الفصل السادس
تامر يجلس في غرفته شاردًا واذا بطرقات علي الباب تصل لمسامعه ليستفيق قائلاً: تعالي يا هدير
دلفت هدير متسائلة: انت هتنام دلوقت؟
ما تيجي نعمل أي حاجه حتي نلعب كوتشينه مع بعض، انا زهقانه اوي ومش لاقيه حاجه في التي ڨي النهارده كله رخم
- بقولك إيه، تعالي نرغي شويه أنا عاوز اتكلم معاكي في حاجه
- ماشي حلو اوي، جلست علي فراشه لتسمع ما سوف يقول واردفت احكي يا شهريار
- لأ نبدأها رخامه مش هحكي حاجه
- لا لا خلاص مش هرخم بس احكي
- انتى عارفه اني كنت بحب تمارا زميلتي ف الجامعة بس والدتها عرفت واضطرينا نسيب بعض لان ابن خالتها متقدم لها وهو طبعاً ظروفه احسن بكتير من ظروفي علي الاقل في الوقت الحالي
- خلاص مفيش نصيب متزعلش نفسك ان شاء الله ربنا يرزقك بالأحسن منها
- مهو انا بقا حاسس دلوقت بحاجه تانية، احساس اول مره احسه في حياتي، قلبي بيدق بسرعه اوي اول لما بشوفها أو بحس إنها موجوده
ضحكت هدير قائله: يا عيني يا عيني ع الحب هو ده بقا الحب اللي بجد، مين اللي عليها العين والنية المرة دي يا حلو انت يا حلو
- هقولك بس انتى متعرفيش حاجه... ماشي ؟؟
- ماشي، اتفقنا بس انت قولي هي مين انا مشتاقه اعرف هي مين
- نانسي !!
هدير بدهشة متسائلة: نانسي، نانسي مين، بنت طنط سلمي ؟؟
- اه هيا، حاسس اني مش ببقى علي بعضي اما بشوفها، عاوز اتكلم معاها علي طول، مش عاوزها تغيب عن عيني، بخرج وبقعد مع اصحابي اوقات كتير علشان اجرب نفسي اذا الموضوع عادي ولا لأ، بس بلاقي نفسي اول لما برجع البيت بجري ادخل البلكونة اشوفها واقفه ولا لأ، بحس بشوق غريب من ناحيتها علي رغم اني متكلمتش معاها غير مرتين او تلاته، مش عارف اعمل إيه
- هو بقا في كلام تاني تقوله بعد كل ده، شوف هو علي الرغم من ان اللي هقوله غلط بس مفيش حل غيره
- قولي، إيه هو ؟؟
- كنت أفضل أني أنا اللي اتكلم معاها، بس انت لسه قدامك وقت علي ما تخلص الجامعة فأنت اللي لازم تتكلم معاها وتشوف اذا هي كمان معجبه بيك ولا لأ واذا كانت الامور تمام يبقا اول لما تخلص الجامعة تتقدم لها علي طول، أما اذا رفضت يبقى تصرف نظر تماماً عن الموضوع
- طيب وانا هكلمها ازاي بقا، دبرني يا وزيري
ضحكت هدير ممازحة: باين عليك آثار الحب، ماشي أساعدك أنت أخويا برضو، شوف يا سيدي انت تنتظرها الصبح وهي نازله الكلية وتمشي بعيد عنها طبعاً علشان كلام الناس، لازم تحافظ عليها وعلي سمعتها ده في المقام الاول وتركب معاها العربية اللي هتوصلها الجامعة وتدفعلها الأجرة طبعاً ومن هنا هي هترفض وانت تبدأ معاها كلام، ها... اردف ضاحكة إيه رأيك ف الخطة الجهنمية دي؟؟
- هي من ناحية جهنمية فهي كده فعلا، ربنا يستر
- هيستر بإذن الله بس انت خلي بالك منها ومن نفسك، حافظ عليها زي عينيك
- متقلقيش هشيلها ف عينيا
_________
وفي صباح اليوم الجديد انتظر تامر في الشرفة لحين خروج نانسي من المنزل وحين رآها نزل مسرعاً ليجدها منتظره علي المحطة لتستقل الحافلة المتوجه للجامعة، وقف علي بعد قليل عنها وحين اقتربت الحافلة صعدت نانسي وصعد خلفها تامر واخرج النقود ليدفع، فأشار لها ان تجلس وسدد المبلغ المطلوب وجلس بجانبها
تامر: صباح الخير
نانسي : صباح الخير اتفضل الفلوس، ميرسي
تامر بنظره حاده : انتى بتهزري صح ؟؟
- لأ بس انا معايا ليه انت تدفع ؟؟
- خلاص، شيلي فلوسك انا كمان معايا اما ابقى احتاج هاخد منك، شيلي بقا متفرجيش الناس علينا
نانسي بابتسامه ناعمه : حاضر
- هو انتى عندك محاضرات كتير النهارده او بمعني اصح عندك محاضرات مهمه ؟؟
- لأ، العادي يعني مش مهمه اوي، ليه في حاجه ؟؟
- انا عاوز اتكلم معاكي شويه ومش هعطلك كتير ممكن ؟؟
نظرت له نانسي باستغراب في البداية ثم اردفت طيب بس بشرط واحد
- اتفضلي، انا تحت امرك
- انا مش هروح معاك في اي مكان .. لو انت عاوز تتكلم فأي حاجه نقعد في كافيتريا الجامعة غير كده مش هينفع
- تمام وانا مش عاوز غير كده
وبعد دقائق وصلوا للجامعة وصعدوا كافيتريا الجامعة
تامر : فطرتي ؟؟
نانسي : لأ لسه
- طيب حلو جدا، نفطر مع بعض الاول ونشرب النسكافيه وبعد كده نتكلم
- هو أنت عرفت منين اني بحب النسكافيه ؟؟
- طيب هروح اجيب السندوتشات والنسكافيه الاول وأقولك علي كل حاجه
وتركها وتوجه لإحضار الطلبات وعند عودته
نانسي : كمان شاورما وبيرجر، لأ كده انت لازم تقولي انت عرفت كل ده منين
- بالنسبة للنسكافيه فأنا بشوفك علي طول بتشربيه في البلكونة وانتي بتسمعي الاغاني اما البرجر والشاورما فأنا خمنت والحمد لله زوقنا طلع واحد
- مممم ماشي، إيه بقا الموضوع المهم اللي عاوز تتكلم فيه ؟؟
- بصراحه انا مش عارف ابدأ منين بس هتكلم علي طول علشان متتأخريش، انا مش عارف اذا انتى كنتي عارفه اني كنت مرتبط قبل كده ولا لأ، بس لازم دلوقت تعرفي مني، انا كنت مرتبط بزميلتي في الكلية بس محصلش نصيب، او بمعني تاني حُبها ليا كان ضعيف ومقدرتش تقف قدام اهلها وترفض ابن خالتها اللي هيتجوز علي طول ومش معقول كانت هتسيبه وتنتظرني، المهم انا بدأت معاكي كلام علي الموضوع ده علشان بس تثقي فيا انا مش هخبي عليكي اي حاجه ولو عندك اي سؤال انا مستعد اجاوبك عليه
- تمام ... وانا بقا دخلي إيه بعلاقتك القديمة، هو ده الموضوع المهم اللي انت جاي تكلمني عنه ؟؟
- اكيد كلامي عن ارتباطي الاول له علاقه بالموضوع اللي جاي اكلمك فيه النهارده
- اتفضل كمل كلامك، انا سمعاك
- بصراحه انا معجب بيكي من اول مره شوفتك فيها، متقوليش ازاي وانت كنت بتحب واحده تاني في الوقت ده لان انا نفسي مش عارف ازاي ده حصل ومعنديش رد علي سؤالك غير اني بحس بإحساس غريب بيتملكني كل ما بشوفك، لما بتبقي معايا مش ببقاا عاوز اسيبك، مش ببقى عاوز حد غيري يتكلم معاكي، اما بشوفك واقفه قدامي في البلكونة ببقى مش قادر انزل عيني من عليكي وبحس وقتها بغيره غريبه ببقى عاوز اقولك ادخلي علشان محدش غيري يشوفك، لما بتكوني قدامي بحس ان قلبي عاوز يخرج من مكانه علشان فرحان انه شافك و من كتر دقاته ببقى خايف حد جنبي يسمعه ويسألني مالك، بحس بروحي بتتخطف مني وده انا حاسس بيه دلوقت وانتي معايا، وده اختصار لجزء بسيط من اللي انا بحس بيه وعاوز اعرف انتى حاسة بحاجه من ناحيتي ولا لأ ؟؟
وقبل ما تردي عليا لازم تعرفي اني مش هطلب منك غير اني اشوفك كل فتره وخلاص وكفاية عليا انك موجوده قدامي
- بصراحه انا مش عارفه اقولك إيه، بس ....
تامر بتوتر متسائلاً : بس إيه ؟؟
في حد ف حياتك ؟؟
انتى مش عوزاني صح ؟؟
ضحكت نانسي قائله: طيب خليني اتكلم، اديني فرصه وانا هقولك كل حاجه
- ماشي، اتفضلي اتكلمي انا سامع
- اولا انا عمري ما ارتبطت وعمري ما فكرت اني احب او اني اعيش قصه حب زي البنات اصحابي، كنت دايماً خايفه من الموضوع ده وان فلان مرتبط بفلانه واتخانقوا فسابها وراح حب غيرها ودي قلبها واجعها ودي مجروحة وهكذا... بس انا عاوزه أسألك سؤال
تامر : أكيد .. اتفضلي أسألي
#يتبع
