بقلم نورسين محمد
الفصل العاشر
ياسين ذهب في المساء الي المكتبة وقام بشراء قلم ذو إطار أسود مزخرف بماء الذهب وطلب من البائع ان يكتب عليه اسم تقي بدر ووضعه في علبه سوداء وقام بشراء كارت مكتوب عليه اعتذر
وقد كتب بخط يده ارجو قبول اعتذاري والسماح لي أن اتعرف عليكِ عن قرب ... ياسين عبد التواب
وفي صباح اليوم الجديد ، انتظر ياسين في الكافيتريا حتي وصلت تقي وتوجهت لتطلب كوب النيسكافيه والذي اعتادت أن تطلبه كل صباح جديد وكان يشاهدها ياسين دائمـًا
انتظرها بعد أن طلبت المشروب وتوجهت لتنتظره وجلست علي المقعد ووضعت حقيبتها علي المنضده أمامها
اقترب ياسين من النادل وطلب منه أن يُسلم لها العلبة أثناء تقديمه للمشروب دون أن يذكر له من الذي طلب منه ذلك وتركه وغادر الكافيتريا يترقبها من بعيد دون أن يلاحظه أحد
تقدم النادل ووضع الكوب فوق المنضدة وقدم لها العلبة
تقي : طيب النيسكافيه وعرفناه ، ديه بقي ايه ؟؟
النادل : معرفش والله يا آنسة هو شاب چيه سبهالي وقالي أوصلها لحضرتك وقال انك نسيتيها في المدرچ
تقي بإستغراب : إيه ديه ، طيب هات ، متشكره چدًا
بعد أن ابتعد عنها ، فتحت العلبة ووجدت القلم وقرأت الرسالة ففهمت أنه نفس الشخص الذي تسبب في كسر القلم بالأمس ، شربت النيسكافيه ووضعت القلم داخل حقيبتها وبعد أن انتهي يومها الدراسي عادت للڨيلا وسط تساؤلاتها التي لا تنتهي
_______________________
حنين : ادهم يالا انا جعانه اوي ، كفايه نووووم يا حياتي
ادهم لم يستيقظ ، اقتربت منه حنين بهدوء : ادهم ، يالا بقي قوم
جذبها بسرعه تجاهه : طيب ما انا كمان چعااان يا قلب أدهم وهفطور حالاً
ضحكت حنين وقد ارتسمت السعاده علي وجهها : لا أدهم حياتي مش وقت هزار ، آني چعانه يا واد عمي
ارتفع صوت ادهم بالضحك : واه ، واه ، هتتحدتي صعيدي
ضحكت حنين : واه ، وفيها إيه دي ، أبويا صعيدي وبحب صعيدي يبقي آني كمان اتحدت ذييهم ولا إيه ، عنديك اعتراض ولا إيه
ادهم : لاه معنديش واللي تحب صعيدي يبقي ......
حنين : يا بختها ، يا سعدها ، يا هناها يا ضي عيوني
ادهم : طب يالا ننزلوا نفطروا عشان الوقت ، بدل ما هنفطر اهنه
ضحكت حنين : طب ما عادي احنا ممكن نفطر برا النهارده
ادهم نظر لها بحب وشوق : وآني موافق يا حنين روحي ، طالما هنفطر برا يبقي براحتنا بقي ، هآخد حمام الاول وبعد اكده ننزلوا براحتنا
حنين : ماشي بس يالا بسرعة
______________________
أحمد : انتي ذاكرتي الچزء اللي هنمتحنوا فيه في المحاسبة ولا إيه ؟؟
ضحكت زينه : متقلقش ، هو الصراحه آني مفتحتش المحاسبة المالية لحد دلوك ومعرفاش بتتحدت عن إيه ،
بس عادي ديه امتحان تچريبي علي امتحان الترم النهائي وهيآخدوا منه درجة أعمال السنة ، هيعدي عادي ذي غيره
أحمد : وانتي ليه مقولتيش قبل أكده ، كنت شرحتلك آني المسائل قبل الامتحان
زينه : يا حبيبي متقلقش هيعدي
احمد : هاه ، إيه ، بتقولي إيه ، قوليها تاني ، علشاني
ضحكت زينه : هي إيه دي ؟؟
أحمد : حبيبي ، قوليها تاني
ضحكت زينه : لاه ، دي بتطلع لوحدها من غير طلبات
أحمد : بقي أكده ، طيب ، يالا نطلعوا المحاضرة احسن
____________________
همسه : مصطفي خلاص بقي متزعلش
مصطفي : لاه مفيش حاچه ، مش زعلان
همسه : طيب تعالي ننزل تحت في الجنينة
مصطفي : لاه مهنزلش تاني ، هشام متزرزر وآني كنت بهزر وياكي ، وهو قلب الموضوع چد
اشارت همسه بأصبعها نحو وجهه : شوفت ، شوفت ، تبقي لسه زعلان ، طيب علشاني انا مصطفي ، خود الشيكولاته وتعالي معايا
مصطفي : بالهنا والشفا ، انتي خابرة آني مهحبهاش ، آني اخدتها هزار ، يالا تعالي ننزلوا الچنينة أو نقعد مع چدتي
_________________________
تقي في غرفتها ، فتحت العلبك واخرجت منها القلم وتأملته فوجدت اسمها محفور عليه ، جحظت عيناها وفتحت فمها ثم سألت نفسها : هو يعرفني منين ويعرف اسمي كمان ، مين ديه ؟؟
فتحت الرسالة وقرأتها مرة ثانية : ياسين عبد التواب ، مين ياسين ده ، مفيش حد اسمه عبد التواب ف البلد غير اتنين
عبد التواب المحامي وعبد التواب العمده ، يا تري ياسين ديه واد مين فيهم ؟؟
طيب أقبل ولا ارفض ، آني صدعت من التفكير ، لاه لازمن أتحدت ويا حد ، بس مين ، ميييين ؟؟
ايوه هي مفيش غيرها ، بكره اروحلها واتحدت وياها
________________________
قضت حنين مع ادهم يومين في الجنة وعادوا لعشهم السعيد وسط الاسرة
في صباح اليوم التالي
تقي : ياما آني رايحه ازور چدتي ، اتوحشتها اوي ، من زمان مشوفتهاش بسبب الچامعه
قسمه : طيب روحي بس متأخريش ، مش هتآخدي رحمه وياكي ؟؟
تقي : لاه ، سألتها وقالت لاه
قسمه : طيب خلي السواق يوصلك ويستناكي ويرچعك
تقي : حاضر ياما
____________________
تقي : كيفك يا چدتي ، اتوحشتك قوي
غنيه : اهلاً بالغالية بت الغالية ، اتوحشتك يا قلب چدتك ، من زمان غايبة
تقي : الچامعة يا چدتي واخده كل الوقت ، معلش كل ما اعرف أچيلك هآچي اطمن عليكي
غنيه : ماشي يا بتي الله يعينك
تقي : بقولك إيه يا چدتي ، فين مرت خالي
غنيه : حنين فوق في أوضتها
تقي : طيب هطلع اسلم عليها ، آني شوفت همسه وحمزه ومصطفي برا بس ملقتش خالتي ولا مرت خالي
غنيه : خالتك ف المطبخ ويا البنات بيچهزوا الغدا
تقي : طيب هروح أسلم عليهم
تركتها وتوجهت للمطهي ، سلمت علي فضه ثم صعدت لغرفة حنين ، طرقت الباب ففتحت لها
حنين بفرحة : تقي ازيك يا قلبي ، وحشتيني اوي
تقي : وانتي كمان يا مرت خالي ، وحشتيني ، معلش الچامعة بقي أنتي خابرة زين الوقت عامل ازاي
حنين : تعالي ادخلي
تقي : بصراحة يا مرت خالي ، آني چيالك مخصوص ، في موضوع مهم عاوزه آخد رأيك فيه ومش عارفة اتصرف
والصراحة انتي خابره أن امي يعني مكملتش تعليمها ولو اتكلمت وياها مهتفهمنيش
حنين : خير يارب ، إيه اللي حصل ؟؟
حكت لها تقي كل ما حدث مع ياسين وبعد ان انتهت أخرجت العلبة واعطتها اياها
شوفي لقيته سايبها مع الواد بتاع الكافيتريا
اقري الرساله اكده
اخذتها حنين وقرأتها : ما شاء الله خط جميل جدًا ، طيب انتي عارفة هو مين ؟؟
تقي : لاه معرفاش اذا ابن المحامي ولا ابن العمده ، ما في اتنين عبد التواب في البلد
حنين : طيب قبل ما اقول رأي ، هسألك سؤال ، ممكن ؟؟
تقي : اكيد ، اتفضلي
حنين : انتي متقبله الولد ولا شيفاه انه مش كويس ؟؟
تقي : بصراحه مش هخبي عليكي ، الواد ذي القمر ، يعچب أي بنت ف الچامعه ، طول وچسم حلو وشكله حلو ولبسه نضيف مش مبهدل ، وبعد اللي عمله حسيت أن عنده ذوق ومحترم ، بس آني معرفهوش ولا اتحدت وياه قبل أكده عشان أقول زين ولا لاه
حنين : كلام جميل ، يبقي لازم نآخد فرصة نعرفه علشان نقدر نحكم عليه اذا كويس ولا لأ
تقي : طيب وازاي آني أقدر احكم عليه اذا كويس ولا لاه ؟؟
حنين : الموضوع بسيط ، أولاً الشباب في الجامعة سيرة ولو هو كويس هتلاقيه معروف في الجامعة بسيرته الطيبه وتقدري تسألي البنات اللي معاكي او زمايلاك اكيد هتقدري تعرفي عنه أخبار كتير
ومن تصرفاته معاكي لو سمحتيله بالكلام طبعـًا هتقدري تحكمي عليه ، بخيل ، غيور ، راجل ، ذكي ، بيقدر يتصرف بسرعة ، بيتصرف بحكمة ولا اهوج ، كل ده من خلال تعاملك معاه ، وقبل ما تقولي الناس والاصدقاء هيقولوا إيه ، لازم توسعي دايرة الاصدقاء شويه ، يعني مفيش مانع لو اتعرف علي الكل والمجموعة يكون فيها اولاد ، تعرفي الاولاد في المجموعات بتاعة الجامعة بيفيدوا اكتر من البنات
تقي : احنا معانا في المجموعة أولاد بس اتنين اخوات توأم للبنات ومش بيآچوا كتير بس عادي ممكن ادخله المچموعه بس هما ازاي بيفيدوا اكتر
حنين : انا اقولك الاولاد احتكاكهم اكتر بزملاء كتير ممكن يعرفوا الحاجات المهمة في الامتحانات ويبلغوكم بيها ، لو في ملزمة مش بيآخدها غير المقربين من الدكاترة او اقصد الناس اللي بتآخد دروس فمفيش غير الاولاد هما اللي يعرفوا يجيبوها وده فايده للكل
تقي : يعني أنتي من رأيك أسيب فرصه للتعارف ؟؟
حنين : من وجهة نظري المتواضعة انك تسيبي فرصة للتعارف ، طالما هيبقي في حدود الجامعة وبس وده علشان نعرف هو عاوز ايه بالظبط ، وايه قصده من نتعرف اكتر ، هل عاوز يخطبك ولا بيلعب
تقي : خلاص ماشي ، آني هعمل أكده ، وهبقي أبلغك بالتلافون عشان أمي والدراسة ، ولازم أرچع دلوك ، السواق منتظر كل ديه قدام الڨيلا
حنين : تمام وخلي بالك من نفسك وسلمي علي ماما واخواتك
تقي : يوصل ان شاء الله ، سلام
_______________________
همسه : ماما ، انا زعلانه اوي من هشام بسبب انه زعل مصطفي
حنين : يا حبيبتي هو كان خايف عليكي وبعدين هو مزعلهوش ولا حاجه ، هو انتي مش روحتي لمصطفي وقالك انه مش زعلان
همسه : هو قال كده انما انا عارفه انه زعلان ، من يوم اللي حصل وهو بطل يهزر معايا ولما بيلاقي هشام موجود بيطلع الاوضه وبيقفل عليه ومش بيرضي ينزل ولا يقعد معانا
حنين : طيب اقولك علي حاجه وتعمليها
همسه : اه ، ماشي ، إيه هي ؟؟
حنين : روحي اتكلمي مع هشام واطلبي منه انه يصالح مصطفي
همسه : هاه ، بس انا بتكسف اتكلم معاه يا ماما
حنين : تتكسفي ليه يا قلب ماما ، ده ابن عمتك ، لازم تتعودي تتكلمي معاه عادي
همسه : طيب ماشي أنا هروح دلوقت وهجرب
تركتها وقفزت مسرعة للحديقة ، بحثت عن هشام فوجدته يقرأ في إحدي الكتب ، اقتربت منه فرفع عينيه في صمت
همسه بخجل : هشام ، انا ممكن أطلب منك طلب ؟؟
هشام بإبتسامه خفيفه : تعالي اقعدي الاول واطلبي اللي انتي عوزاه
همسه : مصطفي زعلان منك علشان زعقت معاه ، أنا عوزاك تصالحه علشان خاطري ، ممكن ؟؟
شعر هشام بالضيق : حاضر هتكلم وياه علشانك ، اي طلبات تانيه ؟؟
همسه : لأ ، شكرًا ، هو انت زعلت مني ؟؟
هشام : آني عمري ما زعلت منك ولا هزعل ابدًا ، المهم انك تكوني مبسوطة وبس
همسه بخجل : انا مبسوطة جدًا وهبقي مبسوطة أكتر لو مصطفي مش زعلان
هشام : حاضر يا همستي
همسه : إيه ، بتقول إيه ؟؟
هشام : مفيش بقول حاضر
همسه : طيب ، انا هطلع لماما
_________________
في المساء تحدث هشام مع مصطفي وهدأت بينهم الامور
وفي صباح اليوم التالي ، ياسين قابل تقي عند باب الجامعة واستوقفها واعتذر منها ، فقبلت اعتذاره واستأذنت منه للصعود للمدرج لحضور المحاضرة
ياسين : هنتظرك في الكافيتريا بعد المحاضرة ، ممكن ؟؟
تقي : إن شاء الله ، بعد اذنك
تركته وصعدت للمدرج
تقي : بقولك إيه يا روان ، بما إنك تعرفي ناس كتير هنه ، آني عاوزه اسألك علي واحد وقوليلي تعرفيه ولا لاه
روان : واحد مين ديه ؟؟
تقي : لاه ديه واحد داس علي القلم بتاعي كسره من غير ما يقصد وبعدين النهاردة شافني عند الباب فإعتذر ، وآني عاوزه اعرف مين ديه
روان : طيب هو فين ؟؟
تقي : اللي قاعد هناك ديه في آخر المدرچ
روان : ديه ياسين يا بنتي واد العمده عبد التواب ، وبيلعب كوره قدم في فريق الچامعه ، هو صاحب محمود أخوي وبيآچي عندينا كتير ، الصراحة واد مؤدب وكل اصحابه بيحبوه
تقي : طيب طمنتيني ، الحمد لله
بعد أن انتهت المحاضره توجه ياسين للكافيتريا لمقابلة تقي
ياسين : آني سعيد چدًا إنك وافقتي نتكلم ونتعرف اكتر علي بعض
تقي : بس لازم تتعرف علي المچموعه كلها ، آني مقدرش أقعد معاك وحدينا اكده ، كلام الناس مهيرحمش
ياسين : آني عارف واللي هتطلبيه آني هعمله ، بدأ التعارف بينهم وعرفت منه أنه ابن العمده ، وبمرور الأيام تعرف ياسين علي المجموعة وأصبح فرد منهم ، اقترب اكثر من تقي والتي كانت تبلغ حنين أولاً بأول بكل ما يحدث بينهم حتي توجهها
أيام طويله مضت تلاها سنوات ولم يعترف ياسين بحبه لتقي ولكن كل معاملاته تدل علي حبه الشديد لها
أنتهت تقي من السنه الثالثه في الجامعه وتقدم ياسين لخطبتها والذي توجَّه مع والده عبد التواب لبيت عبد الكريم لكي يطلبوا موافقته علي جواز تقي من ياسين
عبد الكريم : شرفت يا عمدتنا ، احنا مهنلاقيش أحسن من ياسين ولد الغالي نديله بتنا ، بس أبوها وچدها هما اللي ليهم الرأي الاول والاخير ، وآني هشاورهم وهردلك خبر
العمده : خلاص علي خير بإذن الله هننتظر ردك ، بالإذن إحنا
#يتبع
