربنا يستر .. سلام وهرجع اكلمك تاني
اغلق هاتفه وتوجه لكريمه فوجدها تجلس علي الماكينه كعادتها
محمد : انتي لسه بدري علي ما تخلصي شغلك يا ماما ؟؟
كريمه تلاحظ ان محمد يريد ان يتحدث معها في امر مهم .. ف ترد .. لا .. انا خلصت .. شكل الموضوع مهم .. خير في اييه ؟؟
محمد يتردد ف البدايه ثم يبدأ حديثه معها
ماما .. انتي عارفه ان احنا ملناش غيرك ف الدنياا بعد ربنا بس الموضوع ان احنا ليناا اب وحتي لو هو رمانا واتخلي عننا ف احنا مينفعش نعامله بنفس معاملته ونرميه
كريمه بعصبيه : تقصد اييه بكلامه ده ؟؟
محمد : يا ماما .. يا حبيبتي بالله عليكي متتعصبيش علشان خاطري وخلينا نتكلم بالراحه .. بصراحه انا من وقت ما رجعنا من الشرقيه وانا بسأل علي بابا من غير ما هو يعرف ودلوقت هو عيان يا ماما وعنده ورم واحتمال يحتاج عمليه كبيره بعد فتره وف الاول والآخر ده ابويا وانا دكتور يا امي مش هقدر اسيبه واتفرج عليه مهما عمل فيناا وبعدين هو حكالي انه دور علينا كتير علشان يردك تاني لعصمته بس مكنش عارف لينا طريق
كريمه : يعني انت عملت كل ده والآخر جاي بتحكيلي ولا جاي بتآخد رأيي انك تسأل عليه ؟؟
محمد : يا حبيبتي .. انا لو عارف ان اللي عملته غلط مكنتش هعمله ابداا وانا بحكيلك لاني المره دي انا روحت وشوفته وعرفت حالته انما قبل كده كنت بطمن عليه من جيرانه اللي عند الورشه
كريمه : ماشي يا محمد .. وانا مش زعلانه منك هو ابوك وانت عاوز تروح وتطمن عليه روح انا مقدرش امنعك بس بعيد عني انا مش عاوزه اشوفه .. واخواتك عندك طبعاً اكيد هما عارفين الحكايه كلها ولو هما كمان عاوزين يروحوا يزروه ويطمنوا عليه انا معنديش مانع بس ذي ما قولتلك انا بعيد
محمد يقبل يدها ورأسه : هتفضلي طول عمرك حنينه وده اللي احنا اتعلمناه منك ..ربنا يخليكي لينا وميحرمناش منك ابداا ياارب
بعد مرور عشر ايام تمت خطبه ملوك علي رامي المعيد بقسم التصوير في حفل عائلي بسيط اقتصر علي اهل العريس المقربين وكريمه ومحمد ويارا وملك وخطيبها عمر .. واتفقوا علي انه سيتم حفل زفاف كبير يوم كتب الكتاب
مرت الايام سريعاً .. الجميع يتابع عمله
في كليه الفنون التطبيقيه
ملوك : طيب دلوقت الدكتور طالب مننا مشروع التخرج عن رسم صوره فيها حركه .. يعني نقف ف الشارع ونرسم اي حاجه ولا هنعمل اييه ؟؟
احد الزملاء : لازم نفكر في مواضيع مختلفه لانه هيرفض الموضوعات المكرره
عادت ملوك للبيت بعد ان انهت محاضراتها لتجد كريمه تجلس علي الماكينه تواصل عملها .. سلمت عليها ووضعت اوراقها وتوجهت للمطبخ لتجهيز الغداا
وبعد نصف ساعه اكتمل باقي افراد الاسره وتناولوا طعامهم .. دخلت ملك الغرفه تبحث علي الكمبيوتر عن موضوعات طُلب منها ان تجهزها في شكل ابحاث .. اما محمد فبدل ملابسه وتوجه للمستشفي لمواصلة عمله
جلست ملوك امام كريمه ووضعت يدها وقد اسندت رأسها عليها وظلت لفتره طويله تشاهد كريمه وعلي جالسه خلف رفيقتها
وفجأه إلتقطت القلم وفتحت اوراق الرسم وبدأت ترسم وظلت يومياً تقوم بإستكمال مشروع التخرج
#يتبع
